ಭಾರತದ ಕಾನೂನಿಂದ ಪಾರಾಗಲು ಯತ್ನಿಸಿದ್ದ ಲಲಿತ್ ಮೋದಿಗೆ ಭಾರೀ ಹಿನ್ನಡೆ; ಬಿಗ್ ಶಾಕ್ ಕೊಟ್ಟ ವನವಾಟು PM

ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಸಂಸ್ಥಾಪಕ ಲಲಿತ್ ಮೋದಿ ಅವರ ಪಾಸ್ ಪೋರ್ಟ್ ರದ್ದುಪಡಿಸಲು ವನವಾಟು ದೇಶದ ಪ್ರಧಾನ ಮಂತ್ರಿ ಆದೇಶ ಹೊರಡಿಸಿದ್ದಾರೆ. ಈ ಸಂಬಂಧ ಅಲ್ಲಿನ ಇಲಾಖೆಗೆ ಕೂಡಲೇ ಪ್ರಕ್ರಿಯೆ ಆರಂಭಿಸಿ ಎಂದು ಸೂಚನೆ ಕೂಡ ನೀಡಿದ್ದಾರೆ ಎಂದು ತಿಳಿದು ಬಂದಿದೆ.

ಲಲಿತ್ ಮೋದಿ ಅವರಿಗೆ ಪೆಸಿಫಿಕ್ ಸಾಗರದ ದ್ವೀಪ ರಾಷ್ಟ್ರವಾದ ವನವಾಟು ದೇಶದ ಪ್ರಧಾನ ಮಂತ್ರಿ ಜೋಥಮ್ ನಾಪಟ್ ಅವರೇ ಪಾಸ್​ಪೋರ್ಟ್​ ನೀಡಲು ಈ ಮೊದಲು ಸೂಚಿಸಿದ್ದರು. ಹೀಗಾಗಿ ಅಲ್ಲಿನ ಪಾಸ್ ಪೋರ್ಟ್​ ನೀಡಲಾಗಿತ್ತು. ಆದರೆ ಲಲಿತ್ ಮೋದಿ ಭಾರತದಿಂದ ಗಡಿಪಾರು ತಪ್ಪಿಸಿಕೊಳ್ಳಲು ನಮ್ಮ ದೇಶದ ಪೌರತ್ವ ಪಡೆದಿದ್ದಾರೆ ಎಂಬುದು ಗೊತ್ತಾಗಿದೆ. ಹೀಗಾಗಿ ಸಿಟಿಜನ್​ಶಿಪ್ ಕಮೀಷನ್‌ ತಕ್ಷಣವೇ ಅವರ ಪಾಸ್‌ ಪೋರ್ಟ್ ಅನ್ನು ರದ್ದು ಮಾಡುವ ಪ್ರಕ್ರಿಯೆ ಆರಂಭಿಸಬೇಕು ಎಂದು ಸೂಚಿಸಿದ್ದಾರೆ.

ವನವಾಟು ದೇಶದ ಪ್ರಧಾನಿಗೆ ಲಲಿತ್ ಮೋದಿ ಬಗ್ಗೆ ಸರಿಯಾದ ಮಾಹಿತಿ ಇರಲಿಲ್ಲ. ಇಂಟರ್ ಪೋಲ್​ನಿಂದ ಅವರಿಗೆ ಶಿಕ್ಷೆ ಆಗಿರುವ ಸೂಕ್ತ ಮಾಹಿತಿ ಕೊರತೆ ಆಗಿತ್ತು. ಹೀಗಾಗಿ ಇಂಟರ್ ಪೋಲ್ ಯಾವುದೇ ಆಲರ್ಟ್ ಹೊರಡಿಸಿರಲಿಲ್ಲ. ಆದ್ದರಿಂದ ಲಲಿತ್ ಮೋದಿ ಅವರ ಈ ಹಿಂದಿನ ಹಿನ್ನೆಲೆ ಏನು ಎಂದು ಹುಡುಕಿದಾಗ ವನವಾಟು ದೇಶಕ್ಕೆ ಯಾವುದೇ ನೆಗೆಟಿವ್ ಅಂಶ ಸಿಕ್ಕಿರಲಿಲ್ಲ ಎಂದು ಹೇಳಲಾಗಿದೆ.

ಇದನ್ನೂ ಓದಿ: ಕ್ರಿಕೆಟ್​ ಜಗತ್ತಿನ ರಿಯಲ್ ​​ಕಿಂಗ್ ಟೀಮ್​ ಇಂಡಿಯಾ.. ಹಿಟ್​​ಮ್ಯಾನ್​ ರೋಹಿತ್ ಕ್ಯಾಪ್ಟನ್ಸಿ ಹೇಗಿರುತ್ತೆ?

ಸದ್ಯ ಇದೀಗ ಮಾಧ್ಯಮಗಳ ವರದಿಯಿಂದ ಎಚ್ಚೆತ್ತುಕೊಂಡು ಲಲಿತ್ ಮೋದಿ ಅವರ ಪಾಸ್ ಪೋರ್ಟ್ ರದ್ದುಗೆ ಕ್ರಮ ಕೈಗೊಳ್ಳಲಾಗಿದೆ. ಈ ಮೊದಲು ಲಲಿತ್ ಮೋದಿ ವಿರುದ್ಧ ಆಲರ್ಟ್ ಹೊರಡಿಸುವಂತೆ ಭಾರತ 2 ಭಾರಿ ಮನವಿ ಮಾಡಿದರೂ ಇಂಟರ್ ಪೋಲ್ ತಿರಸ್ಕಾರ ಮಾಡಿತ್ತು. ಈ ಅಂಶ ಕೂಡ ಇದೀಗ ವನವಾಟು ಪ್ರಧಾನಿ ಗಮನಕ್ಕೆ ಬಂದಿದೆ. ಇದರಿಂದ ಪಾಸ್ ಪೋರ್ಟ್ ರದ್ದುಪಡಿಸಲು ಆದೇಶ ಹೊರಡಿಸಲಾಗಿದೆ. ಸದ್ಯ ಇಂಗ್ಲೆಂಡ್​ನಲ್ಲಿರುವ ಲಲಿತ್ ಮೋದಿಯವರಿಗೆ ಗಡಿಪಾರು ತಪ್ಪಿಸಿಕೊಳ್ಳುವ ಮಾರ್ಗಗಳಿಲ್ಲ ಎಂದು ಹೇಳಲಾಗುತ್ತಿದೆ.

ಭಾರತದ ಪ್ರತಿಷ್ಠಿತ ಕ್ರಿಕೆಟ್​ ಟೂರ್ನಿ ಐಪಿಎಲ್‌ನ ಅಧ್ಯಕ್ಷರಾಗಿದ್ದಾಗ ಲಲಿತ್ ಮೋದಿ ಅವರು ಕೋಟ್ಯಂತರ ರೂಪಾಯಿಗಳ ದುರುಪಯೋಗದಲ್ಲಿ ಭಾಗಿಯಾಗಿದ್ದಾರೆ ಎಂಬ ಆರೋಪವಿದೆ. ಇದಕ್ಕೆ ಸಂಬಂಧಿಸಿದಂತೆ ಲಲಿತ್ ಮೋದಿ, ಭಾರತೀಯ ತನಿಖಾ ಸಂಸ್ಥೆಗಳಿಗೆ ಬೇಕಾಗಿದ್ದಾರೆ. ಈ ಹಿನ್ನೆಲೆಯಲ್ಲಿ 2010ರಲ್ಲಿ ಭಾರತವನ್ನು ತೊರೆದು ಲಂಡನ್‌ನಲ್ಲಿ ವಾಸಿಸುತ್ತಿದ್ದರು. ಆದರೆ ಇತ್ತೀಚೆಗೆ ಲಂಡನ್‌ನ ಭಾರತದ ಹೈಕಮಿಷನ್‌ ಕಚೇರಿಯಲ್ಲಿ ತಮ್ಮ ಪಾಸ್‌ಪೋರ್ಟ್ ಲಲಿತ್ ಮೋದಿ ಒಪ್ಪಿಸಿದ್ದಾರೆ ಎಂದು ಹೇಳಲಾಗಿದೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ