RCB ಬೌಲರ್ ಯಶ್​ ದಯಾಳ್​​ ಅರೆಸ್ಟ್ ಆಗ್ತಾರಾ, ಎಫ್​ಐಆರ್​ನಲ್ಲಿ ಏನಿದೆ..? ಸಿಎಂ ಕಚೇರಿಯಿಂದ ತನಿಖೆಗೆ ಆದೇಶ!

ಐಪಿಎಲ್​ನಲ್ಲಿ ಸೆನ್ಸೇಷನ್ ಸೃಷ್ಟಿಸಿದ್ದ ಆರ್​ಸಿಬಿಗೆ ಚೊಚ್ಚಲ ಐಪಿಎಲ್ ಟ್ರೋಫಿ ಗೆಲ್ಲಿಸುವಲ್ಲಿ ಪ್ರಮುಖ ಪಾತ್ರವನ್ನೇ ವಹಿಸಿದ್ದರು. ಇದೀಗ ಅದೇ ಮ್ಯಾಚ್ ವಿನ್ನರ್ ಬೌಲರ್​ ಮೇಲೆ ಗಂಭೀರ ಆರೋಪ ಕೇಳಿ ಬಂದಿದೆ. ಈ ಬೆನ್ನಲ್ಲೇ ಯಶ್ ದಯಾಳ್ ಅರೆಸ್ಟ್ ಆಗ್ತಾರಾ ಎಂಬ ಸುದ್ದಿ ಜೋರಾಗಿ ಕೇಳಿ ಬರ್ತಿದೆ.

ಯಶ್​ ದಯಾಳ್ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಮ್ಯಾಚ್ ವಿನ್ನರ್. 3 ವರ್ಷಗಳ ಹಿಂದೆ ಅಭಿಮಾನಿಗಳ ಪಾಲಿಗೆ ವಿಲನ್ ಆಗಿದ್ದ ಯಶ್​ ದಯಾಳ್, ಕಳೆದ ಎರಡು ವರ್ಷಗಳಿಂದ ರಾಯಲ್ ಚಾಲೆಂರ್ಸ್ ಬೆಂಗಳೂರು ಪಾಲಿನ ರಿಯಲ್ ಗೇಮ್​ ಚೇಂಜರ್ ಮಾತ್ರವಲ್ಲ. 18 ವರ್ಷಗಳ ಕಪ್ ಗೆಲುವಿನಲ್ಲಿ ಮಹತ್ವದ ಪಾತ್ರ ವಹಿಸಿದ್ದ ರಿಯಲ್ ಹೀರೋ. ಇದೀಗ ಕ್ರಿಕೆಟ್ ಲೋಕದಲ್ಲೇ ಸೆನ್ಸೇಷನ್ ಕ್ರಿಯೇಟ್ ಮಾಡಿದ್ದಾರೆ. ಅದು ಆನ್​ಫೀಲ್ಡ್​ ವಿಚಾರಕ್ಕಲ್ಲ, ಆಫ್ ದಿ ಫೀಲ್ಡ್​ ವಿಚಾರಕ್ಕಾಗಿದೆ.

ವಿವಾದದ ಸುಳಿಯಲ್ಲಿ ಆರ್​ಸಿಬಿಯ ಯಶ್ ದಯಾಳ್..!

ಐಪಿಎಲ್​ನಲ್ಲಿ ಡೆಡ್ಲಿ ಸ್ಪೆಲ್ಸ್ ಹಾಕಿ, ಆರ್​ಸಿಬಿಯ ಅಭಿಮಾನಿಗಳ ಮನ ಗೆದ್ದಿದ್ದ ಯಶ್​ ದಯಾಳ್, ಈಗ ಅದೇ ಅಭಿಮಾನಿಗಳ ಮುಂದೆ ವಿಲನ್ ಆಗಿದ್ದಾರೆ. ಆದ್ರೆ, ಈ ಸಲ ವಿಲನ್ ಆಗಿರೋದು ಆಫ್​ ಫೀಲ್ಡ್​ನಲ್ಲಿ ಮಾಡಿರೋ ಘನಂದಾರಿ ಕೆಲಸಕ್ಕೆ. ಬಿರುಗಾಳಿ ವೇಗದ ಎಸೆತಗಳಿಂದಲೇ ನಡುಕ ಹುಟ್ಟಿಸಿದ್ದ ಯಶ್‌ ದಯಾಳ್‌, ಇದೀಗ ಲೈಂಗಿಕ ಕಿರುಕುಳ, ಹಿಂಸೆ ಹಾಗೂ ವಂಚನೆಯಂಥ ಬಹುದೊಡ್ಡ ವಿವಾದಕ್ಕೆ ಸಿಲುಕಿದ್ದಾರೆ. ಇದರೊಂದಿಗೆ ಕೂಲ್ ಆ್ಯಂಡ್ ಕಾಮ್ ವ್ಯಕ್ತಿತ್ವದಿಂದಲೇ ಪರಿಚಿತನಾಗಿದ್ದ ಯಶ್ ದಯಾಳ್​ರ ಮತ್ತೊಂದು ಮುಖ ಬಟಬಯಲಾಗಿದೆ.

ಸಂತ್ರಸ್ತ ಯುವತಿಯಿಂದ ದೂರು.. ಎಫ್​ಐಆರ್​ ದಾಖಲು..!

ಯಶ್ ದಯಾಳ್ ವಿರುದ್ಧ ಲೈಂಗಿಕ ದೌರ್ಜನ್ಯ ಆರೋಪ ಮಾಡಿರುವ ಸಂತ್ರಸ್ತ ಯುವತಿ, ಸಿಎಂ ಯೋಗಿ ಆದಿತ್ಯನಾಥ್​ ಆನ್‌ಲೈನ್ ಪೋರ್ಟಲ್​ನಿಂದ ದೂರು ದಾಖಲಿಸಿದ್ದಾರೆ. ಈ ದೂರಿನಲ್ಲಿ ಲೈಂಗಿಕ ಕಿರುಕುಳ, ಮಾನಸಿಕ, ದೈಹಿಕ ಹಲ್ಲೆಯ ಆರೋಪ ಮಾಡಿದ್ದಾರೆ. ಈ ಕುರಿತಾಗಿ ದಯಾಳ್ ವಿರುದ್ಧ ಅಧಿಕೃತವಾಗಿ ಎಫ್‌ಐಆರ್ ದಾಖಲಾಗಿದೆ. ಇದರೊಂದಿಗೆ ಯಶ್​ ದಯಾಳ್ ಸಂಕಷ್ಟಕ್ಕೆ ಸಿಲುಕಿದ್ದಾರೆ.

ಎಫ್‌ಐಆರ್‌ನಲ್ಲಿ ಏನಿದೆ..?

• 5 ವರ್ಷಗಳಿಂದ ತಾವಿಬ್ಬರು ಪರಸ್ಪರ ಪ್ರೀತಿಸುತ್ತಿರುವುದಾಗಿ ಉಲ್ಲೇಖ
• ನಾನೇ ನಿನ್ನ ಗಂಡ ಎಂದು ಪೋಷಕರ ಪರಿಚಯಿಸಿದ್ದ ಯಶ್ ದಯಾಳ್
• ದಯಾಳ್ ಮಾತು ನಂಬಿ, ಸರ್ವಸ್ವವೂ ಅರ್ಪಿಸಿರುವುದಾಗಿ ಉಲ್ಲೇಖ
• ಮದುವೆ ವಿಚಾರ ಪ್ರಸ್ತಾಪಿಸಿದ್ದಕ್ಕಾಗಿ ದೈಹಿಕ ಹಲ್ಲೆ, ಮಾನಸಿಕ ಹಿಂಸೆ
• ಆರ್ಥಿಕವಾಗಿಯು ಶೋಷಣೆ ಮಾಡಿದ್ದಾನೆ ಎಂದು ಯುವತಿ ಆರೋಪ
• ಸುಳ್ಳು ಮದುವೆ ಭರವಸೆ ನೀಡಿ ಹಲವು ಯುವತಿಯರಿಗೆ ವಂಚನೆ

ಯಶ್ ದಯಾಳ್ ವಿರುದ್ಧ ಸಾಲು ಸಾಲು ಆರೋಪ ಮಾಡಿರುವ ಸಂತ್ರಸ್ತ ಯುವತಿ, ಚಾಟ್​​​​ ರೆಕಾರ್ಡ್‌ಗಳು, ಸ್ಕ್ರೀನ್‌ಶಾಟ್‌ಗಳು, ವಿಡಿಯೋ ಕಾಲ್‌ಗಳು ಸೇರಿದಂತೆ ಇನ್ನಿತರ ಸಾಕ್ಷಿಗಳಿವೆ ಎಂದು ದೂರು ನೀಡಿದ್ದಾರೆ. ಈ ಸಂಬಂಧ ಮುಖ್ಯಮಂತ್ರಿ ಕಚೇರಿಯಿಂದಲೇ ತನಿಖೆಗೆ ಆದೇಶ ನೀಡಲಾಗಿದೆ.

ಇದನ್ನೂ ಓದಿ: ಐತಿಹಾಸಿಕ ಕ್ಷಣಕ್ಕೆ ಸಾಕ್ಷಿಯಾದ KRS.. ಬಾಗಿನ ಅರ್ಪಿಸಿ ಹೊಸ ದಾಖಲೆ ಬರೆಯಲಿರುವ ಸಿಎಂ ಸಿದ್ದರಾಮಯ್ಯ

ಅರೆಸ್ಟ್ ಆಗ್ತಾರಾ ಆರ್​ಸಿಬಿಯ ಯಶ್​ ದಯಾಳ್​.?

ಸದ್ಯ ಮುಖ್ಯಮಂತ್ರಿ ಕಚೇರಿಯಿಂದಲೇ ತನಿಖೆಗೆ ಆದೇಶಿಸಲಾಗಿದ್ದು, ಈ ಸಂಬಂಧ ವರದಿ ನೀಡಲು ಗಾಜಿಯಾಬಾದ್ ಪೊಲೀಸರಿಗೆ ಸೂಚಿಸಲಾಗಿದೆ. ತನಿಖೆಯ ವರದಿ ಸಲ್ಲಿಸಲು ಜುಲೈ 21ರ ತನಕ ಗಡುವು ನೀಡಲಾಗಿದೆ. ಈ ಸಂಬಂಧ ತನಿಖೆ ಪೊಲೀಸರು ತನಿಖೆ ಕೈಗೆತ್ತಿಕೊಂಡಿದ್ದಾರೆ. ಈ ಬೆನ್ನಲ್ಲೇ ಯಶ್ ದಯಾಳ್ ಅರೆಸ್ಟ್ ಆಗ್ತಾರಾ ಎಂಬ ಕುತೂಹಲ ಫ್ಯಾನ್ಸ್​ಗೆ ಕಾಡ್ತಿದೆ.

ಒಂದಲ್ಲ.. ಎರಡಲ್ಲ.. ಬರೋಬ್ಬರಿ 11 ಮಂದಿಯಿಂದ ದೂರು!

ಆರ್​ಸಿಬಿ ವೇಗಿ ಯಶ್ ದಯಾಳ್ ಮೇಲೆ ಮಾತ್ರವಲ್ಲ, ಲಕ್ನೋ ಸೂಪರ್ ಜೈಂಟ್ಸ್​ ತಂಡದ ವೇಗಿ ಶಮರ್ ಜೋಸೆಫ್ ವಿರುದ್ಧವೂ ಆರೋಪ ಕೇಳಿಬಂದಿದೆ. ಒಂದಲ್ಲ ಎರಡಲ್ಲ, 18 ವರ್ಷದ ಯುವತಿ ಸೇರಿ 11 ಮಂದಿ ಶಮರ್ ಜೋಸೆಫ್ ವಿರುದ್ಧ ಗಯಾನಾ ಪೊಲೀಸರು ಮುಂದೆ ದೂರು ನೀಡಿದ್ದಾರೆ. 18 ವರ್ಷದ ಯವತಿ ಮೇಲೆ 2023ರ ಮಾರ್ಚ್​ 3ರಿಂದ ನಿರಂತರ ಅತ್ಯಾಚಾರ ಎಸಗಿರುವುದಾಗಿ ದೂರು ದಾಖಲಿಸಿದ್ದಾರೆ. ಅಷ್ಟೇ ಅಲ್ಲ, ದೂರು ದಾಖಲಿಸಿರುವ ಸಂತ್ರಸ್ತೆಯರು, ಮೆಸೇಜ್‌ಗಳು, ಆಡಿಯೋಗಳು ಸೇರಿದಂತೆ ಇನ್ನಿತರ ಸಾಕ್ಷ್ಯಗಳನ್ನ ಪೊಲೀಸರಿಗೆ ಸಲ್ಲಿಸಿದ್ದಾರೆ. ಸದ್ಯ ಇವರಿಬ್ಬರ ಮೇಲಿನ ದೂರುಗಳು ವಿಶ್ವ ಕ್ರಿಕೆಟ್​ ಲೋಕದಲ್ಲಿ ಸಂಚಲನವನ್ನೇ ಸೃಷ್ಟಿಸಿವೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.30ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ