ಸಹಚರರ ಜೀವ ಉಳಿಸಲು ಹೇಗೆಲ್ಲ ಚಿಕಿತ್ಸೆ ಕೊಡುತ್ತವೆ ಗೊತ್ತಾ?

ವಿಜ್ಞಾನಿಗಳ ಅಧ್ಯಯನದಲ್ಲಿ ಅಚ್ಚರಿಯ ವಿಚಾರ ಬಯಲು

ಭೂಮಿ ಮೇಲೆ ಶಸ್ತ್ರ ಚಿಕಿತ್ಸೆ ಮಾಡುವ ಎರಡನೇ ಜೀವಿ ಇರುವೆ

ಇರಲಾರದೇ ಇರುವೆ ಬಿಟ್ಕೊಂಡರು ಅನ್ನುವ ಹಾಗೆ ಸಂಶೋಧನೆಗೆ ಅಂತಾ ಒಂದಷ್ಟು ಇರುವೆಗಳನ್ನು ಬಿಟ್ಕೊಂಡಿದ್ದ ವಿಜ್ಞಾನಿಗಳ ತಂಡಕ್ಕೆ ಅಚ್ಚರಿಯ ಸಂಗತಿಯೊಂದು ಸಿಕ್ಕಿದೆ. ಇದು ವಿಜ್ಞಾನಿಗಳ ಕುತೂಹಲವನ್ನು ಮತ್ತಷ್ಟು ಕೆರಳಿಸಿದ್ದು, ಇನ್ನಷ್ಟು ಸಂಶೋಧನೆಗೆ ಮುಂದಾಗಿದ್ದಾರೆ. ಅಸಲಿ ವಿಚಾರ ಏನಂದರೆ ಇರುವೆಗಳು ಕೂಡ ತಮ್ಮವರಿಗೆ ಶಸ್ತ್ರಚಿಕಿತ್ಸೆಯನ್ನು ಮಾಡುತ್ತವೆಯಂತೆ!

ಅಚ್ಚರಿ ಅನಿಸಿದರೂ ನಿಜ! ವಿಜ್ಞಾನಿಗಳು ನಡೆಸಿದ ಸಂಶೋಧನೆಯಲ್ಲಿ ಹೀಗೊಂದು ಮಾಹಿತಿ ಬೆಳಕಿಗೆ ಬಂದಿದೆ. ಸಾಮಾನ್ಯವಾಗಿ ಮನುಷ್ಯರಿಗೆ ದೈಹಿಕ ಸಮಸ್ಯೆಗಳು ಅಥವಾ ಅನಾರೋಗ್ಯ ಉಂಟಾದಾಗ ಗುಣಪಡಿಸಲು ಚಿಕಿತ್ಸೆಯ ಮೊರೆ ಹೋಗುತ್ತೇವೆ. ತೀರಾ ಅಗತ್ಯ ಬಿದ್ದರೆ ವೈದ್ಯರು ಶಸ್ತ್ರಚಿಕಿತ್ಸೆಯನ್ನೂ ಮಾಡುತ್ತಾರೆ. ಅಂತಹ ಪ್ರತಿಭೆ ಕೇವಲ ಮನುಷ್ಯರಿಗೆ ಮಾತ್ರ ಇರೋದು ಅನ್ಕೊಂಡರೆ ಅದು ಖಂಡಿತ ತಪ್ಪು. ಮಾನವರು ಮಾತ್ರವಲ್ಲ, ಇರುವೆಗಳು ಕೂಡ ಆಪರೇಷನ್ ಮಾಡಿಕೊಳ್ಳುತ್ತವೆ ಎಂದರೆ ನೀವು ನಂಬಲೇಬೇಕು!

ಇದನ್ನೂ ಓದಿ:ಮೂರು ಕ್ಯಾಚ್.. ಮೂರು ವಿಶ್ವಕಪ್.. ಇವರು ಹಿಡಿದಿದ್ದು ಬರೀ ಕ್ಯಾಚ್ ಅಲ್ಲ, ವಿಶ್ವ ಕಿರೀಟ..!

ಈ ಮೂಲಕ ಮನುಷ್ಯರನ್ನು ಹೊರತುಪಡಿಸಿ ಭೂಮಿ ಮೇಲೆ ವೈದ್ಯಕೀಯ ಕಾರ್ಯಾಚರಣೆ ನಡೆಸುವ ಸಾಮರ್ಥ್ಯ ಹೊಂದಿರುವ ಎರಡನೇ ಜೀವಿ ಇರುವೆಗಳು. ಹೌದು, ಫ್ಲೋರಿಡಾದಲ್ಲಿ (Florida) ಶಸ್ತ್ರಚಿಕಿತ್ಸೆ ನಡೆಸುತ್ತಿರುವ ಇರುವೆಗಳು (Ants) ಪತ್ತೆಯಾಗಿವೆ. ಅವುಗಳನ್ನು ಕ್ಯಾಂಪೊನೋಟಸ್ (Camponotus) ಇರುವೆ ಎಂದು ಕರೆಯಲಾಗುತ್ತಿದೆ. ಅಧ್ಯಯನದಲ್ಲಿ ತಿಳಿದುಬಂದಿರುವ ಅಂಶಗಳ ಪ್ರಕಾರ, ಇವು ಗೂಡಿನಲ್ಲಿ ಸಂಗಾತಿಗಳ ಜೊತೆ ಇರುತ್ತವೆ. ಈ ಸಂದರ್ಭದಲ್ಲಿ ತಮ್ಮ ಸಂಗಾತಿಗಳ ಕಾಲುಗಳಿಗೆ ಆಗಿರುವ ಗಾಯವನ್ನು ಗುರುತಿಸುತ್ತವೆ. ಗಾಯವನ್ನು ಗುರುತಿಸಿ ಅದಕ್ಕೆ ಟ್ರೀಟ್ಮೆಂಟ್ ನೀಡಿ ಸ್ವಚ್ಛವಾಗಿ ಗುಣಪಡಿಸುತ್ತವೆ. ಕೆಲವೊಮ್ಮೆ ಕಾಲು ಅಥವಾ ಇರುವೆಗಳ ಇತರೆ ಭಾಗಗಳನ್ನು ಕತ್ತರಿಸಿ ಹಾಕುತ್ತವೆ ಎಂದು Current Biology ಜರ್ನಲ್ ಜುಲೈ 2 ರಂದು ವರದಿಯನ್ನು ಪ್ರಕಟಿಸಿದೆ.

ಜರ್ನಮನಿಯ University of Wurzburg ವಿಶ್ವವಿದ್ಯಾಲಯದ ಪರಿಸರ ಶಾಸ್ತ್ರಜ್ಞ ಎರಿಕ್ ಫ್ರಾಂಕ್ (Erik Frank) ಹೇಳುವಂತೆ.. ಜೀವ ಇರುವ ಯಾವುದೇ ಜೀವಿಗಳ ಅಂಗವನ್ನು ಕತ್ತರಿಸಬೇಕು ಅಂದಾಗ ಸಾಕಷ್ಟು ಪ್ರತಿಭೆ ಇರಬೇಕು. ಅದೊಂದು ಲಯಬದ್ಧ ಮತ್ತು ಸಂಕೀರ್ಣ ವಿಧಾನ. ಅಂತಹ ಕೆಲಸ ಮಾಡಲು ಮನುಷ್ಯರಿಗೆ ಸಾಕಷ್ಟು ಅಧ್ಯಯನ, ಸಮಯ ಹಾಗೂ ನಿಖರತೆಯ ಅಗತ್ಯ ಇರುತ್ತದೆ. ಆದರೆ ಈ ಇರುವೆಗಳ ಶಸ್ತ್ರಚಿಕಿತ್ಸೆಯು ಅಚ್ಚರಿ ತಂದಿದೆ ಎನ್ನುತ್ತಾರೆ.

ಇದನ್ನೂ ಓದಿ:ವಿಶ್ವದ ಮೊಟ್ಟ ಮೊದಲ ಕೇಸ್​.. ರೋಬೋಟ್ ಆತ್ಮಹತ್ಯೆಗೆ ಶರಣು..!

2023ರಲ್ಲಿ ಫ್ರಾಂಕ್ ಅವರ ತಂಡವು ಆಫ್ರಿಕನ್ ಇರುವೆಗಳ ಜಾತಿಗಳನ್ನು (African ant species) ಕಂಡು ಹಿಡಿದಿದೆ. ಮೆಗಾಪೊನೆರಾ (Megaponera analis) ಎಂಬ ಪ್ರಬೇಧದ ಇರುವೆ ಗಾಯಗೊಂಡ ತನ್ನ ಸಹಚರರಿಗೆ ಆಂಟಿಮೈಕ್ರೋಬಿಯಲ್ (antimicrobial substance) ಮೂಲಕ ಚಿಕಿತ್ಸೆ ನೀಡುತ್ತಿತ್ತು. ಈ antimicrobial ಇರುವೆಯ ದೇಹದಿಂದ ಹೊರ ಬರುತ್ತದೆ. ಫ್ಲೊರಿಡಾದ ಕ್ಯಾಂಪೊನೋಟಸ್ ಜಾತಿಯ ಇರುವೆಗಳು ಈ ಸಾಮರ್ಥ್ಯವನ್ನು ಹೊಂದಿಲ್ಲ. ಆದರೆ ಅವು ಕಾಲು ಕತ್ತರಿಸುವುದರಲ್ಲಿ ನಿಪುಣವಾಗಿರುತ್ತವೆ ಎಂದು ಸ್ಟಡಿ ಹೇಳಿದೆ.

ಅಧ್ಯಯನದಲ್ಲಿ ವಿಜ್ಞಾನಿಗಳು ಇರುವೆಗಳ ಎರಡು ರೀತಿಯ ಚಿಕಿತ್ಸೆಯನ್ನು ಗಮನಿಸಿದ್ದಾರೆ. ಇರುವೆಗಳ ತೊಡೆಯ ಭಾಗದಲ್ಲಿ ಸೀಳುವಿಕೆ ಆದಾಗ ಹಾಗೂ ಟಿಬಿಯಾದಲ್ಲಿ ಸೀಳುವಿಕೆ ಆದಾಗ ಅದನ್ನು ಗುಣಪಡಿಸಲು ಪ್ರಯತ್ನಿಸುತ್ತವೆ. ಮೊದಲು ಗಾಯವನ್ನು ಸ್ವಚ್ಛಗೊಳಿಸಲು ಪ್ರಯತ್ನಿಸುತ್ತವೆ. ಅದಕ್ಕಾಗಿ ಇರುವೆಗಳು ತಮ್ಮ ಬಾಯಿ ಬಳಸುತ್ತವೆ. ಒಂದು ವೇಳೆ ವಾಸಿಯಾಗದಿದ್ದರೆ ಬಾಯಿ ಮೂಲಕವೇ ಕತ್ತರಿಸಿ ಪ್ರತ್ಯೇಕಿಸಿ ಜೀವ ಉಳಿಸುತ್ತವೆಯಂತೆ.

ಎರಡು ರೀತಿಯ ಚಿಕಿತ್ಸೆಯಲ್ಲೂ ಜೀವದಾನ
ಟಿಬಿಯಾವನ್ನು ಸ್ವಚ್ಛಗೊಳಿಸುವ ಮೂಲಕ ಗಾಯವನ್ನು ವಾಸಿ ಮಾಡಲು ಪ್ರಯತ್ನಿಸುತ್ತವೆ. ಇದರಿಂದ ಅವು ಸಾಯದಂತೆ ರಕ್ಷಣೆಯಾಗುತ್ತದೆ. ತೊಡೆಯ ಮೇಲಿನ ಗಾಯವು ವಾಸಿಯಾದರೆ ಶೇಕಡಾ 40 ರಷ್ಟು ಇರುವೆಗಳು ಬದುಕುತ್ತವೆ. ತೊಡೆಯನ್ನು ಕತ್ತರಿಸಿಕೊಂಡ ಇರುವೆಗಳು ಶೇಕಡಾ 90 ರಿಂದ 95 ರಷ್ಟು ಇರುವೆಗಳು ಬದುಕುಳಿಯುತ್ತವೆ. ಅದೇ ರೀತಿ ಟಿಬಿಯಾ ಗಾಯವನ್ನು ಗುಣಪಡಿಸಿದ ನಂತರ ಶೇಕಡಾ 15 ರಿಂದ 75 ರಷ್ಟು ಪತಿಶತ ಇರುವೆಗಳು ಬದುಕುಳಿಯುತ್ತವೆ. ತೊಡೆಗೆ ಗಾಯವಾದಾಗ ಮಾತ್ರ ಇರುವೆಗಳು ಕಾಲನ್ನು ಕಚ್ಚುತ್ತವೆ. ಕಾಲಿನ ಇತರೆ ಭಾಗಗಳಲ್ಲಿ ಗಾಯವಾದರೆ ಕಾಲನ್ನು ಕತ್ತರಿಸುವುದಿಲ್ಲ. ಗಾಯಗೊಂಡ ಇರುವೆಯ ಕಾಲನ್ನು ಕತ್ತರಿಸಲು ಅವುಗಳಿಗೆ ಕನಿಷ್ಠ 40 ನಿಮಿಷಗಳು ಬೇಕಾಗುತ್ತದೆ ಎಂದು ವಿಜ್ಞಾನಿಗಳು ಹೇಳುತ್ತಾರೆ.

Micro-CT scans ಬಳಸಿ ಅಧ್ಯಯನ
ಈ ಅಧ್ಯಯನಕ್ಕಾಗಿ ವಿಜ್ಞಾನಿಗಳು ಮೈಕ್ರೋ ಸಿಟಿ ಸ್ಕ್ಯಾನ್ ಸಹಾಯವನ್ನು ತೆಗೆದುಕೊಂಡರು. ಗಾಯಗೊಂಡ ಕಾಲಿನಿಂದ ರಕ್ತ ಸೋರುತ್ತಿದ್ದಾಗ, ರಕ್ತವನ್ನು ಪೂರೈಸುವ ಸ್ನಾಯುಗಳಲ್ಲಿನ ರಕ್ತದ ಹರಿವನ್ನು ನಿಧಾನಗೊಳಿಸುವುದನ್ನೂ ವಿಜ್ಞಾನಿಗಳು ಕಂಡುಕೊಂಡಿದ್ದಾರೆ ಎಂದು ವರದಿಯಾಗಿದೆ. ಏನೇ ಇರಲಿ. ನೋಡೋಕೆ ಇರುವೆ ಅಂತೀವಿ. ಮನುಷ್ಯರನ್ನೂ ಮೀರಿ ಚಿಕಿತ್ಸೆ ನೀಡುವ ಕಲೆಗಾರಿಕೆ ಮತ್ತು ನ್ಯಾಕ್ ಇರುವೆಗಳಿಗೆ ಇದೆ ಅಂದರೆ ಅದು ಸಾಮಾನ್ಯ ಸಂಗತಿಯೇನಲ್ಲ.

ವಿಶೇಷ ವರದಿ: ಗಣೇಶ್ ಕೆರೆಕುಳಿ

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ