IPLನಲ್ಲಿ ಕನ್ನಡಿಗನ ಸಾಧನೆಗಳೇನು.. KL ರಾಹುಲ್ ಯಾವ ಟೀಮ್​ನಲ್ಲಿ ಉತ್ತಮ ಪರ್ಫಾಮೆನ್ಸ್ ನೀಡಿದ್ದಾರೆ?

ಕ್ರಿಕೆಟ್ ಆಸಕ್ತಿಯನ್ನ ಇನ್ನಷ್ಟು ಹೆಚ್ಚು ಮಾಡಿದ್ದು ಎಂದರೆ ಅದು ಐಪಿಎಲ್​. ಇದರಲ್ಲಿ ದೇಶಿಯ ಆಟಗಾರರು ಸೇರಿದಂತೆ ವಿದೇಶಿ ಪ್ಲೇಯರ್ಸ್ ಕೂಡ ಆಡುತ್ತಾರೆ. ಸದ್ಯ ಐಪಿಎಲ್ ಫ್ರಾಂಚೈಸಿಗಳು ತಮಗೆ ಬೇಕಾದ ಆಟಗಾರರನ್ನ ಉಳಿಸಿಕೊಂಡು ಉಳಿದವರನ್ನ​ ರಿಲೀಸ್ ಮಾಡಿವೆ. ಲಕ್ನೋ ಟೀಮ್​ ಕ್ಯಾಪ್ಟನ್ ಆಗಿದ್ದ ಕೆ.ಎಲ್ ರಾಹುಲ್ ಕೂಡ ಹೊರ ಬಂದಿದ್ದು ಮೆಗಾ ಆಕ್ಷನ್​ಗೆ ಎಂಟ್ರಿ ಕೊಟ್ಟಿದ್ದಾರೆ. ಸದ್ಯ ಇದೆಲ್ಲವನ್ನ ಪಕ್ಕಕ್ಕಿಟ್ಟು ಐಪಿಎಲ್​ನಲ್ಲಿ ಕನ್ನಡಿಗನ ಸಾಧನೆ ಏನು?.

2013ರಲ್ಲಿ ಐಪಿಎಲ್​​ಗೆ ಪಾದಾರ್ಪಣೆ ಮಾಡಿದ ಕೆ.ಎಲ್ ರಾಹುಲ್ ಅವರು ರಾಯಲ್ ಚಾಲೆಂಜರ್ಸ್​ ಬೆಂಗಳೂರು ಟೀಮ್​ನಲ್ಲಿ ಆಡಿದ್ದರು. ಒಂದೇ ವರ್ಷ ಅಷ್ಟೇ ಆರ್​ಸಿಬಿಯಲ್ಲಿ ಆಡಿದ್ದ ರಾಹುಲ್ 2014ರಲ್ಲಿ ಹೈದ್ರಾಬಾದ್​ ತಂಡದಲ್ಲಿ ಸ್ಥಾನ ಪಡೆದರು. ಇಲ್ಲಿ ಎರಡು ವರ್ಷ ಆಡಿದ ರಾಹುಲ್ 2016ರಲ್ಲಿ ಮತ್ತೆ ಆರ್​​ಸಿಬಿಗೆ ಮರಳಿದರು. 2017ರ ಸಮಯದಲ್ಲಿ ಗಾಯಕ್ಕೆ ತುತ್ತಾಗಿದ್ದರಿಂದ ಐಪಿಎಲ್​ ಟೂರ್ನಿಯಲ್ಲಿ ಆಡಲಿಲ್ಲ. ಮರುವರ್ಷ 2018ರಲ್ಲಿ ಪಂಜಾಬ್ ಸೇರಿಕೊಂಡರು. ಸೇರಿದ ವರ್ಷ ಭರ್ಜರಿ ಬ್ಯಾಟಿಂಗ್ ಮಾಡಿ 659 ರನ್​ಗಳನ್ನ ಬಾರಿಸಿದ್ದರು. ಈ ವರ್ಷ ಮಾತ್ರವಲ್ಲ, ಪಂಜಾಬ್​ನಲ್ಲಿದ್ದ 4 ವರ್ಷವೂ 600 ರನ್ ಗಡಿ ದಾಟಿಸಿದ್ದರು. ಆದರೆ 2022ರಲ್ಲಿ ಲಕ್ನೋ ಟೀಮ್​ಗೆ ಕ್ಯಾಪ್ಟನ್ ಆಗಿ ಸೇರ್ಪಡೆಗೊಂಡ ರಾಹುಲ್ ಅವರು ಇದುವರೆಗೂ ಅದೇ ಟೀಮ್​ನಲ್ಲಿದ್ದು 2024ರ ಟೂರ್ನಿಯಲ್ಲಿ 520 ರನ್​ಗಳನ್ನ ಕಲೆ ಹಾಕಿದ್ದರು.

ಇದನ್ನೂ ಓದಿ:ಭಾರತದ ಗೆಲುವಿಗೆ KL ರಾಹುಲ್​​​​ ಕಾರಣ ಎಂದ ಕ್ಯಾಪ್ಟನ್​ ರೋಹಿತ್​​.. ಅಸಲಿ ಸತ್ಯ ಬಿಚ್ಚಿಟ್ರು!

ಐಪಿಎಲ್​ನಲ್ಲಿ ರಾಹುಲ್ ಸಾಧನೆ ನೋಡುವುದಾದರೆ..

ಐಪಿಎಲ್​ನಲ್ಲಿ 132 ಪಂದ್ಯಗಳನ್ನ ಕೆ.ಎಲ್ ರಾಹುಲ್ ಅವರು ಆಡಿದ್ದು ಒಟ್ಟು 4,683 ರನ್​ಗಳನ್ನ ಗಳಿಸಿದ್ದಾರೆ. ಇದರಲ್ಲಿ ನಾಲ್ಕು ಸೆಂಚುರಿಗಳು ಸೇರಿದ್ದು ಪಂಜಾಬ್​​ ತಂಡದಲ್ಲಿದ್ದಾಗ 132 ರನ್​ಗಳು ಹೊಡೆದಿರುವುದು ವೈಯಕ್ತಿಕವಾದ ಗರಿಷ್ಠ ರನ್ ಆಗಿದೆ. 37 ಅರ್ಧ ಶತಕಗಳನ್ನ ಬಾರಿಸಿದ್ದಾರೆ. 400 ಬೌಂಡರಿ ಬಾರಿಸಿರುವ ರಾಹುಲ್​ ಒಟ್ಟು 187 ಸಿಕ್ಸರ್​ಗಳನ್ನ ಸಿಡಿಸಿದ್ದಾರೆ.

2020-21ರಲ್ಲಿ ಪಂಜಾಬ್ ತಂಡದಲ್ಲಿ ಆಡುವಾಗ ಕೆ.ಎಲ್ ರಾಹುಲ್ ಅವರು 670 ರನ್​ಗಳನ್ನು ಗಳಿಸಿದ್ದರು. ಇದೇ ಐಪಿಎಲ್​ ಟೂರ್ನಿಗಳಲ್ಲಿ ಗಳಿಸಿರುವ ಗರಿಷ್ಠ ರನ್ ಆಗಿದೆ. ಇನ್ನು ಇದೇ ಟೀಮ್​ನಲ್ಲಿ ಆಡುವಾಗ ಎರಡು ಬಾರಿ ಸೆಂಚುರಿಗಳನ್ನ ಮಿಸ್ ಮಾಡಿಕೊಂಡಿದ್ದಾರೆ. ಒಮ್ಮೆ 95 ರನ್​ ಮತ್ತೊಮ್ಮೆ 98 ರನ್ ಗಳಿಸಿ ನಾಟೌಟ್ ಆಗಿ ಉಳಿದಿದ್ದಾರೆ. ಇನ್ನುಳಿದಂತೆ ವಿಕೆಟ್ ಕೀಪಿಂಗ್ ಮಾಡುವ ರಾಹುಲ್ ಅವರು ಒಟ್ಟು 78 ಕ್ಯಾಚ್​ಗಳನ್ನು ಹಿಡಿದಿದ್ದಾರೆ.

ಲಕ್ನೋ ಟೀಮ್​ನಲ್ಲೂ ಕನ್ನಡಿಗ ಒಳ್ಳೆಯ ಪರ್ಫಾಮೆನ್ಸ್ ನೀಡಿದ್ದಾರೆ. 2022ರಲ್ಲಿ ತಂಡಕ್ಕೆ ಸೇರಿದ ವರ್ಷವೇ 1 ಸೆಂಚುರಿ ಸಮೇತ 616 ರನ್​ಗಳನ್ನು ಗಳಿಸಿದ್ದರು. 2023ರಲ್ಲಿ ಇಂಜುರಿಗೆ ತುತ್ತಾಗಿದ್ದ ಅವರು 9 ಪಂದ್ಯಗಳಲ್ಲಿ 274 ರನ್​ಗಳ ಗಳಿಸಿದ್ದರು. 2024ರಲ್ಲೂ ಉತ್ತಮ ಪರ್ಫಾಮೆನ್ಸ್ ನೀಡಿದ ಕನ್ನಡಿಗ 520 ರನ್​ಗಳನ್ನ ಗಳಿಸಿ ಜೊತೆಗೆ ಕ್ಯಾಪ್ಟನ್ಸಿಯನ್ನು ಉತ್ತಮವಾಗಿಯೇ ನಿಭಾಯಿಸಿದ್ದರು.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ