40s and laid off: ಬಜೆಟ್​​ನಲ್ಲಿ ಅನುಭವಿ ವೃತ್ತಿಪರರ ನಿರೀಕ್ಷೆ ಹುಸಿಯಾಗಿದ್ದೇಕೆ..? ದಾರಿ ಯಾವುದಯ್ಯ?

2026ರ ಆರಂಭವು ಭಾರತದ ತಂತ್ರಜ್ಞಾನ ಕಾಶಿ ಬೆಂಗಳೂರು ಸೇರಿದಂತೆ ಹೈದರಾಬಾದ್ ಮತ್ತು ಚೆನ್ನೈನ ಸಾವಿರಾರು ಐಟಿ ವೃತ್ತಿಪರರಿಗೆ ಆಶಾದಾಯಕವಾಗಿಲ್ಲ. ಜಾಗತಿಕ ತಂತ್ರಜ್ಞಾನ ಸಂಸ್ಥೆಗಳು ತಮ್ಮ ಉದ್ಯೋಗಿಗಳ ಕಡಿತವನ್ನು ಮುಂದುವರಿಸಿದ್ದು, ಮಧ್ಯಮ ಹಂತದ (Mid-career) ಉದ್ಯೋಗಿಗಳು ಅನಿಶ್ಚಿತತೆಯ ಸುಳಿಗೆ ಸಿಲುಕಿದ್ದಾರೆ.

ಈ ಬಾರಿಯ ಕೇಂದ್ರ ಬಜೆಟ್ ತಮ್ಮ ಉದ್ಯೋಗದ ಭದ್ರತೆಗೆ ಅಥವಾ ಮರು-ಕೌಶಲ್ಯ (Reskilling) ಅಭಿವೃದ್ಧಿಗೆ ಹೊಸ ದಾರಿ ತೋರಿಸಬಹುದು ಎಂದು ವೃತ್ತಿಪರರು ನಂಬಿದ್ದರು. ಆದರೆ, ಬಜೆಟ್ ಘೋಷಣೆಗಳು ಅವರ ಇಂದಿನ ಆತಂಕಕ್ಕೆ ತಕ್ಷಣದ ಪರಿಹಾರ ನೀಡುವಲ್ಲಿ ವಿಫಲವಾಗಿವೆ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ.

ಬಜೆಟ್‌ನಲ್ಲಿ ಏನಿದೆ? ಏನಿಲ್ಲ?

AI ಅಧ್ಯಯನ ಸಮಿತಿ: ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ಮತ್ತು ಆಟೊಮೇಷನ್‌ನಿಂದ ಉದ್ಯೋಗಗಳ ಮೇಲಾಗುವ ಪರಿಣಾಮಗಳನ್ನು ಅಧ್ಯಯನ ಮಾಡಲು ಸರ್ಕಾರ ಒಂದು ಉನ್ನತ ಮಟ್ಟದ ಸಮಿತಿಯನ್ನು ರಚಿಸಿದೆ. ಐಟಿ, ಫೈನಾನ್ಸ್, ಪ್ರವಾಸೋದ್ಯಮ ಮತ್ತು ಆರೋಗ್ಯ ಕ್ಷೇತ್ರಗಳಲ್ಲಿ ಉದ್ಯೋಗದ ಸ್ವರೂಪ ಹೇಗೆ ಬದಲಾಗುತ್ತಿದೆ ಎಂಬುದನ್ನು ಇದು ವಿಶ್ಲೇಷಿಸಲಿದೆ.

ದೂರದೃಷ್ಟಿ vs ಸದ್ಯದ ಬಿಕ್ಕಟ್ಟು: 2047ರ ವೇಳೆಗೆ ಜಾಗತಿಕ ಸೇವಾ ಮಾರುಕಟ್ಟೆಯಲ್ಲಿ ಭಾರತದ ಪಾಲನ್ನು ಶೇ. 10ಕ್ಕೆ ಹೆಚ್ಚಿಸುವ ಗುರಿಯನ್ನು ಸರ್ಕಾರ ಹೊಂದಿದೆ. ಇಂದು ಕೆಲಸ ಕಳೆದುಕೊಳ್ಳುತ್ತಿರುವವರಿಗೆ ಯಾವುದೇ ‘ಸೇಫ್ಟಿ ನೆಟ್’ (ಆರ್ಥಿಕ ರಕ್ಷಾಕವಚ) ಘೋಷಿಸಿಲ್ಲ.

ಶಿಕ್ಷಣಕ್ಕೆ ಒತ್ತು: ಹೊಸ ವಿನ್ಯಾಸ ಸಂಸ್ಥೆಗಳು, ವಿದ್ಯಾರ್ಥಿನಿಯರ ಹಾಸ್ಟೆಲ್‌ಗಳು ಮತ್ತು ಕೌಶಲ್ಯ ತರಬೇತಿ ಕೇಂದ್ರಗಳಿಗೆ ಬಜೆಟ್‌ನಲ್ಲಿ ಒತ್ತು ನೀಡಲಾಗಿದೆ. ಇದು ಹೊಸ ಪದವೀಧರರಿಗೆ ಸಹಕಾರಿಯಾಗಲಿದೆ, ಆದರೆ ಈಗಾಗಲೇ ಕೆಲಸ ಕಳೆದುಕೊಂಡಿರುವ ಅನುಭವಿಗಳಿಗೆ ಇದರಿಂದ ನೇರ ಲಾಭವಿಲ್ಲ.

ಅನುಭವವೇ ಈಗ ಮುಳುವಾಗ್ತಿದೆಯೇ..? 

ಒಂದು ಕಾಲದಲ್ಲಿ 15 ರಿಂದ 25 ವರ್ಷಗಳ ಅನುಭವವು ಉದ್ಯೋಗದ ಭದ್ರತೆಯ ಸಂಕೇತವಾಗಿತ್ತು. ಆದರೆ ಈಗಿನ ಪರಿಸ್ಥಿತಿ ಬದಲಾಗಿದೆ.
ದೈತ್ಯ ಕಂಪನಿಗಳಲ್ಲೇ ಕಡಿತ: ಅಮೆಜಾನ್ ಜಾಗತಿಕವಾಗಿ 16,000 ಉದ್ಯೋಗಗಳನ್ನು ಕಡಿತಗೊಳಿಸಿದೆ, ಇದರಲ್ಲಿ ನೂರಾರು ಭಾರತೀಯರಿದ್ದಾರೆ. ಮೆಟಾ, ಮೈಕ್ರೋಸಾಫ್ಟ್, ಐಬಿಎಂ ಮತ್ತು ಆಕ್ಸೆಂಚರ್‌ನಂತಹ ದೈತ್ಯ ಕಂಪನಿಗಳು ಸಾವಿರಾರು ಹಿರಿಯ ಉದ್ಯೋಗಿಗಳನ್ನು ಮನೆಗೆ ಕಳುಹಿಸಿವೆ. 2025ರಲ್ಲಿ ಸುಮಾರು 269 ಕಂಪನಿಗಳಿಂದ 1.23 ಲಕ್ಷಕ್ಕೂ ಹೆಚ್ಚು ಐಟಿ ಉದ್ಯೋಗಿಗಳು ಕೆಲಸ ಕಳೆದುಕೊಂಡಿದ್ದಾರೆ.

AI ಪ್ರಭಾವ: ಅಮೆರಿಕದಂತಹ ದೇಶಗಳಲ್ಲಿ ನಡೆದ ಉದ್ಯೋಗ ಕಡಿತದಲ್ಲಿ ಸುಮಾರು 55,000 ಉದ್ಯೋಗಗಳು ಕೇವಲ ಎಐ ಮತ್ತು ತಂತ್ರಜ್ಞಾನದ ಬದಲಾವಣೆಯಿಂದಾಗಿ ನಷ್ಟವಾಗಿವೆ ಎಂದು ವರದಿಗಳು ಹೇಳಿವೆ.

ವೃತ್ತಿಪರರ ಅಳಲು: ನಾನು ಬಜೆಟ್‌ನಿಂದ ಕೆಲಸದ ಗ್ಯಾರಂಟಿ ನಿರೀಕ್ಷಿಸಿರಲಿಲ್ಲ. 40 ವರ್ಷ ದಾಟಿದ ನಮ್ಮಂತಹವರಿಗೆ ಕೆಲಸ ಹೋದಾಗ ಹೊಸ ಕೌಶಲ್ಯ ಕಲಿಯಲು ಆರ್ಥಿಕ ನೆರವು ಅಥವಾ ಕಂಪನಿಗಳು ಅನುಭವಿಗಳನ್ನು ಉಳಿಸಿಕೊಳ್ಳಲು ಪ್ರೋತ್ಸಾಹಕ ಕ್ರಮಗಳನ್ನು ಸರ್ಕಾರ ಪ್ರಕಟಿಸಬಹುದೆಂದು ಆಶಿಸಿದ್ದೆವು ಎನ್ನುತ್ತಾರೆ ಕೆಲಸ ಕಳೆದುಕೊಂಡಿರುವ 43 ವರ್ಷದ ಸಾಫ್ಟ್‌ವೇರ್ ಆರ್ಕಿಟೆಕ್ಟ್ ಒಬ್ಬರು.

ಮುಂದಿರುವ ಹಾದಿ

ವಿಶ್ವ ಆರ್ಥಿಕ ವೇದಿಕೆಯ (WEF) ಸಮೀಕ್ಷೆಯ ಪ್ರಕಾರ, ಮುಂದಿನ ಐದು ವರ್ಷಗಳಲ್ಲಿ ಎಐ ಬಳಕೆಯಿಂದಾಗಿ ಶೇ. 41ರಷ್ಟು ಕಂಪನಿಗಳು ತಮ್ಮ ಉದ್ಯೋಗಿಗಳ ಸಂಖ್ಯೆಯನ್ನು ಕಡಿಮೆ ಮಾಡುವ ಸಾಧ್ಯತೆಯಿದೆ. ತಂತ್ರಜ್ಞಾನ ಬದಲಾದಂತೆ ಉದ್ಯೋಗಿಗಳು ಅನಿವಾರ್ಯವಾಗಿ ಹೊಸ ಕೌಶಲ್ಯಗಳನ್ನು ಕಲಿಯಬೇಕಿದೆ. ದೇಶದ ಆರ್ಥಿಕತೆಯ ಬೆನ್ನೆಲುಬಾಗಿರುವ ಈ ಅನುಭವಿ ವೃತ್ತಿಪರರನ್ನು ಸಂಕಷ್ಟದ ಸಮಯದಲ್ಲಿ ಕೈಹಿಡಿಯಲು ಸರ್ಕಾರ ಮತ್ತು ಉದ್ಯಮ ರಂಗಕ್ಕೆ ಹೆಚ್ಚಿನ ಮಾನವೀಯ ದೃಷ್ಟಿಕೋನದ ಅಗತ್ಯವಿದೆ.

ಇದನ್ನೂ ಓದಿ: ‘ಆರೋಗ್ಯ ಕ್ರಾಂತಿ’ಗೆ ಕೇಂದ್ರ ದಿಟ್ಟ ಹೆಜ್ಜೆ! ದೂರದೃಷ್ಟಿ, ಸ್ವಾಗತಾರ್ಹ ಬಜೆಟ್ ಎಂದು ಬಣ್ಣಿಸಿದ ಡಾ.ದೇವಿ ಶೆಟ್ಟಿ

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ