T20ಯಲ್ಲಿ ಈಗಲೂ ಕಿಂಗ್ ಕೊಹ್ಲಿಯೇ ನಂ.1.. ಗುಡ್​ಬೈ ಹೇಳಿದರೂ ಟಾಪ್​​ನಲ್ಲಿರೋ ವಿರಾಟ್​.!

ಟೆಸ್ಟ್​ ಹಾಗೂ ಟಿ20 ಫಾರ್ಮೆಟ್​​ಗೆ ವಿರಾಟ್​​ ಕೊಹ್ಲಿ ಗುಡ್​ ಬೈ ಹೇಳಿದ್ದಾಯ್ತು. ಕ್ರಿಕೆಟ್ ಸಾಮ್ರಾಜ್ಯವನ್ನ ದಶಕಕ್ಕೂ ಕಾಲ ಆಳಿದ ಕೊಹ್ಲಿ ಇದೀಗ ಏಕದಿನ ಫಾರ್ಮೆಟ್​ಗೆ ಮಾತ್ರ ಸೀಮಿತವಾಗಿದ್ದಾರೆ. ಸಾಕಾಯ್ತು ಎಂದು ಹೇಳಿ ಸ್ವತಃ ಕೊಹ್ಲಿಯೇ ಸಿಂಹಾಸನವನ್ನ ತ್ಯಜಿಸಿ ತಿಂಗಳುಗಳೇ ಕಳೆದಿವೆ. ಆದ್ರೆ, ಕ್ರಿಕೆಟ್​ ಲೋಕ ಮಾತ್ರ, ಕೊಹ್ಲಿಯೇ ಕಿಂಗ್​ ಎಂದು ಮತ್ತೆ ಮತ್ತೆ ಹೇಳ್ತಿದೆ. ​​

ಕ್ರಿಕೆಟ್​ ದುನಿಯಾದಲ್ಲಿ ಹಲವು ತರದ ಬ್ಯಾಟ್ಸ್​​​ಮನ್​ಗಳಿರ್ತಾರೆ. ಕೆಲವ್ರು ತವರಿನಲ್ಲಿ ಮಾತ್ರ ಹುಲಿಗಳು. ತಮ್ಮ ದೇಶದಲ್ಲಿ ಮಾತ್ರ ಅಬ್ಬರಿಸ್ತಾರೆ. ವಿದೇಶದಲ್ಲಿ ಮಕಾಡೆ ಮಲಗ್ತಾರೆ. ಇನ್ನು, ಕೆಲವರು ಬ್ಯಾಟಿಂಗ್​ಗೆ ಅನುಕೂಲವಾಗೋ ಫ್ಲಾಟ್​ ಟ್ರ್ಯಾಕ್​ಗಳಲ್ಲಿ ಮಾತ್ರ ಆರ್ಭಟಿಸ್ತಾರೆ. ಇನ್ನು ಕೆಲವ್ರ ಅಬ್ಬರ ಕೆಲವೇ ಫಾರ್ಮೆಟ್​ಗೆ ಮಾತ್ರ ಸೀಮಿತ. ಆದ್ರೆ, ದೇಶ, ವಿದೇಶ, ಫ್ಲ್ಯಾಟ್​ ಟ್ರ್ಯಾಕ್​, ಗ್ರೀನ್​ ಟ್ರ್ಯಾಕ್​, ಬೌನ್ಸಿ ಟ್ರ್ಯಾಕ್​, ಜಾಗ ಯಾವುದೇ ಇರಲಿ, ಎದುರಾಳಿ ಯಾರೇ ಇರಲಿ ಘರ್ಜಿಸೋ ಸಿಂಗಲ್​ ಶೇರ್​​ ಕೆಲವ್ರು ಮಾತ್ರ. ಅವರಿಗೆ ಕ್ರಿಕೆಟ್​ ಬೇಡ ಅಂದ್ರೂ, ಕ್ರಿಕೆಟ್​ ಅವರನ್ನ ಬಿಟ್ಟು ಕೊಡಲ್ಲ. ಅಂಥ ಕೆಲವೇ ಕೆಲವು ಡಾನ್​ಗಳ ಪೈಕಿ ಒಬ್ಬ ಕಿಂಗ್​ ಕೊಹ್ಲಿ.

T20Iನಲ್ಲಿ ಹೊಸ ದಾಖಲೆ ಬರೆದ ವಿರಾಟ್​​.!

2024ರಲ್ಲಿ ಟಿ20 ವಿಶ್ವಕಪ್​ ಗೆದ್ದ ಬೆನ್ನಲ್ಲೇ ಶಾಕ್​ ಕೊಟ್ಟ ಕೊಹ್ಲಿ ಚುಟುಕು ಫಾರ್ಮೆಟ್​ಗೆ ಗುಡ್​ ಬೈ ಹೇಳಿದ್ರು. ಕೊಹ್ಲಿ ಅಂತರಾಷ್ಟ್ರೀಯ ಟಿ20 ಕ್ರಿಕೆಟ್​​ಗೆ ಗುಡ್​ ಬೈ ಹೇಳಿ ವರ್ಷವೇ ಆಯ್ತು. ಇದೀಗ ಹೊಸ ಅಪ್​​ಡೇಟ್​​ ಹೊರಬಿದ್ದಿದ್ದು, ಕೊಹ್ಲಿ ಹೊಸ ದಾಖಲೆ ಬರೆದಿದ್ದಾರೆ. ಐಸಿಸಿ 2024ರ ಅಪ್​ಡೇಟೆಡ್ ಱಂಕಿಂಗ್​ ಪಟ್ಟಿಯನ್ನ ರಿಲೀಸ್​ ಮಾಡಿದೆ. ಇದರಲ್ಲಿ 909ರ ರೇಟಿಂಗ್​ನೊಂದಿಗೆ ವಿರಾಟ್​ ಟಿ20 ಫಾರ್ಮೆಟ್​ನಲ್ಲಿ ಕರಿಯರ್​​ನ ಬೆಸ್ಟ್​ ರೇಟಿಂಗ್ಸ್​ ಸಂಪಾದಿಸಿದ್ದಾರೆ.

ಸುದೀರ್ಘ ಕಾಲ T20 ಫಾರ್ಮೆಟ್​​ಗೆ ಕೊಹ್ಲಿಯೇ ರಾಜ.!

ಈವರೆಗೆ ಟಿ20 ಫಾರ್ಮೆಟ್​ನಲ್ಲಿ ಕೊಹ್ಲಿಯ ಹೈಯೆಸ್ಟ್​ ರೇಟಿಂಗ್ಸ್​​ 897 ಇತ್ತು. ಇದೀಗ 909ಕ್ಕೆ ಏರಿಕೆಯಾಗಿದೆ. ಇಷ್ಟೇ ಅಲ್ಲ, ಇದ್ರೊಂದಿಗೆ ಟಿ20 ಫಾರ್ಮೆಟ್​ನಲ್ಲಿ ಕೊಹ್ಲಿ ಸತತ 1202 ದಿನಗಳ ಕಾಲ ನಂಬರ್ ಒನ್​​​​ ಸ್ಥಾನದಲ್ಲಿ ಮೆರೆದಾಡಿದ ಬ್ಯಾಟ್ಸ್​ಮನ್​ ಎನಿಸಿದ್ದಾರೆ. ಕೊಹ್ಲಿಯಷ್ಟು ಸುದೀರ್ಘ ಕಾಲ ನಂಬರ್​ 1 ಸ್ಥಾನವನ್ನ ಆಳಿದ ಮತ್ತೊಬ್ಬ ಬ್ಯಾಟ್ಸ್​ಮನ್​ ಇಲ್ಲ.

ಟೆಸ್ಟ್​, ಏಕದಿನ, ಟಿ20.. ಕೊಹ್ಲಿ ರಿಯಲ್​ ಕಿಂಗ್​.!

ಟಿ20 ಫಾರ್ಮೆಟ್​​ನಲ್ಲಿ 900ಕ್ಕೂ ಅಧಿಕ ರೇಟಿಂಗ್​ ಸಂಪಾದಿಸಿದ ಕೊಹ್ಲಿ, ಕ್ರಿಕೆಟ್​ ಜಗತ್ತಿಗೆ ನಾನೇ ಕಿಂಗ್​ ಅನ್ನೋದನ್ನ ಮತ್ತೊಮ್ಮೆ ಸಾಬೀತು ಪಡಿಸಿದ್ದಾರೆ. ಟೆಸ್ಟ್​, ಏಕದಿನ, ಟಿ20 ಮೂರೂ ಫಾರ್ಮೆಟ್​​ನಲ್ಲಿ 900ಕ್ಕೂ ಅಧಿಕ ರೇಟಿಂಗ್ಸ್​ ಹೊಂದಿದ ಏಕೈಕ ಬ್ಯಾಟ್ಸ್​​ಮನ್​ ಆಗಿ ವಿರಾಟ್​ ಕೊಹ್ಲಿ ಹೊರಹೊಮ್ಮಿದ್ದಾರೆ. ಸಚಿನ್ ತೆಂಡುಲ್ಕರ್​, ವಿವ್​ ರಿಚರ್ಡ್ಸ್​ ಸೇರಿದಂತೆ​ ಯಾವ ದಿಗ್ಗಜನೂ ಮಾಡದ ಸಾಧನೆಯನ್ನ ಕೊಹ್ಲಿ ಮಾಡಿದ್ದಾರೆ.

ಕ್ರಿಕೆಟ್​ಗೆ ಕೊಹ್ಲಿ ರಾಜ.. ಆಲ್​​ಫಾರ್ಮೆಟ್​ ಗ್ರೇಟ್​.!

ಇದೀಗ ಟಿ20 ಫಾರ್ಮೆಟ್​ನಲ್ಲಿ ಕೊಹ್ಲಿಯ ಕರಿಯರ್​​ನ ಬೆಸ್ಟ್​ ರೇಟಿಂಗ್ಸ್​ 909 ಆಗಿದ್ರೆ, ಟೆಸ್ಟ್​ ಫಾರ್ಮೆಟ್​​ನ ಬೆಸ್ಟ್​ ರೇಟಿಂಗ್ಸ್​​ 937 ಆಗಿದೆ. ಇನ್ನು, ಏಕದಿನ ಫಾರ್ಮೆಟ್​ನಲ್ಲೂ 909 ರೇಟಿಂಗ್​ ಹೊಂದಿದ್ದು ಕರಿಯರ್​ನ ಬೆಸ್ಟ್​ ರೇಟಿಂಗ್​ ಪಾಯಿಂಟ್ಸ್​ ಆಗಿದೆ. ದಿಗ್ಗಜ ಸಚಿನ್​ ತೆಂಡುಲ್ಕರ್​​ಗೂ ಒಂದೇ ಒಂದು ಫಾರ್ಮೆಟ್​​ನಲ್ಲಿ ಕೂಡ 900+ ರೇಟಿಂಗ್​ ಹೊಂದಿರೋಕೆ ಸಾಧ್ಯವಾಗಿರಲಿಲ್ಲ. ಕೊಹ್ಲಿಯನ್ನ ಆಲ್​​ ಫಾರ್ಮೆಟ್​​ನ ಗ್ರೇಟೆಸ್ಟ್​ ಪ್ಲೇಯರ್​ ಅನ್ನೋದಕ್ಕೆ ಎಲ್ಲಾ ಫಾರ್ಮೆಟ್​ನಲ್ಲಿ ಮಾಡಿರೋ ಈ ಸಾಧನೆ ಸಾಕಲ್ವಾ.?

ಮೂರು ಫಾರ್ಮೆಟ್​​ನಲ್ಲಿ ನಂಬರ್ ಒನ್​​​ ಆಗಿ ಮರೆದಾಟ

2018ರಲ್ಲಿ ಕೊಹ್ಲಿ ಪೀಕ್​ ಫಾರ್ಮ್​ನಲ್ಲಿದ್ರು. ಆಗ ಮೂರೂ ಫಾರ್ಮೆಟ್​ನಲ್ಲಿ ಕೊಹ್ಲಿ ಅಕ್ಷರಶಃ ದರ್ಬಾರ್​ ನಡೆಸಿದ್ರು. ಎದುರಾಳಿಗಳ ಎದೆಯಲ್ಲಿ ನಡುಕ ಹುಟ್ಟಿಸಿದ್ದ ರನ್​ಮಷೀನ್​ ಕೊಹ್ಲಿ, ಸುಲಭಕ್ಕೆ ರನ್​ ಭೇಟೆಯಾಡ್ತಿದ್ರು. ಏಕದಿನ, ಟೆಸ್ಟ್​, ಟಿ20 ಏಕ ಕಾಲಕ್ಕೆ ಮೂರು ಮಾದರಿಯ ನಂಬರ್​ 1 ಬ್ಯಾಟ್ಸ್​ಮನ್​ ಆಗಿ ಮರೆದಾಡಿದ್ರು. ಕ್ರಿಕೆಟ್​​ನ ಕಿಂಗ್​ ಅನ್ನೋದಕ್ಕೆ ಇನ್ನು ಏನಾದ್ರೂ ಬೇಕಾ.?

ಇದನ್ನೂ ಓದಿ:ನಾಗರ ಪಂಚಮಿ ವಿಶೇಷ.. ಈ ಪ್ರದೇಶದಲ್ಲಿ ಜೀವಂತ ನಾಗರ ಹಾವುಗಳನ್ನು ಹಿಡಿದು ಏನ್ ಮಾಡ್ತಾರೆ ಗೊತ್ತಾ?

ಟಿ20 ಹಾಗೂ ಏಕದಿನದಲ್ಲಿ ಅತಿ ಹೆಚ್ಚು ರನ್​ಗಳಿಸಿದ ಆಟಗಾರರ ಪಟ್ಟಿಯಲ್ಲಿ ಕೊಹ್ಲಿ ನಂಬರ್​​ 3 ಸ್ಥಾನದಲ್ಲಿದ್ದಾರೆ. ಆದ್ರೆ, ಟೆಸ್ಟ್​ ಫಾರ್ಮೆಟ್​ನಲ್ಲಿ 10 ಸಾವಿರ ರನ್​ಗಳಿಸೋಕೆ ಮುನ್ನವೇ ರಿಟೈರ್​​ ಆಗಿದ್ದಾರೆ. ಆದ್ರೆ, ಆಡಿದ ಅಷ್ಟರೊಳಗೆ ದೊಡ್ಡ ಸಾಧನೆಯನ್ನೇ ಮಾಡಿದ್ದಾರೆ. ಐಸಿಸಿ ಪ್ರಕಟಿಸಿದ ದಶಕದ ಟೆಸ್ಟ್​ ತಂಡಕ್ಕೆ ಕೊಹ್ಲಿಯೇ ಕ್ಯಾಪ್ಟನ್​ ಆಗಿದ್ರು. ದಶಕದ ಏಕದಿನ ತಂಡ, T20 ಟೀಮ್​ನಲ್ಲಿ ಸ್ಥಾನ ಪಡೆದಿದ್ರು. ಕನ್ಸಿಸ್ಟೆಂಟ್​ ಪರ್ಫಾಮೆನ್ಸ್​ನಿಂದ ಐಸಿಸಿ ನೀಡೋ ದಶಕದ ಕ್ರಿಕೆಟಿಗ ಅನ್ನೋ ಶ್ರೇಷ್ಠ ಗೌರವವನ್ನೂ ವಿರಾಟ್​ ಕೊಹ್ಲಿ ತನ್ನದಾಗಿಸಿಕೊಂಡಿದ್ರು.

ಕ್ರಿಕೆಟ್​​ನಿಂದ ದೂರಾಗಲು ನಿರ್ಧರಿಸಿ ವಿರಾಟ್​ ಕೊಹ್ಲಿ ನಿವೃತ್ತಿ ಘೋಷಿಸಿದ್ರೂ, ಕೊಹ್ಲಿ ದಾಖಲೆಯ ಓಟ ಮಾತ್ರ ನಿಂತಿಲ್ಲ. ಕೆಲ ದಿನಗಳ ಹಿಂದಷ್ಟೆ ನ್ಯೂಜಿಲೆಂಡ್​ನ ಕೇನ್​ ವಿಲಿಯಮ್​​ಸನ್​ ಕೊಹ್ಲಿ ಗ್ರೆಟೆಸ್ಟ್​ ಆಲ್​​ ಫಾರ್ಮೆಟ್​​​ ಪ್ಲೇಯರ್​ ಎಂದು ಹೇಳಿದರು. ಮಾಡಿದ ಸಾಧನೆ, ದಾಖಲೆಗಳೇ ಇದು ಸಾರ್ವಕಾಲಿಕ ಸತ್ಯ ಎಂದು ಹೇಳ್ತಿವೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.30ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ