ಯುವ ಆಲ್​​ರೌಂಡರ್ ಮುಂದೆ ಕಿವೀಸ್ ಕ್ಲೀನ್ ಬೋಲ್ಡ್​

ಮೊದಲು ಅಶ್ವಿನ್ ಮೇಲುಗೈ, ಆಮೇಲೆ ಸುಂದರ್ ಮೇಲುಗೈ

ರಚಿನ್ ರವೀಂದ್ರ ಔಟ್ ಮಾಡಿದ ಮೇಲೆ ಸುಂದರ್​ಗೆ ಲಕ್

ಎರಡನೇ ಟೆಸ್ಟ್​ ಪಂದ್ಯದ ಮೊದಲ ಇನ್ನಿಂಗ್ಸ್​ನಲ್ಲಿ ನ್ಯೂಜಿಲೆಂಡ್ ಟೀಮ್ ಅನ್ನು ಕೇವಲ 259 ರನ್​ಗಳಿಗೆ ರೋಹಿತ್ ಪಡೆ ಆಲೌಟ್​ ಮಾಡಿದೆ. ಇದಕ್ಕೆ ಮುಖ್ಯ ಕಾರಣವಾಗಿದ್ದು ಭಾರತದ ಯಂಗ್ ಆಲ್​ರೌಂಡರ್ ವಾಷಿಂಗ್ಟನ್ ಸುಂದರ್. ಕಿವೀಸ್​ ಬ್ಯಾಟ್ಸ್​ಮನ್​ಗಳ ಕ್ರೀಸ್​ಗೆ ಬಂದಷ್ಟೇ ವೇಗದಲ್ಲಿ ಸುಂದರ್ ಪೆವಿಲಿಯನ್ ದಾರಿ ತೋರಿಸಿದರು.

ಪುಣೆಯಲ್ಲಿರುವ ಮಹಾರಾಷ್ಟ್ರ ಕ್ರಿಕೆಟ್​ ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ ಕಿವೀಸ್ ಕ್ಯಾಪ್ಟನ್ ಟಾಮ್ ಲಾಥಮ್ ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡರು. ಅದರಂತೆ ಬ್ಯಾಟಿಂಗ್​ಗೆ ಆಗಮಿಸಿದ ಓಪನರ್ಸ್ ಕೆಲ ಹೊತ್ತು ಭಾರತದ ಬೌಲರ್​ಗಳನ್ನ ಕಾಡಿದರು. ಆದರೆ ಇದಕ್ಕೆ ಆರ್.ಅಶ್ವಿನ್ ಅವರು ಬ್ರೇಕ್ ಹಾಕಿದರು. ಮೊದಲು ನ್ಯೂಜಿಲೆಂಡ್​ ಬ್ಯಾಟ್ಸ್​ಮನ್​ಗಳ ಮೇಲೆ ಆರ್ ಅಶ್ವಿನ್ ಭರ್ಜರಿ ಸವಾರಿ ನಡೆಸಿದ್ದರು. ಮೊದಲ 3 ವಿಕೆಟ್​ಗಳನ್ನ ಅಶ್ವಿನ್ ಪಡೆದಿದ್ದರು. ಆದರೆ ಬಳಿಕ ಯಾವ ವಿಕೆಟ್​ ಕೂಡ ಅವರಿಗೆ ಬೀಳಲಿಲ್ಲ. ಇದೇ ವೇಳೆ ಸುಂದರ್ ಕೈಚಳಕ ಆರಂಭವಾಯಿತು.

ಇದನ್ನೂ ಓದಿ: ಬೇಲೆಕೇರಿ ಅದಿರು ಕೇಸ್​; ಕಾಂಗ್ರೆಸ್​ MLA ಸತೀಶ್ ಸೈಲ್ ಅರೆಸ್ಟ್​.. ಇಂದು ಕೋರ್ಟ್​​ನಿಂದ ಶಿಕ್ಷೆ ಪ್ರಕಟ

ಆಲ್​ರೌಂಡರ್ ಆಗಿ ಅಖಾಡಕ್ಕೆ ಇಳಿದ ವಾಷಿಂಗ್ಟನ್ ಸುಂದರ್ ಅದ್ಭುತ ಸ್ಪೆಲ್​ಗಳನ್ನ ಮಾಡಿದರು. ಸುಂದರ್ ಸ್ಪಿನ್​ಗೆ ನ್ಯೂಜಿಲೆಂಡ್​ ಬ್ಯಾಟರ್ಸ್​ ಹಣ್ಣೆಲೆಗಳಂತೆ ಉದುರಿದರು. 65 ರನ್​ ಗಳಿಸಿ ಬ್ಯಾಟಿಂಗ್ ಮಾಡುತ್ತಿದ್ದ ರಚಿನ್ ರವೀಂದ್ರ ಅವರ ವಿಕೆಟ್ ಅನ್ನು ವಾಷಿಂಗ್ಟನ್​ ಸುಂದರ್ ಉರುಳಿಸಿದರು. ಇದರ ಬೆನ್ನಲ್ಲೇ ಸುಂದರ್​ಗೆ ಅದೃಷ್ಟ ಕುಲಾಯಿಸಿತು. ರಚಿನ್ ವಿಕೆಟ್ ಪಡೆದ ಬಳಿಕ 6 ವಿಕೆಟ್​ಗಳು ಸುಂದರ್ ಪಾಲಾದವು.

23 ಓವರ್​ಗಳನ್ನ ಮಾಡಿದ ಯಂಗ್ ಸ್ಪಿನ್ನರ್ ವಾಷಿಂಗ್ಟನ್ ಸುಂದರ್ 4 ಓವರ್​ ಮೇಡಿನ್ ಮಾಡಿದ್ದಲ್ಲದೇ ಕೇವಲ 59 ರನ್ ನೀಡಿ 7 ವಿಕೆಟ್​ಗಳನ್ನ ಉರುಳಿಸಿದರು. ಸುಂದರ್ ಸ್ಪಿನ್ ಮುಂದೆ ಕಿವೀಸ್ ಆಟಗಾರರು ಅಕ್ಷರಶಃ ನೆಲಕಚ್ಚಿದರು. ಈ ಮೂಲಕ ಸುಂದರ್ ತಮ್ಮ ವೃತ್ತಿ ಜೀವನದಲ್ಲೇ 59 ರನ್​ಗೆ 7 ವಿಕೆಟ್ ಪಡೆದು ಸಂಭ್ರಮಿಸಿದರು. ಈ ಮೊದಲ ಇನ್ನಿಂಗ್ಸ್​ನಲ್ಲಿ ಎಲ್ಲ ವಿಕೆಟ್ಸ್​ ಅನ್ನ ಇಬ್ಬರು ಸ್ಪಿನ್ನರ್​ಗಳು ಪಡೆದಿದ್ದಾರೆ. ಪಂದ್ಯದಲ್ಲಿ ಕಿವೀಸ್​ 259 ರನ್​ಗಳಿಗೆ ಆಲೌಟ್ ಆಗಿದ್ದು ಟೀಮ್ ಇಂಡಿಯಾ 16 ರನ್​ಗೆ ಒಂದು ಕಳೆದುಕೊಂಡಿದ್ದು ಕ್ರೀಸ್​ನಲ್ಲಿ ಜೈಸ್ವಾಲ್ ಹಾಗೂ ಶುಭ್​ಮನ್ ಗಿಲ್ ಇದ್ದಾರೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ