ರನ್​ ಮಷಿನ್​ಗೆ ಕ್ರಿಕೆಟ್​​ ಲೋಕದಲ್ಲಿ ಭಾರೀ ಹಿನ್ನಡೆ.. ವಿರಾಟ್​ ಕೊಹ್ಲಿ ಬ್ಯಾಟಿಂಗ್ ಚಾರ್ಮ್ ಕಡಿಮೆ ಆಯಿತಾ?

ಇಂಡಿಯನ್​ ಕ್ರಿಕೆಟ್​​ನಲ್ಲಿ ವಿರಾಟ್​ ಕೊಹ್ಲಿಯ ದರ್ಬಾರ್​ ಅಂತ್ಯ ಆಯಿತಾ, ಗುಡ್​ ಬೈ ಹೇಳುವ ದಿನ ಸಮಿಪಿಸಿತಾ ಎನ್ನುವ ಚರ್ಚೆ ಎದ್ದಿದೆ. ಯಾಕಂದ್ರೆ, ಒಂದಲ್ಲ, ಎರಡಲ್ಲ ಬರೋಬ್ಬರಿ ಸತತ 14 ವರ್ಷಗಳಿಂದ ಇದ್ದ ಪಟ್ಟ ಇದೀಗ ಕಳಚಿ ಬಿದ್ದಿದೆ. ಕ್ರಿಕೆಟ್​​ ಲೋಕದಲ್ಲಿ ಕಿಂಗ್​ ಕೊಹ್ಲಿಯ ಆಳ್ವಿಕೆ ಅಂತ್ಯ ಅನ್ನೋ ಸಂದೇಶವನ್ನ ಇದು ರವಾನಿಸಿದೆ.

ಕೊಹ್ಲಿ ಇಂಟರ್​​ನ್ಯಾಷನಲ್​ ಕ್ರಿಕೆಟ್​ನಲ್ಲಿ ಈ ಹೆಸರಿಗಿರುವ ಗತ್ತು, ಗೈರತ್ತೇ ಬೇರೆ. ಮಾಡ್ರನ್​ ಕ್ರಿಕೆಟ್​ನ ದೊರೆ, ಕಿಂಗ್​, ರನ್​ಮಷಿನ್​, ರೆಕಾರ್ಡ್​ ಬ್ರೇಕರ್​, ಶತಕದ ಸರದಾರ. ಒಂದಾ, ಎರಡಾ ಕಳೆದೊಂದು ದಶಕದಲ್ಲಿ ಈ ಕೊಹ್ಲಿ ಮಾಡದ ಸಾಧನೆ ಇಲ್ಲ. ಮುರಿಯದ ದಾಖಲೆ ಇಲ್ಲ. ಆದ್ರೆ, ಕಳೆದ ಕೆಲ ವರ್ಷಗಳಿಂದ ಕೊಹ್ಲಿಯ ಬ್ಯಾಟಿಂಗ್ ಚಾರ್ಮ್​ ಕಡಿಮೆ ಆಗಿದೆ. ಪ್ರೈಮ್​ ಫಾರ್ಮ್​ನಲ್ಲಿದ್ದಾಗ ಹಸಿದ ಹುಲಿಯಂತೆ ಘರ್ಜಿಸಿದ್ದ ಕೊಹ್ಲಿ, ಈಗ ರನ್​ ಬರ ಕಾಡುತ್ತಿದೆ.

14 ವರ್ಷಗಳ ಬಳಿಕ ಕಳಚಿ ಬಿತ್ತಾ ಕೊಹ್ಲಿ ಪಟ್ಟ?

ಕ್ರಿಕೆಟ್​ ಲೋಕದ ಸುಲ್ತಾನನಾಗಿ ಮರೆದಾಡಿದ್ದ ಕೊಹ್ಲಿಯ ಆಟ ಈ ವರ್ಷವಂತೂ ಹೀನಾಯ ಸ್ಥಿತಿ ತಲುಪಿದೆ. ಪರಿಣಾಮ 14 ವರ್ಷಗಳಿಂದ ಕಾಪಾಡಿಕೊಂಡು ಬಂದಿದ್ದ ಪಟ್ಟವೂ ಕಳಚಿ ಬಿದ್ದಿದೆ. ಐಸಿಸಿ ಱಂಕಿಂಗ್​ ಪಟ್ಟಿಯಲ್ಲಿ 2011ರಿಂದ ಈವರೆಗೆ ಒಂದಿಲ್ಲೊಂದು ಫಾರ್ಮೆಟ್​ನಲ್ಲಿ ವಿರಾಟ್​ ಕೊಹ್ಲಿ, ಭಾರತದ ಪರ ಟಾಪ್​​ ಬ್ಯಾಟ್ಸ್​​ಮನ್​​​​ ಆಗಿರುತ್ತಿದ್ದರು. ಆದ್ರೆ, ಈ ವರ್ಷ ಕೊಹ್ಲಿಯ ಹೆಸರು ಯಾವ ಫಾರ್ಮೆಟ್​ನಲ್ಲಿಲ್ಲ.

ಕರಿಯರ್​ನ ಕರಾಳ ವರ್ಷಗಳಲ್ಲೂ ಕೊಹ್ಲಿ ರಾಜ.!

2020, 2021, 2022... ವಿರಾಟ್​ ಕೊಹ್ಲಿ ಕರಿಯರ್​​ನ ಕರಾಳ ದಿನಗಳು. ಈ ಮೂರು ವರ್ಷಗಳಲ್ಲಿ ಅನುಭವಿಸಿದ ಯಾತನೆ ಅಷ್ಟಿಷ್ಟಲ್ಲ.. ಈ ಸಮಯದಲ್ಲಿ ಸೆಂಚುರಿ ಸ್ಟಾರ್​​ಗೆ ಶತಕದ ಬರ ಮಾತ್ರವಲ್ಲ.. ರನ್​ ಬರವೂ ಕಾಡಿತ್ತು. ಇನ್​​ಕನ್ಸಿಸ್ಟೆಂಟ್​​ ಫಾರ್ಮ್​​ ಕೊಹ್ಲಿಯನ್ನ ಕಾಡಿತ್ತು. ಆದ್ರೆ, ಆ ಸಂಕಷ್ಟದ ಸಮಯದಲ್ಲೂ ಱಂಕಿಂಗ್​ನಲ್ಲಿ ಒಂದಲ್ಲ ಒಂದು ಫಾರ್ಮೆಟ್​ನಲ್ಲಿ ಟೀಮ್​ ಇಂಡಿಯಾದ ನಂಬರ್​​ 1 ಬ್ಯಾಟರ್​ ಆಗೇ ಕಿಂಗ್​ ಕೊಹ್ಲಿ ಉಳಿದಿದ್ದರು. 2020ರಲ್ಲಿ ಮೂರೂ ಫಾರ್ಮೆಟ್​​​ಗೆ ಕಿಂಗ್​ ಆಗಿದ್ದ ಕೊಹ್ಲಿ, 2021, 2022ರಲ್ಲಿ ಏಕದಿನ ಫಾರ್ಮೆಟ್​ನಲ್ಲಿ ಟಾಪ್​ ರೇಟೆಡ್​ ಇಂಡಿಯನ್​ ಬ್ಯಾಟರ್​ ಎನಿಸಿದ್ರು.

2024 ಕರಾಳ ವರ್ಷ.! ಕೊಹ್ಲಿಯ ಕಳಪೆಯಾಟ.!

ಕೊಹ್ಲಿ ಕರಿಯರ್​ನ ಅಸಲಿ ಕರಾಳ ವರ್ಷ 2024.. ಈ ವರ್ಷದಲ್ಲಿ ವಿರಾಟ್​​ ದೇಶ-ವಿದೇಶ ಎರಡೂ ಕಡೆ ವೈಫಲ್ಯ ಅನುಭವಿಸಿದ್ದಾರೆ. 3 ಫಾರ್ಮೆಟ್​​ನಲ್ಲಿ ರನ್​ಗಳಿಸಲು ಪರದಾಡಿದ್ದಾರೆ. ಸೆಂಚುರಿ ಸರದಾರ ಬ್ಯಾಟ್​​ನಿಂದ ಈ ವರ್ಷ ಬಂದಿರೋದು ಒಂದೇ ಒಂದು ಶತಕ ಅಂದ್ರೆ ನೀವು ನಂಬಲೇ ಬೇಕು. ಅಷ್ಟು ಕಳಪೆಯಾಗಿ ಕೊಹ್ಲಿಯ ಆಟ.

2024ರಲ್ಲಿ ಕೊಹ್ಲಿಯ ಕಳಪೆಯಾಟ.!

ಈ ವರ್ಷದಲ್ಲಿ ವಿರಾಟ್​ ಕೊಹ್ಲಿ 3 ಫಾರ್ಮೆಟ್​ ಸೇರಿ ಒಟ್ಟು 30 ಇನ್ನಿಂಗ್ಸ್​ಗಳಲ್ಲಿ ಬ್ಯಾಟ್​ ಬೀಸಿದ್ದಾರೆ. ಕೇವಲ 21.92ರ ಕಳಪೆ ಸರಾಸರಿಯಲ್ಲಿ 614 ರನ್​ಗಳಿಸಿದ್ದಾರೆ. 1 ಶತಕ, 2 ಅರ್ಧಶತಕ ಸಿಡಿಸಿದ್ದಾರಷ್ಟೇ.

ಇದನ್ನೂ ಓದಿ: KL ರಾಹುಲ್​ ಪಾಲಿಗೆ ಬಾಕ್ಸಿಂಗ್ ‘ಡೇ’ ಟೆಸ್ಟ್ ಸ್ಪೆಷಲ್.. ಧೋನಿಯಿಂದ ಇದನ್ನ ಪಡೆದಿದ್ದ ಕನ್ನಡಿಗ

ಸದ್ಯ ನಡೀತಾ ಇರೋ ಬಾರ್ಡರ್​​- ಗವಾಸ್ಕರ್​ ಟೆಸ್ಟ್​ ಸರಣಿಯಲ್ಲೂ ವಿರಾಟ್​ ಕೊಹ್ಲಿಯ ಆಟ ಅಷ್ಟಕಷ್ಟೇ. ಮೊದಲ ಪಂದ್ಯದಲ್ಲಿ ಶತಕ ಸಿಡಿಸಿದ್ದು ಬಿಟ್ರೆ, ಉಳಿದ 2 ಪಂದ್ಯಗಳಲ್ಲಿ ತಿಣುಕಾಟ ನಡೆಸಿದ್ದಾರೆ. ಈ ವೈಫಲ್ಯದ ಪರಿಣಾಮ​​, ಱಂಕಿಂಗ್​ನಲ್ಲಿ ಗಣನೀಯ ಕುಸಿತ ಕಂಡಿದ್ದಾರೆ.

2011ರಿಂದ ಒಂದಿಲ್ಲೊಂದು ಫಾರ್ಮೆಟ್​ನಲ್ಲಿ ಭಾರತದ ಪರ ನಂಬರ್ ಒನ್​​​ ಆಗಿ ಮೆರೆದಾಡಿದ್ದ ವಿರಾಟ್​, 14 ವರ್ಷಗಳ ಬಳಿಕ ಸಿಂಹಾಸನದಿಂದ ಇಳಿದಿದ್ದಾರೆ. ಇದನ್ನ ಕೊಹ್ಲಿ ಎರಾ ಅಂತ್ಯ ಎಂದೇ ವ್ಯಾಖ್ಯಾನಿಸಲಾಗ್ತಿದೆ. 2025ರಲ್ಲಾದ್ರೂ ಕೊಹ್ಲಿ ಹಳೆ ಖದರ್​ಗೆ ಮರಳ್ತಾರಾ.? ಕಾದು ನೋಡಬೇಕಿದೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ