ಕಾರು ಅಡ್ಡಗಟ್ಟಿ ಕಿಡ್ನಾಪ್​ಗೆ ಯತ್ನ.. ರೈಸ್ ಮಿಲ್ ಮಾಲೀಕನ ಪ್ಲಾನ್​ಗೆ ಐವರು ಖದೀಮರು ಅರೆಸ್ಟ್​

ಬೇಗನೆ ದುಡ್ಡು ಮಾಡೋ‌ ಆಸೆಗೆ ಮನುಷ್ಯ ಮಾಡಬಾರದ ಕೆಲಸವನ್ನ ಮಾಡ್ತಾನೆ. ರಾಯಚೂರಲ್ಲೂ ಸಹ ಖದೀಮರ ಗುಂಪೊಂದು ಹಣ ಇದ್ದವರನ್ನೇ ಟಾರ್ಗೆಟ್ ಮಾಡಿ ಅಪಹರಿಸಿ ಖಜಾನೆ ತುಂಬಿಸಿಕೊಳ್ಳುವ ಯತ್ನ ಮಾಡಿದ್ರು. ಆದ್ರೆ ಕಿಡ್ನ್ಯಾಪ್ ಮಾಡುವ ವೇಳೆ ಆದ ಯಡವಟ್ಟು ಖದೀಮರ ಪ್ಲ್ಯಾನ್​ನ್ನೇ ಉಲ್ಟಾ ಹೊಡೆಸಿದ್ದು, ಆರೋಪಿಗಳು ಅಂದರ್ ಆಗಿದ್ದಾರೆ.

ಇದು ಹುಚ್ಚು ಚಪಲ. ಐಶಾರಾಮಿ ಜೀವನದ ಮೋಹ. ಹರಾಮಿ ದುಡ್ಡಿಗೆ ಆಸೆ. ಇದಕ್ಕಾಗಿ ಹುಚ್ಚು ಕೋಡಿ ಮನಸ್ಸು ಏನ್​ ಬೇಕಾದ್ರೂ ಮಾಡಲು ಸಿದ್ಧ ನೋಡಿ. ಕೃಷ್ಣೆ, ತುಂಗಭದ್ರೆ ನೀರಿನಲ್ಲಿ ಥಳತಳಿಸಿ ನಿಂತ ಭತ್ತ, ರಾಯಚೂರು ಜನರ ಬದುಕ್ಕನ್ನ ಸಂಪಾಗಿಸಿದೆ. ಇಲ್ಲಿ ಬೇಕಾದಷ್ಟು ರೈಸ್​​ ಮಿಲ್​ಗಳು ಧನಕನಿಕರನ್ನ ಸೃಷ್ಟಿ ಮಾಡಿವೆ. ಧನವೇ ಹಲವರ ಹೊಟ್ಟೆ ಕಿಚ್ಚಿಗೂ ಕಾರಣ. ಅಂದ್ಹಾಗೆ ರಾಯಚೂರಿನ ರೈಸ್​​ ಮಿಲ್​ ಮಾಲೀಕನ ಕಿಡ್ನಾಪ್​ ಕಹಾನಿಯೊಂದು ಸಿನಿಮಾದ ಕಥಾ ಹಂದರವನ್ನೇ ಮೀರಿಸಿದೆ.

ರೈಸ್​​ ಮಿಲ್ ಮಾಲೀಕನ ಕಿಡ್ನಾಪ್ ಕಹಾನಿ​

ನರೇಂದ್ರ ಕುಮಾರ್​​ರವರು​ ಸತ್ಯನಾರಾಯಣ ರೈಸ್ ಮಿಲ್ ಮಾಲೀಕ. ರಾಯಚೂರಿನ ಹೊರವಲಯದ ಸತ್ಯನಾರಾಯಣ್​​​ ರೈಸ್​​​ ಮಿಲ್​ ಸಾಕಷ್ಟು ಖ್ಯಾತಿ ಗಳಿಸಿದೆ. ಆ ಮಿಲ್​​​ನ ಖ್ಯಾತಿಗೆ ತಕ್ಕಂತೆ ಸಂಪತ್ತಿನ ಲಕ್ಷ್ಮೀ ಒಲಿದಿದ್ಲು. ಇದೇ ದುಡ್ಡು ಕೆಲ ಅಡ್ನಾಡಿಗಳ ಕಣ್ಣು ಕುಕ್ಕಿತ್ತು. ಬಹುದಿನಗಳಿಂದ ನರೇಂದ್ರ ಕುಮಾರ್​ ಮೇಲೆ ಕಣ್ಣಿಟ್ಟಿದ್ದ ಕಿಡ್ನಾಪರ್ಸ್​​ ಡಬಲ್​ ಟೀಂ ಜಿದ್ದಿಗೆ ಬಿದ್ದು ಜೈಲು ಕಂಬಿ ಎಣಿಸ್ತಿದ್ದಾರೆ.

ಇದನ್ನೂ ಓದಿ: ಅಪರಿಚಿತರಿಂದ ಮೋಸ ಸಾಧ್ಯತೆ, ಹೊಸ ಕೆಲಸ ಆರಂಭಿಸಲು ಒಳ್ಳೆಯ ದಿನ; ಇಲ್ಲಿದೆ ಇಂದಿನ ಭವಿಷ್ಯ

ಬೈಕ್ ಅಪಘಾತದಂತೆ ನಟಿಸಿದ ಐವರು ಕಿಡ್ನಾಪರ್ಸ್​​

ಎಂದಿನಂತೆ ನರೇಂದ್ರಕುಮಾರ್​​​ ಕೆಲಸ ಮುಗಿಸಿ ಇನ್ನೇನು ಕಾರು ಹತ್ತಿ ಮನೆಗೆ ತೆರಳಬೇಕು. ಅಷ್ಟರಲ್ಲಿ ರಿಯಾಜ್ ಪಾಷಾ, ಗುರುರಾಜ್, ಶೇಕ್‌ ಮುಕ್ತಿಯಾರ್, ಶೇಕ್ ಅಬ್ದುಲ್, ಗುರುಕುಮಾರ್ ಎಂಬ ಐವರು ಕಿಡ್ನಾಪರ್ಸ್​​​ ಬೈಕ್ ಅಪಘಾತದಂತೆ ನಟಿಸಿದ್ರು. ಏಕಾಏಕಿ ಕಾರ್ ಅಡ್ಡಗಟ್ಟಿ ಕಾರ್ ಗಾಜು ಒಡೆದು, ಡೋರ್ ಓಪನ್ ಮಾಡಿದ್ದಾರೆ. ನರೇಂದ್ರ ಕುತ್ತಿಗೆಗೆ ಕತ್ತಿ ಇಟ್ಟಿದ್ದ ಆರೋಪಿಗಳು ನರೇಂದ್ರನಿಗೆ ಹಣಕ್ಕಾಗಿ ಬೇಡಿಕೆ ಇಟ್ಟಿದ್ದಾರೆ.. ಆಗ ಕಾರ್​ನಲ್ಲಿದ್ದ 50 ಸಾವಿರ ನೀಡಲು ನರೇಂದ್ರ ಮುಂದಾಗಿದ್ದಾರೆ. ಆದರೆ, ಇನ್ನೂ ಹೆಚ್ಚಿನ ಹಣಕ್ಕೆ ಕಿಡ್ನಾಪರ್ಸ್​​​ ಬೇಡಿಕೆ ಇಟ್ಟಿದ್ದಾರೆ. ಅಪಹರಿಸುವ ದೃಷ್ಟಿಯಿಂದ ಆರೋಪಿಯೊಬ್ಬ ಕಾರನ್ನ ಸ್ಟಾರ್ಟ್ ಮಾಡಲು ಯತ್ನಿಸಿದ್ರೂ ಸ್ಟಾರ್ಟ್ ಆಗಿಲ್ಲ. ಇದಕ್ಕೆ ಕಾರಣ ಕಾರ್​ ಎಂಜಿನ್​ ಸ್ಟಾರ್ಟ್​ ಆಗದಂತೆ ನರೇಂದ್ರರ ಸಮಯೋಜಿತ ಪ್ಲಾನ್​​​.

ಇದನ್ನೂ ಓದಿ: ಹೊಸ ಬಾಂಬ್ ಸಿಡಿಸಿದ ಪಶ್ಚಿಮ ಬಂಗಾಳ ಸಿಎಂ ಮಮತಾ ಬ್ಯಾನರ್ಜಿ; ರಾಜೀನಾಮೆ ಕೊಡಲು ಸಿದ್ಧ ಎಂದಿದ್ದೇಕೆ?

ಹೊತ್ತಿಗೆ ಕೂಗಳತೆ ದೂರದಲ್ಲಿದ್ದ ಕೆಲ ಕೆಲಸಗಾರರು ಮಾಲೀಕನನ್ನ ಬಿಡಿಸಿಕೊಳ್ಳಲು ಯತ್ನಿಸಿದ್ದಾರೆ. ಈ ವೇಳೆ, ಮಾಲೀಕನಿಗೆ ಚಾಕು ತೋರಿಸಿ ಬೈಕ್​ನಲ್ಲಿ ಕರೆದೊಯ್ದಿದ್ದಾರೆ. ಈ ಹೊತ್ತಿಗೆ ಯಡವಟ್ಟೊಂದು ನಡೆದಿದೆ. ಒಬ್ಬ ಆರೋಪಿಯನ್ನ ಹಿಡಿದ ಕಾರ್ಮಿಕರು, ಬಳಿಕ ಪೊಲೀಸರಿಗೂ ಮಾಹಿತಿ ನೀಡಿದ್ದಾರೆ. ತಕ್ಷಣ ಕಾರ್ಯಾಚರಣೆ ನಡೆಸಿದ ಪೊಲೀಸರು, ಒಂದೇ ಗಂಟೆಯಲ್ಲಿ ಕಿಡ್ನಾಪರ್ಸ್​ನ್ನ ಬಲೆಗೆ ಕೆಡವಿದ್ದಾರೆ.

ಇಂಟ್ರಸ್ಟಿಂಗ್​​ ಅಂದ್ರೆ ಬಂಧಿತ ಆರೋಪಿಗಳಲ್ಲಿ ರಿಯಾಜ್ ಹಾಗೂ ಗುರುರಾಜ್ ಈ ಮೊದಲು ಇದೇ ನರೇಂದ್ರಕುಮಾರ್ ಬಳಿ ಕೆಲಸ ಮಾಡ್ಕೊಂಡಿದ್ರು. ಉಳಿದ ಕಿರಾತಕರು ಇದೇ ರೀತಿಯ ಹಲವು ಕೃತ್ಯಗಳಲ್ಲಿ ಭಾಗಿ ಆಗಿದ್ರು.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ