ಸಿನಿಮಾ ಮತ್ತು ಕ್ರೀಡಾ ಲೋಕದ ಗಣ್ಯರಿಗೆ ಕಾಂಗ್ರೆಸ್​ ಗಾಳ

ಕಾಂಗ್ರೆಸ್​ ಸೇರಿದ ಭಾರತ ಹಾಕಿ ತಂಡದ ಮಾಜಿ ಕ್ಯಾಪ್ಟನ್!

ನನಗೆ ರಾಹುಲ್​ ಗಾಂಧಿಯೇ ಸ್ಫೂರ್ತಿ ಎಂದ ಪ್ರಬೋಧ್ ಟಿರ್ಕಿ

ಭುವನೇಶ್ವರ್: ಇತ್ತೀಚೆಗೆ ಕರ್ನಾಟಕ ರಾಜ್ಯ ವಿಧಾನಸಭಾ ಚುನಾವಣೆಯಲ್ಲಿ ಭರ್ಜರಿ ಗೆಲುವು ಸಾಧಿಸಿದ ಕಾಂಗ್ರೆಸ್​ ಇಡೀ ದೇಶಾದ್ಯಂತ ಎಲ್ಲಾ ಎಲೆಕ್ಷನ್​​​ಗಳ ಮೇಲೂ ಹದ್ದಿನ ಕಣ್ಣಿಟ್ಟಿದೆ. ಹೀಗಾಗಿ ಸಿನಿಮಾ, ಕ್ರೀಡಾ ಲೋಕ ಹೀಗೆ ಎಲ್ಲಾ ಕ್ಷೇತ್ರದ ಗಣ್ಯರಿಗೂ ಪಕ್ಷ ಸೇರುವಂತೆ ಆಹ್ವಾನ ನೀಡಿದೆ. ಈಗ ಸದ್ಯದಲ್ಲೇ ಒಡಿಶಾ ರಾಜ್ಯ ವಿಧಾನಸಭಾ ಚುನಾವಣೆ ನಡೆಯಲಿದ್ದು, ಕಾಂಗ್ರೆಸ್​ ಭರ್ಜರಿ ತಯಾರಿ ನಡೆಸಿಕೊಂಡಿದೆ.

ಹೌದು, ಚುನಾವಣೆ ಸಮೀಪಿಸುತ್ತಿದ್ದಂತೆಯೇ ಸಿನಿಮಾ ಮತ್ತು ಕ್ರೀಡಾ ಲೋಕದ ಗಣ್ಯರು ಕಾಂಗ್ರೆಸ್​ ಕದ ತಟ್ಟುತ್ತಿದ್ದಾರೆ. ಈಗ ಭಾರತ ಹಾಕಿ ತಂಡದ ಮಾಜಿ ಕ್ಯಾಪ್ಟನ್​​ ಪ್ರಬೋಧ್ ಟಿರ್ಕಿ ಕಾಂಗ್ರೆಸ್ ಸೇರಿದ್ದಾರೆ. ಜತೆಗೆ ಮುಂದಿನ ವಿಧಾನಸಭಾ ಚುನಾವಣೆಯಲ್ಲಿ ತಲ್ಸಾರಾ ಕ್ಷೇತ್ರದಿಂದ ಸ್ಪರ್ಧಿಸುವ ಆಸೆ ವ್ಯಕ್ತಪಡಿಸಿದ್ದಾರೆ.

ಇನ್ನು, ಕಾಂಗ್ರೆಸ್​ ಸೇರಿದ ಬಳಿಕ ಮಾತಾಡಿದ ಪ್ರಬೋಧ್ ಟಿರ್ಕಿ, ಒಡಿಶಾ ಪ್ರದೇಶ ಕಾಂಗ್ರೆಸ್ ಸಮಿತಿಯ ಅಧ್ಯಕ್ಷ ಶರತ್ ಪಟ್ಟನಾಯಕ್ ಸಮ್ಮುಖದಲ್ಲೇ ಪಕ್ಷ ಸೇರ್ಪಡೆ ಆಗಿದ್ದೇನೆ. ನಾನು ಕಾಂಗ್ರೆಸ್​ ಸೇರಲು ರಾಹುಲ್​ ಗಾಂಧಿಯವರೇ ಕಾರಣ. ರಾಹುಲ್​​ ಗಾಂಧಿ ಕೆಲಸದಿಂದ ಸಾಕಷ್ಟು ಪ್ರಭಾವಿತನಾಗಿದ್ದೇನೆ ಎಂದರು.

ಪ್ರಬೋಧ್ ಟಿರ್ಕಿ ಯಾರು..?

ಇವರು ಭಾರತ ಹಾಕಿ ತಂಡದ ಮಾಜಿ ಕ್ಯಾಪ್ಟನ್​​. ಟಿರ್ಕಿ ಸುಮಾರು 130ಕ್ಕೂ ಹೆಚ್ಚು ಅಂತರಾಷ್ಟ್ರೀಯ ಪಂದ್ಯಗಳನ್ನು ಆಡಿದ್ದಾರೆ. 2007ರಲ್ಲಿ ಏಷ್ಯಾಕಪ್​ ಗೆದ್ದಾಗ ಟಿರ್ಕಿ ಭಾರತ ಹಾಕಿ ತಂಡದ ಭಾಗವಾಗಿದ್ದರು. ಇವರಿಗೆ ಏಕಲವ್ಯ ಸೇರಿದಂತೆ ಹಲವು ರಾಷ್ಟ್ರೀಯ ಪ್ರಶಸ್ತಿಗಳು ಲಭಿಸಿವೆ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ