ಈ ಇಬ್ಬರು ಎಷ್ಟು ವರ್ಷಗಳಿಂದ ಪ್ರೀತಿ ಮಾಡುತ್ತಿದ್ದರು ಗೊತ್ತಾ..?

ಇಲ್ಲಿನ ಸಂಪ್ರದಾಯದಂತೆ ಮದುವೆ ಆಗುವುದು ಯುವತಿಯ ಆಸೆ

ಮೊದಲು ಕ್ರಿಶ್ಚಿಯನ್​ನಂತೆ, ಈಗ ನಮ್ಮ ಸಂಸ್ಕೃತಿಯಂತೆ ಮದುವೆ

ಚೆನ್ನೈ: ತಮಿಳುನಾಡಿನ ಯುವಕನೊಬ್ಬ ಉನ್ನತ ವ್ಯಾಸಂಗಕ್ಕಾಗಿ ಫ್ರಾನ್ಸ್ ಹೋಗಿ ಅಲ್ಲಿನ ಯುವತಿಯನ್ನ ಪ್ರೀತಿಸಿ, ಭಾರತೀಯ ಸಂಪ್ರದಾಯದಂತೆ ಮದುವೆಯಾಗಿದ್ದಾರೆ.

ತಮಿಳುನಾಡಿನ ತೇನಿ ಜಿಲ್ಲೆಯ ಮುತ್ತುದೇವನೆಪಟ್ಟಿ ಹಳ್ಳಿಗೆ ಸೇರಿದ ಭೋಜನ್ ಹಾಗೂ ಕಾಳಿಯಮ್ಮ ಎನ್ನುವರ ಮಗ ಕಳೈರಾಜನ್ ಎನ್ನುವ ಯುವಕ ಸದ್ಯ ಫ್ರಾನ್ಸ್​ ಯುವತಿಯನ್ನ ವಿವಾಹವಾಗಿದ್ದಾರೆ. ಕಳೈರಾಜನ್ ಅವರಿಗೆ ತಂದೆ ಇಲ್ಲ, ಆದರೂ ಉನ್ನತ ವ್ಯಾಸಂಗ ಮಾಡುವುದಕ್ಕಾಗಿ 2017ರಲ್ಲಿ ಫ್ರಾನ್ಸ್​ಗೆ ಹೋಗಿದ್ದರು. ಅಲ್ಲಿ ಪ್ರೆಂಚ್​ ಯುವತಿ ಮ್ಯಾರಿಯನ್​ ಎನ್ನುವ ಯುವತಿ ಜೊತೆ ಸ್ನೇಹ ಬೆಳೆದು ನಂತರ ಪ್ರೀತಿಯಾಗಿ ಮಾರ್ಪಟ್ಟಿದೆ.

ಈ ಬಗ್ಗೆ ಎರಡು ಕುಟುಂಬಕ್ಕೆ ವಿಷಯ ಗೊತ್ತಾಗಿ ಕಳೆದ ಮೇನಲ್ಲಿ ಫ್ರಾನ್ಸ್​ನಲ್ಲೇ ಕ್ರಿಶ್ಚಿಯನ್ ಪದ್ಧತಿಯಂತೆ ಮದುವೆ ಮಾಡಲಾಗಿತ್ತು. ಆದರೆ ಭಾರತದ ಸಂಪ್ರದಾಯದಂತೆ ಮದುವೆಯಾಗಬೇಕು ಎನ್ನುವುದು ಯುವತಿಯ ಆಸೆ ಆಗಿತ್ತು. ಅದರಂತೆ ತಮಿಳುನಾಡಿನ ತೇನಿ ಜಿಲ್ಲೆಯ ಸಮೀಪದ ವಿರಪಾಂಡಿಯಲ್ಲಿ ತಮಿಳು ಸಂಪ್ರದಾಯದಂತೆ ಮದುವೆಯಾಗಿ ಖುಷಿ ಪಟ್ಟಿದ್ದಾರೆ. ಈ ವೇಳೆ ಯುವತಿಯ ಕುಟುಂಬಸ್ಥರೆಲ್ಲ ಸಮಾರಂಭದಲ್ಲಿ ಭಾಗಿಯಾಗಿದ್ದರು.

ಸದ್ಯ ಈ ಸಂಬಂಧ ನವ ವಧು ಮ್ಯಾರಿಯನ್ ಮಾತನಾಡಿ, ನಾವಿಬ್ಬರು ಪ್ರೀತಿ ಮಾಡಲು ಪ್ರಾರಂಭಿಸಿ 10 ವರ್ಷಗಳು ಕಳೆದಿವೆ. ಫ್ರಾನ್ಸ್​ನಲ್ಲೇ ನಮ್ಮಿಬ್ಬರ ಮಧ್ಯೆ ಪ್ರೀತಿ ಹುಟ್ಟಿತ್ತು. ಭಾರತದ ಸಂಪ್ರದಾಯದಂತೆ ಮದುವೆ ಆಗಿರುವುದು ನನಗೆ ತುಂಬಾ ಖುಷಿ ಕೊಟ್ಟಿದೆ. ಎಲ್ಲರನ್ನೂ ಭೇಟಿ ಮಾಡಿದೆ. ನನ್ನ ಕುಟುಂಬದಂತೆ ಅನಿಸಿತು ಎಂದು ಹೇಳಿದ್ದಾರೆ.

ಇದನ್ನೂ ಓದಿ: ಸ್ವಂತ ಖರ್ಚಿನಲ್ಲಿ ದೇಗುಲ ನಿರ್ಮಾಣ! ಪರೋಪಕಾರಿ ಅಮ್ಮನ ಬಾಲ್ಯದ ಕನಸು ನನಸಾಗುವ ಸಂಭ್ರಮ

ಕಳೈರಾಜನ್ ಮಾತನಾಡಿ, ಫ್ರಾನ್ಸ್​ಗೆ ಓದುವುದಕ್ಕೆ ಹೋಗಿದ್ದಾಗ ಮ್ಯಾರಿಯನ್ ಪರಿಚಿತರಾದರು. ಮೊದ ಮೊದಲು ಇಬ್ಬರಿಗೂ ಭಯ ಇತ್ತು. ಆದರೆ ಹೋಗುತ್ತಾ ಎಲ್ಲ ಸಾಮಾನ್ಯ ಆಯಿತು. ಫ್ರಾನ್ಸ್​ನಲ್ಲಿ ಈಗಾಗಲೇ ಕ್ರಿಶ್ಚಿಯನ್ ಸಂಪ್ರದಾಯದಂತೆ ಮದುವೆ ಆಗಿದೆ. ಆದರೆ ಇಲ್ಲಿನ ಸಂಪ್ರದಾಯದಂತೆ ಮದುವೆ ಆಗುವುದು ಇವರಿಗೆ ಇಷ್ಟವಿದ್ದ ಕಾರಣ ಇದೀಗ ನಮ್ಮ ಸಂಸ್ಕೃತಿಯಂತೆ ಮದುವೆ ನೆರವೇರಿದೆ ಎಂದು ಹೇಳಿದ್ದಾರೆ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ