19 ವರ್ಷದ ಸಚಿನ್ ತೆಂಡೂಲ್ಕರ್ ದಾಖಲೆಯ ಮೇಲೆ ವಿರಾಟ್ ಕಣ್ಣು; ಈ ಸಿರೀಸ್​ನಲ್ಲಿ ಬ್ರೇಕ್ ಆಗುತ್ತಾ ರೆಕಾರ್ಡ್?

ಸಚಿನ್ ತೆಂಡೂಲ್ಕರ್ ಅಂದ್ರೆ ದಾಖಲೆಗಳಿಗೆ ಮತ್ತೊಂದು ಹೆಸರು. ಕ್ರಿಕೆಟ್ ಜಗತ್ತಿನಲ್ಲಿ ಹಲವು ಮೈಲಿಗಲ್ಲುಗಳನ್ನು ನೆಟ್ಟು ಕ್ರಿಕೆಟ್ ಅಂಗಳ ತೊರೆದು ಹೋದ ದಿಗ್ಗಜ ಆಟಗಾರ ಸಚಿನ್. ಅವರ ಹಿಂದೆಯೇ ಅಂತಹುದೇ ಒಂದು ದಾಖಲೆಗಳ ಸರದಾರನಾಗಿ ಕ್ರಿಕೆಟ್ ಪ್ರಪಂಚದಲ್ಲಿ ಗುರುತಿಸಿಕೊಂಡಿದ್ದು ವಿರಾಟ್ ಕೊಹ್ಲಿ. ಸಚಿನ್​ರಂತಹುದೇ ಸಿಡಿಲಬ್ಬರದ ಬ್ಯಾಟಿಂಗ್​. ಸಚಿನ್ ದಾಖಲೆಗಳನ್ನು ಮುರಿಯಬಲ್ಲ ಶಕ್ತಿ ಇರುವುದು ಇವರೊಬ್ಬರಿಗೆ ಎಂದು ಜಗತ್ತು ಈ ಹಿಂದೆಯೇ ಭವಿಷ್ಯ ನುಡಿದಿತ್ತು. ಅಂದಿನ ಮಾತುಗಳು ಒಂದೊಂದೇ ನಿಜ ಮಾಡುತ್ತಾ ಬಂದಿದ್ದಾರೆ ವಿರಾಟ್​​. ಈಗ ಸಚಿನ್ ತೆಂಡೂಲ್ಕರ್ ಅವರ ಮತ್ತೊಂದು ದಾಖಲೆಯ ಮುರಿಯುವ ಉತ್ಸಾಹದಲ್ಲಿ ವಿರಾಟ್ ಕೊಹ್ಲಿ ಇದ್ದಾರೆ. 36 ವರ್ಷದ ಈ ಕ್ರಿಕೆಟರ್ ಸಚಿನ್ ಅತ್ಯಂತ ವೇಗವಾಗಿ 14 ಸಾವಿರ ರನ್ ಕಲೆ ಹಾಕಿದ ದಾಖಲೆಯನ್ನು ಪುಡಿಗಟ್ಟಲು ಕಾಯುತ್ತಿದ್ದಾರೆ.

2006ರಲ್ಲಿ ಪಾಕಿಸ್ತಾನದ ವಿರುದ್ಧದ ಪಂದ್ಯದಲ್ಲಿ 100 ರನ್ ಹೊಡೆಯುವುದರ ಮೂಲಕ ಸಚಿನ್ ಅತ್ಯಂತ ವೇಗವಾಗಿ ಏಕದಿನ ಪಂದ್ಯದಲ್ಲಿ 14 ಸಾವಿರ ರನ್ ಕಲೆ ಹಾಕಿದ ವಿಶ್ವದ ಏಕೈಕ ಬ್ಯಾಟರ್ ಎಂಬ ಖ್ಯಾತಿಯನ್ನು ಪಡೆದಿದ್ದರು. 350 ಇನ್ನಿಂಗ್ಸ್​ನಲ್ಲಿ ಇಷ್ಟೊಂದು ರನ್ ಗಳಿಸಿದ್ದರು ಸಚಿನ್.

ಇದನ್ನೂ ಓದಿ: ಅಭಿಷೇಕ್ ಶರ್ಮಾ ಲೈಫಲ್ಲಿ ಹೊಸ ಹುಡುಗಿ ಎಂಟ್ರಿ.. ಯಾರಿವಳು ಸುಂದರಿ..?

ಈಗ ಕೊಹ್ಲಿ 283 ಇನ್ನಿಂಗ್ಸ್​ಗಳಲ್ಲಿ ಸುಮಾರು 13,906 ರನ್ ಕಲೆ ಹಾಕಿದ್ದಾರೆ. ಸಚಿನ್ ದಾಖಲೆ ಸರಿಗಟ್ಟಲು ಅವರಿಗೆ ಬೇಕಾಗಿದ್ದು ಕೇವಲ 94 ರನ್. 283 ಏಕದಿನ ಪಂದ್ಯಗಳಲ್ಲಿ 93.54 ಸ್ಟ್ರೈಕ್​ರೇಟ್​ನಲ್ಲಿ 58.18 ಸರಾರಸರಿಯಲ್ಲಿ ಇಷ್ಟು ರನ್ ಕಲೆ ಹಾಕಿರುವ ಕೊಹ್ಲಿ ಎದುರು ಈಗ ಇಂಗ್ಲೆಂಡ್ ವಿರುದ್ಧ 3 ಏಕ ದಿನ ಪಂದ್ಯಗಳನ್ನಾಡುವ ಅವಕಾಶವಿದೆ. ಈ ಮೂರು ಪಂದ್ಯಗಳಲ್ಲಿ ಸಚಿನ್ ದಾಖಲೆ ಪುಡಿಗಟ್ಟುತ್ತಾರಾ ಎಂಬ ಆಸೆ ಮತ್ತು ಕುತೂಹಲ ಅವರ ಅಭಿಮಾನಿಗಳಲ್ಲಿದೆ.

ಆದ್ರೆ ಕಳೆದ ಕೆಲವು ತಿಂಗಳುಗಳಿಂದ ಕೊಹ್ಲಿ ಫಾರ್ಮ್​ನಲ್ಲಿಲ್ಲ. ಅವರ ಆಟದ ಲಯ ಮೊದಲಿನಂತಿಲ್ಲ. ಟೆಸ್ಟ್ ಹಾಗೂ ಏಕದಿನ ಪಂದ್ಯಗಳಲ್ಲಿ ಪದೇ ಪದೇ ವಿಫಲರಾಗುತ್ತಿದ್ದಾರೆ. ಈ ಹಿಂದೆ ಶ್ರೀಲಂಕಾದೊಂದಿಗೆ ಆಡಿದ ಮೂರು ಏಕದಿನ ಪಂದ್ಯಗಳಲ್ಲಿ ಕೊಹ್ಲಿ ಗಳಿಸಿದ್ದು ಕೇವಲ 58 ರನ್​ಗಳು. 24,14 ಮತ್ತು 20 ರನ್​​ಗಳನ್ನಷ್ಟೇ ಗಳಿಸಲು ಶಕ್ತರಾದರು. ವಿಶ್ವಕಪ್ ಫೈನಲ್ ಬಳಿಕ ಕೊಹ್ಲಿ ಆಡಿದ್ದು ಕೇವಲ ಮೂರೇ ಮೂರು ಏಕದಿನ ಪಂದ್ಯಗಳು.

ಇದನ್ನೂ ಓದಿ: ಟೀಮ್​ ಇಂಡಿಯಾದಿಂದಲೇ ಹೊರಬಿದ್ದ ಸ್ಟಾರ್​ ವೇಗಿ ಬುಮ್ರಾ; ಅಸಲಿಗೆ ಆಗಿದ್ದೇನು?

ಕೊಹ್ಲಿ ಫಾರ್ಮ್​​ನಲ್ಲಿಲ್ಲಾ ಅನ್ನೋದು ಒಂದು ಕೊರಗು ಅಲ್ಲವೇ ಅಲ್ಲ. ಫಿನಿಕ್ಸ್​​ನಂತೆ ಎದ್ದು ಬರಬಲ್ಲ ಛಲ ಮತ್ತು ಬಲ ಎರಡು ಅವರಲ್ಲಿದೆ. ಈ ಹಿಂದೆ ಫಾರ್ಮ್ ಕಳೆದು ಹೋಗಿದೆ ಎಂದಾಗಲೇ ಆಸ್ಟ್ರೇಲಿಯಾ ವಿರುದ್ಧದ ಟೆಸ್ಟ್​ ಪಂದ್ಯದಲ್ಲಿ ಪರ್ತ್​​ನಲ್ಲಿ ಶತಕ ಗಳಿಸಿ ಎಲ್ಲರನ್ನೂ ಅಚ್ಚರಿಗೆ ತಳ್ಳಿದ್ದರು. ಅದೇ ರೀತಿ ಈ ಸಿರೀಸ್​ನಲ್ಲೂ ಕೂಡ ಕೊಹ್ಲಿ ಮರಳಿ ಫಾರ್ಮ್​ಗೆ ಬಂದಲ್ಲಿ ಕ್ರಿಕೆಟ್ ಜಗತ್ತಿನ ದೇವರು ಎಂದು ಕರೆಸಿಕೊಂಡಿರುವ ಸಚಿನ್ ಅವರ ದಾಖಲೆ ಮುರಿಯುವುದರಲ್ಲಿ ಯಾವುದೇ ಅನುಮಾನವಿಲ್ಲ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ