ತ್ವಚೆಯ ಕಾಂತಿ, ದೇಹದ ಎನರ್ಜಿ ಲೆವೆಲ್​ ಹೆಚ್ಚಿಸಿಕೊಳ್ಳಬೇಕಾ? ಈ ABC ಜ್ಯೂಸ್ ಟ್ರೈ ಮಾಡಿ!

ನೀವು ಹಲವಾರು ತರಹದ ಜ್ಯೂಸ್​ಗಳ ಬಗ್ಗೆ ಕೇಳಿರುತ್ತೀರಿ, ಕುಡಿದು ಕೂಡ ಇರ್ತೀರಾ, ಆದ್ರೆ ನಾವು ಇಂದು ನಿಮಗೆ ಒಂದು ಬಗೆಯ ಜ್ಯೂಸ್​ ಬಗ್ಗೆ ಹೇಳುತ್ತೇವೆ, ಈ ಜ್ಯೂಸ್ ಕುಡಿಯುವುದರಿಂದ ನಮಗೆ ಹಲವು ರೀತಿಯ ಆರೋಗ್ಯದ ಪ್ರಯೋಜನಗಳಿವೆ. ಆ ಜ್ಯೂಸ್​ನ ಹೆಸರು ABC ಜ್ಯೂಸ್ ಅಂತ. ಅಂದ್ರೆ ಸೇಬು, ಬಿಟ್​ರೂಟ್ ಹಾಗೂ ಕ್ಯಾರಟ್​ಗಳನ್ನು ಕತ್ತರಿಸಿ ಅವುಗಳನ್ನು ಮಿಕ್ಸ್ ಮಾಡಿ ತಯಾರಿಸುವ ಜ್ಯೂಸ್​ ಎಬಿಸಿ ಜ್ಯೂಸ್​. ಎ ಅಂದ್ರೆ ಆ್ಯಪಲ್, ಬಿ ಅಂದ್ರೆ ಬಿಟ್​ರೂಟ್ ಹಾಗೂ ಸಿ ಅಂದ್ರೆ ಕ್ಯಾರೆಟ್​ ಅಂತ ಅರ್ಥ. ಈ ಒಂದು ಜ್ಯೂಸ್ ಕುಡಿಯುವುದರಿಂದ ನಿಮ್ಮ ದೇಹಕ್ಕೆ ಒಂದು ಹೊಸ ಚೈತನ್ಯವೇ ಬರುತ್ತದೆ. ಎನರ್ಜಿ ಲೆವಲ್ ಹೆಚ್ಚಾಗುವುದರ ಜೊತೆ ಅನೇಕ ರೀತಿಯ ಆರೋಗ್ಯದ ಲಾಭಗಳು ಇವೆ.

ನೈಸರ್ಗಿಕವಾಗಿ ಹೆಚ್ಚುತ್ತದೆ ತ್ವಚೆಯ ಕಾಂತಿ
ಈ ಎ.ಬಿ.ಸಿ ಜ್ಯೂಸ್​ನ್ನು ನಿಯಮಿತವಾಗಿ ಸೇವಿಸುವುದರಿಂದ ನಿಮ್ಮ ಕಳೆಗುಂದಿದ ಚರ್ಮದ ಕಾಂತಿಗೆ ಹೊಸ ಹೊಳಪು ಬರುತ್ತದೆ. ಸೇಬು ಹಣ್ಣಿನಲ್ಲಿ ಹೆಚ್ಚು ಆ್ಯಂಟಿ ಆಕ್ಸಿಡೆಂಟ್​ಗಳು ಇವೆ ವಿಟಮಿನ್ ಸಿ ಯಂತಹ ಅಂಶಗಳು ಇವೆ. ಇವು ಚರ್ಮದ ಮೇಲಾಗುವ ಮೂಲ ಸಮಸ್ಯೆಗಳೊಂದಿಗೆ ಹೋರಾಡುತ್ತವೆ. ಇನ್ನು ಕ್ಯಾರೆಟ್​ನಲ್ಲಿ ಬೆಟಾ ಕ್ಯಾರೊಟಿನ್ ಇವೆ. ಇವು ಸ್ಕಿನ್ ಟಿಶ್ಯುಗಳನ್ನು ಸರಿ ಮಾಡುತ್ತವೆ. ಬೀಟ್​ರೂಟ್​ ದೇಹದಲ್ಲಿ ರಕ್ತಪರಿಚಲನೆಯನ್ನ ಸುಧಾರಿಸುವುದರಿಂದ ಸಹಜವಾಗಿ ನಮ್ಮ ಚರ್ಮದ ಕಾಂತಿ ಹೊಳೆಯುತ್ತೆ. ಈ ಎ.ಬಿ.ಸಿ ಜ್ಯೂಸ್ ನಿಯಮಿತವಾಗಿ ಕುಡಿಯುವುದರಿಂದ ಮೊಡವೆಯಂತಹ ಸಮಸ್ಯೆಗಳು ಕಡಿಮೆಯಾಗಿ ತ್ವಚೆಯ ಆರೋಗ್ಯ ಸುಧಾರಿಸುತ್ತದೆ.

ಎನರ್ಜಿ ಲೆವಲ್​ನಲ್ಲಿ ವೃದ್ಧಿ
ಈ ಮೂರು ಪದಾರ್ಥಗಳಿಂದ ನೀವು ಜ್ಯೂಸ್ ಮಾಡಿಕೊಂಡು ಕುಡಿದರೆ, ನಿಯಮಿತವಾಗಿ ಅದನ್ನು ಪಾಲನೆ ಮಾಡಿದರೆ ದೇಹದಲ್ಲಿ ಶಕ್ತಿಯ ಮಟ್ಟ ಹೆಚ್ಚುತ್ತದೆ. ಬಿಟ್​ರೂಟ್​ ದೇಹದಲ್ಲಿ ಆಮ್ಲಜನಕದ ಪರಿಚಲನೆಯನ್ನ ಹೆಚ್ಚು ಮಾಡುತ್ತದೆ. ಇದು ನಮ್ಮ ಮೆದುಳಿನ ಸ್ನಾಯುಗಳಿಗೆ ಬಲ ಕೊಡುತ್ತದೆ. ಇನ್ನು ಸೇಬು ಹಣ್ಣು ಮತ್ತು ಕ್ಯಾರೆಟ್​ನಲ್ಲಿ ನೈಸರ್ಗಿಕವಾದ ಸಕ್ಕರೆ ಅಂಶ ಇರುವುದರಿಂದ ಸುಸ್ತು, ಮೈಕೈನೋವಿನಂತಹ ಸಾಮಾನ್ಯ ಸಮಸ್ಯೆಗಳು ನಮ್ಮನ್ನು ಕಾಡುವುದಿಲ್ಲ.

ತೂಕ ಇಳಿಕೆಗೂ ಕೂಡ ಇದು ಸಹಾಯ ಮಾಡುತ್ತದೆ
ದೇಹದ ತೂಕದಲ್ಲಿ ಒಂದಿಷ್ಟು ಕಿಲೋ ಕಳೆದುಕೊಳ್ಳಲು ಪ್ರಯತ್ನಿಸುತ್ತಿದ್ದಲ್ಲಿ ಈ ಜ್ಯೂಸ್ ನಿಮಗಾಗಿ. ಎಬಿಸಿ ಜ್ಯೂಸ್​ನಲ್ಲಿ ಕಡಿಮೆ ಪ್ರಮಾಣದ ಕ್ಯಾಲರಿ ಹಾಗೂ ಹೆಚ್ಚು ಪ್ರಮಾಣದಲ್ಲಿ ಫೈಬರ್ ಇರುತ್ತದೆ. ಇದು ಮಲಬದ್ಧತೆಯಂತಹ ಸಮಸ್ಯೆಗಳಿಂದ ನಮ್ಮನ್ನು ದೂರ ಇಡುತ್ತದೆ. ಜೀರ್ಣಕ್ರಿಯೆಯನ್ನು ಸರಳಗೊಳಿಸುತ್ತದೆ. ನೀವು ಅನಾರೋಗ್ಯಕರ ಕುರುಕಲು ತಿಂಡಿಯನ್ನು ತಿನ್ನುವುದರಿಂದ ದೂರ ಇಡುತ್ತದೆ. ಇದರಿಂದ ತೂಕ ನಿರ್ವಹಣೆ ಕೂಡ ಸರಳವಾಗಿ ಹೋಗುತ್ತದೆ.

ಹೃದಯ ಆರೋಗ್ಯವನ್ನು ಕಾಪಾಡುತ್ತದೆ
ಎಬಿಸಿ ಜ್ಯೂಸ್​ ಕೇವಲ ಕುಡಿಯಲು ಸ್ವಾದಿಷ್ಟವಾಗಿರುವುದು ಮಾತ್ರವಲ್ಲ ಅದರ ಜೊತೆ ಅನೇಕ ಆರೋಗ್ಯಕರ ಉಪಯೋಗಗಳನ್ನು ನಮಗೆ ನೀಡುತ್ತದೆ. 2022ರಲ್ಲಿ ನಡೆದ ಒಂದು ಅಧ್ಯಯನ ಹೇಳುವ ಪ್ರಕಾರ. ಆ್ಯಪಲ್ ಜ್ಯೂಸ್​ನ್ನು ನಿಯಮಿತವಾಗಿ ಸೇವಿಸುವುದರಿಂದ ಹೃದಯರಕ್ತನಾಳಗಳ ಆರೋಗ್ಯ ಸುಧಾರಿಸುತ್ತದೆ. ಇನ್ನು ಬಿಟ್​ರೂಟ್​ನಲ್ಲಿ ನಮ್ಮ ದೇಹದ ರಕ್ತದೊತ್ತಡವನ್ನು ನಿಯಂತ್ರಣದಲ್ಲಿಡುವ ಗುಣವಿದೆ ಮತ್ತು ಈಗಾಗಲೇ ಹೇಳಿದಂತೆ ರಕ್ತಪರಿಚಲನೆಯನ್ನು ಉತ್ತಮಗೊಳಿಸುತ್ತದೆ. ಕ್ಯಾರೆಟ್​ನಲ್ಲಿ ಪೊಟ್ಯಾಶಿಯಂ ಅಂಶ ಇದ್ದು ಇದು ಕೊಲೆಸ್ಟ್ರಾಲ್​ ಹೆಚ್ಚಾಗುವುದನ್ನು ತಡೆಯುತ್ತದೆ. ಹೀಗಾಗಿ ಈ ಎಬಿಸಿ ಜ್ಯೂಸ್ ಹೃದಯ ಆರೋಗ್ಯವನ್ನು ಕೂಡ ಚೆನ್ನಾಗಿ ಇಡುತ್ತದೆ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ