ವಿರಾಟ್​ ಕೊಹ್ಲಿ vs ಸ್ಟೀವ್​ ಸ್ಮಿತ್, ಮ್ಯಾಚ್​​ ವಿನ್ನರ್ಸ್ ಯಾರು.. ಈ ಇಬ್ಬರ ಬ್ಯಾಟಿಂಗ್ ಹಿಸ್ಟರಿ ಹೇಗಿದೆ?

ಇಂಡೋ-ಆಸಿಸ್​​ ಬ್ಯಾಟಲ್​ಗೂ ಮುನ್ನ ಕಿಂಗ್​ ಕೊಹ್ಲಿ VS ಸ್ಟೀವ್​ ಸ್ಮಿತ್​ ಬಗ್ಗೆ ಚರ್ಚೆ ಜೋರಾಗಿದೆ. ಇವರಿಬ್ಬರ ಆಟವೇ ಸರಣಿಯ ಸೋಲು ಗೆಲುವನ್ನ ನಿರ್ಧರಿಸಲಿದೆ ಅನ್ನೋ ಮಾತುಗಳು ಕೇಳಿ ಬರುತ್ತಿವೆ. ಹೈವೋಲ್ಟೆಜ್​ ಸರಣಿಯ ರಿಸಲ್ಟ್​​ ಈ ದಿಗ್ಗಜರ ಮೇಲೆ ಡಿಪೆಂಡ್​ ಆಗಿರೋದ್ಯಾಕೆ?.

ಇಂಡೋ-ಆಸಿಸ್​​​ ಹೈವೋಲ್ಟೆಜ್​ ಟೆಸ್ಟ್​ ಸೀರಿಸ್​ ಆರಂಭಕ್ಕೆ ಇನ್ನೊಂದು ದಿನ ಕಳೆಯಬೇಕಷ್ಟೇ. ಪರ್ತ್​​ನ ಬ್ಯಾಟಲ್​ಫೀಲ್ಡ್​ನಲ್ಲಿ ಮೊದಲ ಪಂದ್ಯ ನಡೆಯಲಿದ್ದು, ಮದಗಜಗಳ ಮುಖಾಮುಖಿಗೆ ವೇದಿಕೆ ಸಜ್ಜಾಗಿದೆ. 5 ಪಂದ್ಯಗಳ ಪ್ರತಿಷ್ಟೆಯ ಸರಣಿ ಗೆಲುವಿಗೆ ಉಭಯ ತಂಡಗಳು ಪಣತೊಟ್ಟಿವೆ. ಗೆಲುವು ಇಲ್ಲಿ ಎರಡೂ ತಂಡಗಳ ಟಾರ್ಗೆಟ್​.

ಇದನ್ನೂ ಓದಿ: ಟೀಮ್ ಇಂಡಿಯಾಕ್ಕೆ ಗಾಯದ ಸಮಸ್ಯೆ.. ಮೊದಲ ಟೆಸ್ಟ್​ನಿಂದ ಸ್ಟಾರ್ ಬ್ಯಾಟರ್ ಔಟ್​, ಗಿಲ್​​ಗೆ ಏನಾಯಿತು?

ಇಬ್ಬರ ಮೇಲೆ ನಿಂತಿದೆ ಸೋಲು-ಗೆಲುವಿನ ಭವಿಷ್ಯ.!

ಕ್ರಿಕೆಟ್​ ಲೋಕದ ಹೈಫ್ರೋಫೈಲ್​ ತಂಡಗಳ ಸರಣಿಗೂ ಮುನ್ನ ಪ್ರಿಡಿಕ್ಷನ್​ಗಳ ಭರಾಟೆ ಜೋರಾಗಿದೆ. ಕೆಲವ್ರು ಆಸಿಸ್​​ ಗೆಲ್ಲುತ್ತೆ ಅಂದಿದ್ರೆ, ಕೆಲವರು ಭಾರತ ಗೆಲ್ಲುತ್ತೆ ಅಂತಿದ್ದಾರೆ. ಆದ್ರೆ, ಯಾರೇ ಗೆಲ್ಲಬೇಕು ಅಂದ್ರೂ, ಈ ಇಬ್ಬರ ಪರ್ಫಾಮೆನ್ಸ್​​ ನಿರ್ಣಾಯಕವಾಗಲಿದೆ ಎಂಬ ಮಾತು ಕೇಳಿ ಬರುತ್ತಿವೆ. ಸ್ಟೀವ್​ ಸ್ಮಿತ್​ ಸಿಡಿದು ನಿಂತ್ರೆ, ಆಸ್ಟ್ರೇಲಿಯಾಗೆ ಗೆಲುವು ಪಕ್ಕಾ. ಕಿಂಗ್​ ಕೊಹ್ಲಿ ಕೆರಳಿದ್ರೆ, ಟೀಮ್​ ಇಂಡಿಯಾದ್ದೇ ಜಯಭೇರಿ ಅನ್ನೋದು ಬಹುತೇಕ ಎಕ್ಸ್​ಪರ್ಟ್​​ಗಳ ಭವಿಷ್ಯವಾಣಿ.

‘4ನೇ ಕ್ರಮಾಂಕದ ಬ್ಯಾಟರ್​​ಗಳ ಆಟ ನಿರ್ಣಾಯಕ’

‘ಸ್ಟೀವ್​ ಸ್ಮಿತ್​ 4ನೇ ಕ್ರಮಾಂಕದಲ್ಲಿ ಆಡಲಿದ್ದಾರೆ. ಪಾಕಿಸ್ತಾನ ವಿರುದ್ಧದ ಏಕದಿನ ಸರಣಿಯಲ್ಲಿ ಉತ್ತಮ ಆಟವಾಡಿದ್ದಾರೆ. ವಿರಾಟ್​ ಕೊಹ್ಲಿ ಆಸ್ಟ್ರೇಲಿಯಾ ನೆಲದಲ್ಲಿ ಬೇರೆಯದ್ದೇ ಆಟವಾಡಿದ್ದಾರೆ. ಇಲ್ಲಿ ತುಂಬಾ ಯಶಸ್ಸನ್ನ ಕಂಡಿದ್ದಾರೆ. ಹೀಗಾಗಿ 4ನೇ ಕ್ರಮಾಂಕದ ಬ್ಯಾಟ್ಸ್​ಮನ್​ಗಳಲ್ಲಿ ಯಾರು ಉತ್ತಮವಾಗಿ ಆಡ್ತಾರೋ ಆ ತಂಡಕ್ಕೆ ಗೆಲುವಿನ ಅವಕಾಶ ಹೆಚ್ಚಿದೆ’

ಮೈಕಲ್​ ವಾನ್​, ಮಾಜಿ ಕ್ರಿಕೆಟಿಗ

ಕಾಂಗರೂ ನಾಡಲ್ಲಿ ಕೊಹ್ಲಿಯೇ ರಿಯಲ್​ ಕಿಂಗ್​.!

ಆಸ್ಟ್ರೇಲಿಯಾ ಅಂದ್ರೆ ವಿಶ್ವದ ಘಟಾನುಘಟಿ ಬ್ಯಾಟರ್​ಗಳೇ ಬೆಚ್ಚಿ ಬೀಳುತ್ತಾರೆ. ಅದ್ರಲ್ಲೂ, ಕಾಂಗರೂ ನಾಡಲ್ಲಿ ಆಸಿಸ್​ನ ಫೈರಿ ಬೌಲರ್​ಗಳನ್ನ ಎದುರಿಸಲು ಹೆದರುತ್ತಾರೆ. ಆದ್ರೆ, ಆಸಿಸ್​​ ವಿರಾಟ್​ ಕೊಹ್ಲಿಯ ಹಾಟ್​​ ಫೇವರಿಟ್​ ಎದುರಾಳಿ. ಭಾರತ ಮಾತ್ರವಲ್ಲ, ಆಸಿಸ್​ನ ಟಫ್​ ಕಂಡೀಷನ್ಸ್​ನಲ್ಲೂ ವಿರಾಟ್​ ಕೊಹ್ಲಿ ನೆಕ್ಸ್ಟ್​​ ಲೆವೆಲ್​ ಬ್ಯಾಟಿಂಗ್​ ನಡೆಸಿದ್ದಾರೆ. ಆಸ್ಟ್ರೇಲಿಯಾ ಎದುರು ಈವರೆಗೆ 25 ಟೆಸ್ಟ್​ ಪಂದ್ಯಗಳನ್ನಾಡಿರೋ ವಿರಾಟ್​ ಕೊಹ್ಲಿ ಬರೋಬ್ಬರಿ 47.48ರ ಸರಾಸರಿಯಲ್ಲಿ ರನ್​ ಕೊಳ್ಳೆ ಹೊಡೆದಿದ್ದಾರೆ. 8 ಸೆಂಚುರಿ, 5 ಹಾಫ್​ ಸೆಂಚುರಿ ಸಿಡಿಸಿರುವ ಕಿಂಗ್​ ಕೊಹ್ಲಿ, 2,042 ರನ್​ಗಳಿಸಿದ್ದಾರೆ.

ಭಾರತ ತಂಡದ ಎದುರು ಸ್ಮಿತ್​ ಸಾಲಿಡ್​ ಆಟ.!

ಆಸ್ಟ್ರೇಲಿಯಾ ತಂಡದ ಪ್ರಮುಖ ಬ್ಯಾಟ್ಸ್​ಮನ್​ ಸ್ಟೀವ್​ ಸ್ಮಿತ್​ ಕೂಡ ಭಾರತದ ಎದುರು ಸಾಲಿಡ್​ ರೆಕಾರ್ಡ್​ ಹೊಂದಿದ್ದಾರೆ. ಟೀಮ್​ ಇಂಡಿಯಾ ಎದುರು ಆಡಿದ 19 ಪಂದ್ಯಗಳಲ್ಲಿ 2042 ರನ್​​ ಕಲೆ ಹಾಕಿದ್ದಾರೆ. ಬರೋಬ್ಬರಿ 68.87ರ ರನ್​ಗಳಿಕೆಯ ಸರಾಸರಿಯನ್ನ ಹೊಂದಿರುವ ಸ್ಮಿತ್​, 9 ಶತಕ, 5 ಅರ್ಧಶತಕಗಳ ಇನ್ನಿಂಗ್ಸ್​ ಕಟ್ಟಿದ್ದಾರೆ.

ಸ್ಮಿತ್​​-ಕೊಹ್ಲಿ, ದಿಗ್ಗಜರಿಗೆ ಕಾಡುತ್ತಿದೆ ಶತಕದ ಬರ.!

ಸ್ಟೀವ್​ ಸ್ಮಿತ್​, ವಿರಾಟ್​ ಕೊಹ್ಲಿ ಅದ್ಭುತವಾದ ಟ್ರ್ಯಾಕ್​ ರೆಕಾರ್ಡ್​ ಹೊಂದಿದ್ದಾರೆ ನಿಜ. ಆದ್ರೆ, ಕಳೆದೊಂದು ವರ್ಷದಿಂದ ಸೆಂಚುರಿಗಳಿಸಲಾಗದೇ ಪರದಾಟ ನಡೆಸುತ್ತಿದ್ದಾರೆ. ವಿರಾಟ್​ ಕೊಹ್ಲಿಯಂತೂ ಈ ವರ್ಷದಲ್ಲಿ ರನ್​ಗಳಿಕೆಗೆ ಪರದಾಟ ನಡೆಸಿದ್ದಾರೆ. ಈ ಹಿಂದಿನ ನ್ಯೂಜಿಲೆಂಡ್​, ಬಾಂಗ್ಲಾ ಟೆಸ್ಟ್ ಸರಣಿಯಲ್ಲಿ ಕೊಹ್ಲಿ ಫ್ಲಾಪ್​ ಶೋ ನೀಡಿದ್ದಾರೆ. 2023ರ ಜುಲೈನಲ್ಲಿ ವೆಸ್ಟ್​ ಇಂಡೀಸ್​ ವಿರುದ್ಧ ಶತಕ ಸಿಡಿಸಿದ್ದ ಕೊಹ್ಲಿ, ಕಳೆದೊಂದು ವರ್ಷದಿಂದ ಮೂರಂಕಿ ಗಡಿ ದಾಟಿಲ್ಲ.

ಇದನ್ನೂ ಓದಿ: ‘ಮಹಾ’, ಜಾರ್ಖಂಡ್ ವಿಧಾನಸಭಾ ಚುನಾವಣೆ; ಇಂದು ಮತದಾನ.. ಒಟ್ಟು ಎಷ್ಟು ಅಭ್ಯರ್ಥಿಗಳು ಅಖಾಡದಲ್ಲಿದ್ದಾರೆ?

ಸ್ಟೀವ್​ ಸ್ಮಿತ್​ ಕಥೆಯೂ ಭಿನ್ನವಾಗಿಲ್ಲ.. ಇಂಗ್ಲೆಂಡ್​​ ವಿರುದ್ಧ ಲಾರ್ಡ್ಸ್​ನಲ್ಲಿ 2023ರ ಜೂನ್​ನಲ್ಲಿ ಸೆಂಚುರಿ ಸಿಡಿಸಿದ್ದ ಸ್ಮಿತ್​, ಆ ಬಳಿಕ ಟೆಸ್ಟ್​ ಕ್ರಿಕೆಟ್​ನಲ್ಲಿ ಶತಕ ಅನ್ನೋದನ್ನ ಕಂಡಿಲ್ಲ. ಶತಕ ಬಿಡಿ.. ರನ್​ಗಳಿಕೆಯ ವಿಚಾರದಲ್ಲೂ ಇನ್​​ಕನ್ಸಿಸ್ಟೆಂಟ್​ ಪರ್ಫಾಮೆನ್ಸ್​ ನೀಡಿದ್ದಾರೆ. ಕೊಹ್ಲಿಗೆ ಹೋಲಿಸಿದ್ರೆ, ಸ್ಮಿತ್​ಗೆ ಹೋಮ್​​ ಅಡ್ವಾಂಟೇಜ್​ ಇದ್ದು, ಬಾರ್ಡರ್​-ಗವಾಸ್ಕರ್​ ಟೆಸ್ಟ್​ ಸರಣಿಯಲ್ಲಿ ಕಮ್​ಬ್ಯಾಕ್​ನ ಎದುರು ನೋಡುತ್ತಿದ್ದಾರೆ.

ಸದ್ಯ ಕಳಪೆ ಫಾರ್ಮ್​ನಲ್ಲಿದ್ರೂ, ಸ್ಟೀವ್​ ಸ್ಮಿತ್​ ಹಾಗೂ ವಿರಾಟ್​ ಕೊಹ್ಲಿ ಉಭಯ ತಂಡಗಳ ಪಾಲಿನ ಮ್ಯಾಚ್​​ ವಿನ್ನರ್ಸ್​ ಅನ್ನೋ ಮಾತನ್ನ ತೆಗೆದು ಹಾಕಲು ಸಾಧ್ಯವಿಲ್ಲ. ಟಫ್​ ಟೈಮ್​ನಲ್ಲಿ ತಂಡಕ್ಕಾಗಿ ಏಕಾಂಗಿಯಾಗಿ ಹೋರಾಟ ನಡೆಸಿದ ಇತಿಹಾಸ ಇಬ್ಬರಿಗೂ ಇದೆ. ಹೀಗಾಗಿ ಬಾರ್ಡರ್​​-ಗವಾಸ್ಕರ್ ಟೆಸ್ಟ್​ ಸರಣಿಯಲ್ಲಿ ಇಬ್ಬರ ಮೇಲೆ ನಿರೀಕ್ಷೆ ಹೆಚ್ಚಾಗಿದ್ದು, ಯಾರು ಪ್ರತಿಷ್ಟೆಯ ಸರಣಿಯಲ್ಲಿ ಭರ್ಜರಿ ಆಟವಾಡುತ್ತಾರೆ ಎಂದು ಕಾದು ನೋಡಬೇಕಿದೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ