ಈ ಕಾರು ಖರೀದಿಸೋರಿಗೆ ಸೂಪರ್ ಸುದ್ದಿ.. 1.56 ಲಕ್ಷ ರೂಪಾಯಿವರೆಗೆ ಇಳಿಕೆ..!

ದಸರಾ ಮತ್ತು ದೀಪಾವಳಿಗೆ ಮೋದಿ ಸರ್ಕಾರ ದೇಶದ ಜನರಿಗೆ ಸಿಹಿ ಸುದ್ದಿ ನೀಡಿದೆ. ಗ್ರಾಹಕರ ತಲೆ ಮೇಲಿದ್ದ ಜಿಎಸ್‌ಟಿ ತೆರಿಗೆ ಭಾರವನ್ನ ಕೇಂದ್ರ ಸರ್ಕಾರ ಇಳಿಸಿದೆ. ಅಂದು ಕೆಂಪುಕೋಟೆ ಮೇಲೆ ನಿಂತು ಪ್ರಧಾನಿ ಮೋದಿ ನೀಡಿದ್ದ ವಾಗ್ದಾನ ನಿಜವಾಗಿದ್ದು, ಹೊಸ ಜಿಎಸ್​​ಟಿ ನಿಯಮದ ಬಗ್ಗೆ ಪ್ರಧಾನಿ ನರೇಂದ್ರ ಮೋದಿ ಮಾತನಾಡಿದ್ದಾರೆ..

ಇಂದು ಸೆಪ್ಟೆಂಬರ್​ 22.. ನವರಾತ್ರಿ ಮೊದಲ ದಿನ.. ರಾಜ್ಯದಲ್ಲಿ ನಾಡಹಬ್ಬ ದಸರಾ ಸಂಭ್ರಮ.. ಈ ಸುದಿನದಂದೇ ಕೇಂದ್ರ ಸರ್ಕಾರ ದೇಶದ ಜನಸಮಾನ್ಯರಿಗೆ ಭರ್ಜರಿ ಗಿಫ್ಟ್ ಕೊಟ್ಟಿದೆ.. ಇಂದಿನಿಂದ ಜಿಎಸ್​ಟಿ .20 ಪರಿಷ್ಕರಣೆ ಜಾರಿ ಬರಲಿದ್ದು, ಉಳಿತಾಯ ಉತ್ಸವ ಶುರುವಾಗಲಿದೆ.

ಇಷ್ಟು ದಿನ ದರ ಏರಿಕೆಯಿಂದ ಕಂಗೆಟ್ಟಿದ್ದ ಜನರಿಗೆ ಕೇಂದ್ರ ಸರ್ಕಾರ ಸಿಹಿ ಸುದ್ದಿ ಕೊಟ್ಟಿದೆ.. ಇಂದಿನಿಂದ ದೇಶಾದ್ಯಂತ ಜಿಎಸ್​ಟಿ 2.0 ಜಾರಿಯಾಗಲಿದ್ದು, ಡೈರಿಯಿಂದ ಕಾರುಗಳು ಮತ್ತು ಎಲೆಕ್ಟ್ರಾನಿಕ್ಸ್‌ವರೆಗೆ ಸುಮಾರು 375 ವಸ್ತುಗಳು ಅಗ್ಗವಾಗಲಿವೆ. ಇಂದಿನಿಂದ 4 ಸ್ಲ್ಯಾಬ್​ಗಳ ಬದಲು 2 ಸ್ಲ್ಯಾಬ್​​​ಗಳಲ್ಲಿ ಜಿಎಸ್​ಟಿ ಜಾರಿಯಾಗಲಿದೆ. ಇದ್ರಿಂದ ದೇಶದ ಮಧ್ಯಮ ವರ್ಗದವರ ಜೀವನ ನಿರ್ವಹಣೆಯ ಹೊರೆ ಕೊಂಚ ಕಡಿಮೆ ಆಗಲಿದೆ.

ದಿನಬಳಕೆ ವಸ್ತುಗಳಾದ ಟೂತ್‌ಪೇಸ್ಟ್, ಶಾಂಪೂ ಸೋಪುಗಳ ಬೆಲೆ ಶೇ.12ರಿಂದ 5ಕ್ಕೆ ಇಳಿಕೆಯಾಗಲಿದೆ. ಪ್ಯಾಕೇಜ್ ಕುರುಕಲು ತಿಂಡಿ, ಅಡುಗೆ ಸಾಮಗ್ರಿಗಳು, ಬೈಸಿಕಲ್​​, ಸ್ಟೇಷನರಿ ವಸ್ತುಗಳು, ಮಕ್ಕಳ ನ್ಯಾಪ್‌ಕಿನ್‌ ಹಾಗೂ ಹೊಲಿಗೆ ಯಂತ್ರಗಳ ಮೇಲಿನ ಜಿಎಸ್​ಟಿಯನ್ನ ಕೇಂದ್ರ ಸರ್ಕಾರ ಕಡಿಮೆ ಮಾಡಿದೆ.

ಎಲ್ಲ ಮಾದರಿಯ ಟಿವಿ, ಎಸಿ ಹಾಗೂ ಫ್ರಿಡ್ಜ್​ಗಳ ಬೆಲೆ ಕಡಿಮೆಯಾಗಲಿದೆ.. ಇನ್ನು, ಆಟೋ ಮೊಬೈಲ್​ ಕ್ಷೇತ್ರದಲ್ಲಿ ಬಂಪರ್​ ಲಾಟರಿ ಹೊಡೆದಿದ್ದು, 350 ಸಿಸಿ ಒಳಗಿನ ಬೈಕ್​ ಹಾಗೂ 1200 ಸಿಸಿ ಒಳಗಿನ ಕಾರುಗಳ ಬೆಲೆ ಹೊಸ ಜಿಎಸ್​ಟಿ ನಿಯಮದಿಂದ ಕಡಿಮೆಯಾಗಲಿದೆ.

ಜಿಎಸ್​ಟಿ ಇಳಿಕೆ ಹಿನ್ನೆಲೆ ಕೆಎಂಎಫ್ ತನ್ನ ನಂದಿನಿ ಬ್ರಾಂಡ್‌ನ ಹಾಲಿನ ಉತ್ಪನ್ನಗಳ ದರವನ್ನು ಕಡಿಮೆ ಮಾಡಿದ್ದು, ಇಂದಿನಿಂದ ಪರಿಷ್ಕೃತ ದರ ಜಾರಿಗೆ ಬರಲಿದೆ. ಒಂದು ಕೆ.ಜಿ ನಂದಿನಿ ತುಪ್ಪ 40 ರೂಪಾಯಿ ಕಡಿಮೆ ಆಗಲಿದೆ.  ಬೆಣ್ಣೆ, ಚೀಸ್‌, ಪನ್ನೀರ್‌ ಬೆಲೆಯೂ ಕಡಿಮೆ ಆಗಲಿದೆ. ಇನ್ನು ಮಧ್ಯಮ ವರ್ಗದ ಕುಟುಂಬಗಳಿಗೆ ಕಾರು ಖರೀದಿ ಮತ್ತಷ್ಟು ಸುಲಭವಾಗಲಿದೆ. ದೇಶದ ಅತಿ ದೊಡ್ಡ ಕಾರು ತಯಾರಿಕಾ ಕಂಪನಿಯಾದ ಮಾರುತಿ ಸುಜುಕಿಯ ಸಣ್ಣ ಕಾರಿನಿಂದ SUVವರೆಗಿನ ಹಲವು ಮಾದರಿಗಳಲ್ಲಿ ಬೆಲೆ ₹1 ಲಕ್ಷಕ್ಕಿಂತ ಹೆಚ್ಚು ಕಡಿಮೆಯಾಗಿವೆ.

ಆಟೋ ಮೊಬೈಲ್ ಉತ್ಪಾದಕ ಮಹೀಂದ್ರಾ ಅಂಡ್ ಮಹೀಂದ್ರಾ ಕಂಪನಿ ನಿನ್ನೆಯಿಂದಲೇ ಹೊಸ ಬೆಲೆಗಳನ್ನು ಜಾರಿಗೆ ತಂದಿದೆ. ಈಗ ಮಹೀಂದ್ರಾ ಕಂಪನಿಯ ಕಾರುಗಳನ್ನು ಖರೀದಿಸೋದ್ರಿಂದ 1.56 ಲಕ್ಷ ರೂಪಾಯಿ ಅಗ್ಗವಾಗಿದೆ. 

ಜಿಎಸ್​ಟಿ ಪರಿಷ್ಕೃತ ದರ ಇಂದಿನಿಂದಲೇ ಜಾರಿಗೆ ಬರಲಿದ್ದು, ಇದನ್ನು ಉಳಿತಾಯ ಉತ್ಸವ ಎಂದು ಪ್ರಧಾನಿ ಮೋದಿ ಕರೆದಿದ್ದಾರೆ. ಆದ್ರೆ ಇದನ್ನು ವಿಪಕ್ಷಗಳು ಟೀಕಿಸಿದ್ದು, ಜಿಎಸ್‌ಟಿ ಕೌನ್ಸಿಲ್‌ನ ನಿರ್ಧಾರಗಳಿಗೆ ಮೋದಿ ಕ್ರೆಡಿಟ್ ಪಡೆಯುತ್ತಿದ್ದಾರೆ. ಈಗಾಗಲೇ ಆಗಿರುವ ಗಾಯಕ್ಕೆ ಬ್ಯಾಂಡೇಜ್‌ ಹಾಕಿದಂತಿದೆ ಎಂದು ಕಿಡಿಕಾರಿವೆ.

ಅದೇನೆ ಇರಲಿ ಕೇಂದ್ರ ಸರ್ಕಾರದ ಹೊಸ ಜಿಎಸ್‌ಟಿ ನಿಯಮ ಮಧ್ಯವರ್ಗದ ಕುಟುಂಬದ ಹೊರೆಯನ್ನು ಕೊಂಚ ಕಡಿಮೆ ಮಾಡಲಿದೆ. ಈ ಮೂಲಕ ದೇಶವಾಸಿಗಳಿಗೆ ನವರಾತ್ರಿ ಹಾಗೂ ದಸರಾ ಹಬ್ಬಕ್ಕೆ ಮೋದಿ ಸರ್ಕಾರ ಶುಭ ಸುದ್ದಿ ನೀಡಿದೆ.