IPL​ ಗೆಲುವಿನೊಂದಿಗೆ ಕಿಂಗ್​ ಕೊಹ್ಲಿ ಅಪರೂಪದ ಸಾಧನೆ.. ವಿರಾಟ್​ ಮುತ್ತಿಟ್ಟ ಟ್ರೋಫಿಗಳು!

ವಿರಾಟ್​ ಕೊಹ್ಲಿ ವಿಶ್ವ ಕ್ರಿಕೆಟ್​ ಲೋಕದ ಸಾಮ್ರಾಟ. ಇದೀಗ ಸಾಮ್ರಾಟ ವಿರಾಟ್​ ಕೊಹ್ಲಿಯ ಕಿರೀಟಕ್ಕೆ ಐಪಿಎಲ್​ನ ಮುಕುಟವೂ ದಕ್ಕಿದೆ. ಈಗ ಕಿಂಗ್ ಕೊಹ್ಲಿ ಎಲ್ಲವನ್ನೂ ಸಾಧಿಸಿದ ಧೀರ. ಪ್ರತಿ ಫಾರ್ಮೆಟ್​​ನಲ್ಲಿ ಅಲ್ಟಿಮೇಟ್​​ ಕಿರೀಟಗಳಿಗೆ ಮುತ್ತಿಕ್ಕಿದ ವೀರ.

ಕಿಂಗ್ ಕೊಹ್ಲಿಯ ಬಹುಕಾಲದ ಕನಸು ಕೊನೆಗೂ ಈಡೇರಿದೆ. ಕಳೆದ 17 ವರ್ಷಗಳು ಮರೀಚಿಕೆಯಾಗಿದ್ದ ಐಪಿಎಲ್ ಟ್ರೋಫಿ ಎತ್ತಿ ಹಿಡಿಯುವಲ್ಲಿ ಸಫಲರಾಗಿದ್ದಾರೆ. ಜೆರ್ಸಿ ನಂಬರ್​ 18ರ ವರ್ಷವೇ ಟ್ರೋಫಿಗೆ ಮುತ್ತಿಟ್ಟಿರುವ ಕಿಂಗ್ ಕೊಹ್ಲಿ ಕಾಡಿದ್ದ ಕೊರಗು, ನೋವು, ಮನದಯಾತನೆಗೆ ಅಂತ್ಯ ಸಿಕ್ಕಿದೆ. ಕ್ರೀಡಾ ಜಗತ್ತಿಗೆ ನಿಷ್ಠೆ, ಬದ್ಧತೆಯ ಪಾಠ ಮಾಡಿದ ಕನ್ನಡಿಗರ ಮನೆಮಗನಿಗೆ ಟ್ರೋಫಿ ಒಲಿಯುವುದರೊಂದಿಗೆ ಅಭಿಮಾನಿಗಳ ಕನಸು ನೆರವೇರಿದೆ.

2025ರ ಐಪಿಎಲ್ ಫೈನಲ್‌ನಲ್ಲಿ ಪಂಜಾಬ್ ಎದುರು ಗೆದ್ದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು, ಬಹು ವರ್ಷಗಳಿಂದ ಕಾಡಿದ್ದ ಟ್ರೋಫಿ ಕೊರಗಿನ ಬರ ನೀಗಿಸಿಕೊಂಡಿದೆ. ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಕೊರಗು ಮಾತ್ರವಲ್ಲ. ವಿರಾಟ್​ ಕೊಹ್ಲಿ ಸತತ 18 ವರ್ಷಗಳಿಂದ ಪಟ್ಟಿದ್ದ ಕಠಿಣ ಶ್ರಮಕ್ಕೆ ಕೊನೆಗೂ ಪ್ರತಿಫಲ ಸಿಕ್ಕಿದೆ.

ಇದು ತಂಡಕ್ಕೆ ದಕ್ಕಿದ ಗೆಲುವಷ್ಟೇ ಅಲ್ಲ. ಆರ್‌ಸಿಬಿ ಅಭಿಮಾನಿಗಳ ಜಯ. ಇದು 18 ವರ್ಷಗಳ ಕಾಯುವಿಕೆ. ಈ ಅವಧಿಯಲ್ಲಿ ನನ್ನ ಯೌವನ, ಮೇರು ಮಟ್ಟದ ಆಟ, ಅನುಭವ ಧಾರೆ ಎರೆದಿದ್ದೇನೆ. ಪ್ರತಿ ವರ್ಷ ಗೆಲುವಿಗೆ ನನ್ನಿಂದ ಏನೆಲ್ಲಾ ಸಾಧ್ಯವೊ ಎಲ್ಲವನ್ನೂ ಕೊಟ್ಟಿದ್ದೇನೆ. ಕೊನೆಗೂ ಗೆದ್ದಿರುವುದು ನಂಬಲ ಸಾಧ್ಯವಾದ ಅನುಭವ. ಇಂಥ ಸುದಿನವನ್ನ ನಿರೀಕ್ಷಿಸಿರಲಿಲ್ಲ.

ವಿರಾಟ್​ ಕೊಹ್ಲಿ, ಆರ್​ಸಿಬಿ ಸ್ಟಾರ್ ಪ್ಲೇಯರ್

ವಿರಾಟ್ ಒಂದಲ್ಲ.. ಎರಡಲ್ಲ.. ಬರೋಬ್ಬರಿ 18 ವರ್ಷಗಳ ಕಾಲ ಆರ್​ಸಿಬಿಗಾಗಿ ಆಡಿದ್ರು. ಪ್ರತಿ ಸೀಸನ್​ನಲ್ಲಿ ಟ್ರೋಫಿ ಗೆಲುವಿಗಾಗಿಯೇ ಹೋರಾಡಿದವರು. ಆದ್ರೀಗ ಆ ಹೋರಾಟದಲ್ಲಿ ಕೊನೆಗೂ ಗೆದ್ದ ವಿರಾಟ್, ಐಪಿಎಲ್ ಟ್ರೋಫಿ ಗೆಲುವಿನೊಂದಿಗೆ ವಿಶೇಷ ಸಾಧನೆಯನ್ನು ಮಾಡಿದ್ದಾರೆ. ಅಷ್ಟೇ ಅಲ್ಲ, ವಿಶ್ವ ಕ್ರಿಕೆಟ್​ನಲ್ಲಿ ಯಾರೂ ಮಾಡದ ವಿಶೇಷ ಸಾಧನೆಯನ್ನು ಮಾಡಿದ್ದಾರೆ.

ವಿಶ್ವ ಕ್ರಿಕೆಟ್​ನ ವಿಕ್ರಮಾಧಿತ್ಯ ವಿರಾಟ್ ಕೊಹ್ಲಿ..!

ವಿಶ್ವ ಕ್ರಿಕೆಟ್​ನಲ್ಲಿ ಲೆಜೆಂಡರಿ ಆಟಗಾರರನ್ನೇ ಕಂಡಿದ್ದೇವೆ. ಐಸಿಸಿ ಟ್ರೋಫಿಗಳನ್ನು ಗೆದ್ದು ಲೆಜೆಂಡ್ಸ್​ ಎನಿಸಿಕೊಂಡವರಿದ್ದಾರೆ. ಟನ್ ಗಟ್ಟಲೆ ರನ್ಸ್​ ಹೊಡೆದು ಶ್ರೇಷ್ಠರಾದವರು ಇದ್ದಾರೆ. ಆದ್ರೆ, ಈ ಎರಡರ ಜೊತೆ ಜೊತೆಗೆ ಎಲ್ಲವನ್ನು ಗೆದ್ದವರ ವಿರಾಟ್ ಕೊಹ್ಲಿ. ಇದಕ್ಕೆ ಸಾಕ್ಷಿಯೇ ಅಂಡರ್​-19 ವಿಶ್ವಕಪ್ ಗೆಲುವಿನಿಂದ ಹಿಡಿದು ಐಪಿಎಲ್ ಟ್ರೋಫಿ ವರೆಗೆ ಗೆದ್ದ ಟ್ರೋಫಿಗಳು.. ಕೊಹ್ಲಿ ಧಕ್ಕಿದ ಮುಕುಟಗಳು.

ವಿಕ್ರಮಾಧಿತ್ಯ ಕೊಹ್ಲಿ..!

• ಕೊಹ್ಲಿ ಸಾರಥ್ಯದಲ್ಲಿ 2008ರ ಅಂಡರ್​-19 ಏಕದಿನ ವಿಶ್ವಕಪ್​ ಗೆಲುವು
• ಆಟಗಾರನಾಗಿ 2011ರ ಏಕದಿನ ವಿಶ್ವಕಪ್ ಟೂರ್ನಿಯಲ್ಲಿ ಜಯಭೇರಿ
• ಟೆಸ್ಟ್​ ನಾಯಕನಾಗಿ 2017ರಿಂದ 2021ರ ತನಕ ಟೆಸ್ಟ್ ಚಾಂಪಿಯನ್ ಪಟ್ಟ
• 2024ರಲ್ಲಿ ಟಿ20 ವಿಶ್ವಕಪ್​ನಲ್ಲಿ ಟೀಮ್ ಇಂಡಿಯಾ​ ಚಾಂಪಿಯನ್
• ಆಟಗಾರನಾಗಿ 2025ರಲ್ಲಿ ಐಸಿಸಿ ಚಾಂಪಿಯನ್ಸ್ ಟ್ರೋಫಿಯ ಗರಿ

ಇದನ್ನೂ ಓದಿ: IPLನಲ್ಲಿ ಅಟ್ಟರ್​​ಫ್ಲಾಪ್​​​.. ಮಹತ್ವದ ಟೂರ್ನಿಯಲ್ಲಿ ವೈಫಲ್ಯ ಅನುಭವಿಸಿದ್ರೆ ವಿಕೆಟ್​ ಕೀಪರ್​ಗೆ ಗೇಟ್​ ಪಾಸ್?​

ಈ ಎಲ್ಲಾ ಟ್ರೋಫಿಗಳಿಗೆ ಮುತ್ತಿಟ್ಟಿರುವ ವಿರಾಟ್​, ಐಪಿಎಲ್ ಟ್ರೋಫಿಯ ಗೆಲುವಿನೊಂದಿಗೆ ತಾನಾಡಿದ ಎಲ್ಲವನ್ನು ಪಡೆದ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಆ ಮೂಲಕ ವಿಶ್ವ ಕ್ರಿಕೆಟ್​ನಲ್ಲಿ ಯಾವ ಆಟಗಾರನೂ ಮಾಡದ ಸಾಧನೆ ಮಾಡಿರುವ ವಿರಾಟ್​​​​​​​​​​​​​​​​​​​​​​​​​, ನಿಜಕ್ಕೂ ವಿಶ್ವ ಕ್ರಿಕೆಟ್​ನ ಒನ್ ಆ್ಯಂಡ್ ಒನ್ಲಿ ಮಾಸ್ಟರ್ ಪೀಸ್​ ಅಲ್ಲದೆ ಮತ್ತೇನು.. ನೀವೇ ಹೇಳಿ..?

ಏಕದಿನ, ಟೆಸ್ಟ್, ಟಿ20 ಎಲ್ಲಕ್ಕೂ ಸೈ ಎಂದಿದ್ದ ವಿರಾಟ್​​ಗೆ, ಐಪಿಎಲ್​ ಎಂಬ ಮಿಲಿಯನ್ ಡಾಲರ್ ಟೂರ್ನಿಯ ಟ್ರೋಫಿ ಸಿಗಲಿಲ್ಲ ಎಂಬ ಕೊರಗು ಕಾಡಿತ್ತು. ಆದ್ರೀಗ ಆ ಕೊರಗು ನೀಗಿಸಿಕೊಂಡಿರುವ ವಿರಾಟ್, ತನ್ನ ಕ್ರಿಕೆಟ್​ ವೃತ್ತಿ ಜೀವನದಲ್ಲಿ ಈಗ ಎಲ್ಲವನ್ನು ಪಡೆದ ಆಟಗಾರನಾಗಿ ನಿಂತಿರುವುದು ಕಠಿಣ ಪರಿಶ್ರಮ ಹಾಗೂ ಬದ್ಧತೆಗೆ ಸಿಕ್ಕಿರುವ ಪ್ರತಿಫಲವೇ ಆಗಿದೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.30ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ