ಬೇಗ ಕ್ರೀಸ್​ ಖಾಲಿ ಮಾಡಿದ ಕೊಹ್ಲಿ, ಸಾಲ್ಟ್​; RCBಗೆ ದೊಡ್ಡ ಪೆಟ್ಟು, ಈ ಪಂದ್ಯವಾದರೂ ಗೆಲ್ಲುತ್ತಾ?

ಮಳೆಯ ಕಾರಣದಿಂದ ತಡವಾಗಿ ಪ್ರಾರಂಭಿಸಲಾಗಿದ್ದ ಪಂಜಾಬ್ ವಿರುದ್ಧದ ಐಪಿಎಲ್​ ಪಂದ್ಯದಲ್ಲಿ ಆರ್​ಸಿಬಿ ಓಪನರ್ಸ್​ ಬ್ಯಾಟಿಂಗ್​ನಲ್ಲಿ ತೀವ್ರ ಕೆಟ್ಟ ಪ್ರದರ್ಶನ ನೀಡಿದ್ದಾರೆ. ವಿರಾಟ್ ಕೊಹ್ಲಿ ಹಾಗೂ ಫಿಲಿಪ್ ಸಾಲ್ಟ್ ಹಾಗೇ ಬಂದು ಹೀಗೆ ಪೆವಿಲಿಯನ್​ಗೆ ಓಡಿದರು.

ಸಿಲಿಕಾನ್ ಸಿಟಿಯಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಟಾಸ್ ಗೆದ್ದು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡ ಪಂಜಾಬ್ ಕಿಂಗ್ಸ್​ ತಂಡದ ನಾಯಕ ಶ್ರೇಯಸ್ ಅಯ್ಯರ್, ಆರ್​ಸಿಬಿಯನ್ನ ಬ್ಯಾಟಿಂಗ್​ಗೆ ಕರೆದರು. ಅದರಂತೆ ಆರ್​ಸಿಬಿ ಪರ ಓಪನರ್​ಗಳಾಗಿ ಬ್ಯಾಟಿಂಗ್​ಗೆ ಬಂದ ವಿರಾಟ್ ಕೊಹ್ಲಿ ಹಾಗೂ ಫಿಲಿಪ್ ಸಾಲ್ಟ್​ ಮತ್ತೊಮ್ಮೆ ತವರಿನ ನೆಲದಲ್ಲಿ ವಿಫಲ ಬ್ಯಾಟಿಂಗ್ ಪ್ರದರ್ಶನ ಮಾಡಿದ್ದಾರೆ.

ಇದನ್ನೂ ಓದಿ:ಚಿನ್ನಸ್ವಾಮಿಯಲ್ಲಿ ಕ್ಯಾಪ್ಟನ್​ ರಜತ್​ಗೆ ದಕ್ಕದ ಟಾಸ್​.. ಪ್ಲೇಯಿಂಗ್- 11ರಲ್ಲಿ ಯಾರ್​ ಯಾರಿಗೆ ಚಾನ್ಸ್​?

ಆರಂಭಿಕರಾದ ಫಿಲಿಪ್ ಸಾಲ್ಟ್ ಬಂದಷ್ಟೇ ವೇಗವಾಗಿ ಮೈದಾನದಿಂದ ಹೊರ ನಡೆದರು. ಕೇವಲ 4 ಬಾಲ್​ಗಳನ್ನು ಎದುರಿಸಿದ ಸಾಲ್ಟ್​ ಒಂದು ಬೌಂಡರಿ ಬಾರಿಸಿ ಔಟ್​ ಆಗಿದ್ದಾರೆ. ಆರ್ಷ್​ದೀಪ್ ಸಿಂಗ್ ಬೌಲಿಂಗ್​ನಲ್ಲಿ ಜೋಶ್​ ಇಂಗ್ಲೀಷ್​ಗೆ ಕ್ಯಾಚ್​​​​ ಕೊಟ್ಟು ಬೇಸರದಿಂದ ಡ್ರೆಸ್ಸಿಂಗ್ ರೂಮ್​ಗೆ ತೆರಳಿದರು.

ಇನ್ನು ಸಾಲ್ಟ್​ ಹೋದ ಬೆನ್ನಲ್ಲೇ ವಿರಾಟ್ ಕೊಹ್ಲಿ ಕೂಡ ಕ್ರೀಸ್ ಖಾಲಿ ಮಾಡಿದರು. ತಂಡದ ಮೊತ್ತ 21 ರನ್​ ಆಗಿರುವಾಗ ವಿರಾಟ್​ ಕೊಹ್ಲಿ ವಿಕೆಟ್ ಒಪ್ಪಿಸಿದರು. ಆರ್ಷ್​ದೀಪ್ ಸಿಂಗ್ ಬೌಲಿಂಗ್​ನಲ್ಲಿ ಮಾರ್ಕೊ ಜಾನ್ಸನ್​​​ಗೆ ಕ್ಯಾಚ್​​​​ ಕೊಟ್ಟರು. ಇಲ್ಲಿಗೆ ಆರ್​ಸಿಬಿಯ ಬಲಿಷ್ಠ ಬ್ಯಾಟಿಂಗ್​ ಪಡೆಗೆ ದೊಡ್ಡ ಪೆಟ್ಟು ಬಿದ್ದಿತು. ಏಕೆಂದರೆ ಸಾಲ್ಟ್​ ಹಾಗೂ ಕೊಹ್ಲಿ ಈ ಇಬ್ಬರು ಕೊಂಚ ಸಮಯ ಕ್ರೀಸ್​ನಲ್ಲಿದ್ರೆ ಉಳಿದ ಬ್ಯಾಟರ್​ಗಳಿಗೆ ರನ್​ಗಳಿಸಲು ಅನುಕೂಲವಾಗುತ್ತಿತ್ತು. ಇದು 14 ಓವರ್​ಗಳ ಮ್ಯಾಚ್ ಆಗಿದ್ದು ಆರ್​ಸಿಬಿ ಬ್ಯಾಟರ್​ಗಳು ವಿಫಲ ಪ್ರದರ್ಶನ ನೀಡುತ್ತಿದ್ದಾರೆ. ಸದ್ಯ ಆರ್​ಸಿಬಿ 40 ರನ್​ಗೆ ಪ್ರಮುಖ 5 ವಿಕೆಟ್​ಗಳನ್ನ ಕಳೆದುಕೊಂಡಿದೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ