T20 ಕ್ಯಾಪ್ಟನ್​ಗೆ ಬಿಗ್ ಚಾಲೆಂಜ್​.. ಮುಂಬೈಕರ್​ ಸೂರ್ಯಗೆ ವಿಲನ್​ ಆಗ್ತಾರಾ ಗಿಲ್?

ಪ್ರತಿಷ್ಠೆಯ ಏಷ್ಯಾಕಪ್​ ಟೂರ್ನಿ ಟೀಮ್​ ಇಂಡಿಯಾ ಟಿ20 ಕ್ಯಾಪ್ಟನ್​ ಸೂರ್ಯಕುಮಾರ್​ ಪಾಲಿಗೆ ಅಗ್ನಿಪರೀಕ್ಷೆಯ ಕಣವಾಗಿ ಮಾರ್ಪಟ್ಟಿದೆ. ಶುಭ್​​ಮನ್​ ಗಿಲ್​ ಎಂಟ್ರಿ ಸೂರ್ಯನ ನೆಮ್ಮದಿಯನ್ನೇ ಕಸಿದುಕೊಂಡಿದೆ. ಅರಬ್ಬರ ನಾಡಲ್ಲಿ ಸೂರ್ಯ ಅಬ್ಬರಿಸಿದ್ರೆ ಸೇಫ್​​. ಫ್ಲಾಪ್​ ಆದ್ರೋ ತಲೆದಂಡ ಫಿಕ್ಸ್​​. ಶುಭ್​ಮನ್​ ಗಿಲ್​ ಎಂಟ್ರಿ ಸೂರ್ಯನ ಸ್ಥಾನಕ್ಕೆ ಕುತ್ತು ತಂದಿರೋದ್ಯಾಕೆ?. 

ಏಷ್ಯಾಕಪ್​ ಟೂರ್ನಿಗೆ ಕೌಂಟ್​​ಡೌನ್​ ಶುರುವಾಗಿದೆ. ಇಂದು ಅಥವಾ ನಾಳೆ ಸೂರ್ಯಕುಮಾರ್​ ಸೈನ್ಯ ಯುಎಇ ಫ್ಲೈಟ್​ ಹತ್ತಲಿದೆ. ಈ ಬಾರಿಯ ಏಷ್ಯಾಕಪ್​ ಟೂರ್ನಿಗೆ ಟೀಮ್​ ಇಂಡಿಯಾದ ಹಲವರ ಪಾಲಿಗೆ ಅಗ್ನಿಪರೀಕ್ಷೆಯ ಕಣವಾಗಿದೆ. 2026ರ ಟಿ20 ವಿಶ್ವಕಪ್​ ಆಡಬೇಕು ಅಂದ್ರೆ, ಏಷ್ಯಾಕಪ್​ನಲ್ಲಿ ಮಿಂಚಬೇಕಿದೆ. ಏಷ್ಯನ್​ ಸಮರದಲ್ಲಿ ಪರ್ಫಾಮ್​ ಮಾಡಿದ್ರೆ ಮಾತ್ರ ಸ್ಥಾನ ಫಿಕ್ಸ್​ ಆಗಲಿದೆ. ಇಲ್ಲದಿದ್ರೆ ಪೈಪೋಟಿಯ ನಡುವೆ ಕಳೆದೇ ಹೋಗೋ ಸಾಧ್ಯತೆಯಿದೆ. 

ಕ್ಯಾಪ್ಟನ್​​ ಸೂರ್ಯನಿಗೆ UAEನಲ್ಲಿ ಅಗ್ನಿಪರೀಕ್ಷೆ.!

ಉಳಿದೆಲ್ಲಾ ಆಟಗಾರರ ಕತೆ ಹಾಗಿರಲಿ, ಏಷ್ಯಾಕಪ್​ನಲ್ಲಿ ಟಿ20 ತಂಡದ ನಾಯಕ ಸೂರ್ಯಕುಮಾರ್​ಗೆ ರಿಯಲ್​ ಚಾಲೆಂಜ್​ ಎದುರಾಗಲಿದೆ. ಏಷ್ಯಾಕಪ್​​ನಲ್ಲಿ ಮಿಸ್ಟರ್​​ 360 ಬ್ಯಾಟರ್​ ಮಿಂಚಿದ್ರೆ ಮಾತ್ರ ಸೇಫ್.! ಫೇಲಾದ್ರೆ ನಾಯಕತ್ವದ ಜೊತೆಗೆ ತಂಡದಲ್ಲಿ ಸ್ಥಾನವೂ ಹೋಗೋ ಸಾಧ್ಯತೆ ದಟ್ಟವಾಗಿದೆ. ಟಿ20 ವಿಶ್ವಕಪ್​​ಗೆ ಯುವ ತಂಡ ಕಟ್ಟೋ ಲೆಕ್ಕಾಚಾರದಲ್ಲಿರೋ ಬಿಸಿಸಿಐ, ಸೂರ್ಯನಿಗೆ ಶಾಕ್​ ಕೊಟ್ರೂ ಅಚ್ಚರಿಪಡಬೇಕಿಲ್ಲ. 

ನಾಯಕನಾಗಿ ಪಾಸ್​​.. ಬ್ಯಾಟ್ಸ್​ಮನ್​ ಆಗಿ ಫೇಲ್​.!

ಟೀಮ್​ ಇಂಡಿಯಾದ ಟಿ20 ಕ್ಯಾಪ್ಟನ್​ ಆಗಿ ಸೂರ್ಯ ಶೈನ್​ ಆಗಿದ್ದಾರೆ. ತಂಡವನ್ನ ಮುನ್ನಡೆಸಿದ 6 ಸರಣಿಗಳ ಪೈಕಿ ಒಂದರಲ್ಲೂ ಸೋತಿಲ್ಲ. 5 ಸರಣಿ ಗೆದ್ದಿದ್ರೆ, 1 ಸರಣಿಯಲ್ಲಿ ಡ್ರಾ ಸಾಧಿಸಿದ್ದಾರೆ. 22 ಪಂದ್ಯಗಳಲ್ಲಿ ತಂಡ ಮುನ್ನಡೆಸಿ 17ರಲ್ಲಿ ಗೆಲುವು ತಂದುಕೊಟ್ಟಿದ್ದಾರೆ. ಸೂರ್ಯಕುಮಾರ್​​ ನಾಯಕತ್ವದ ಬಗ್ಗೆ ಯಾವುದೇ ಪ್ರಶ್ನೆಗಳಿಲ್ಲ. ಪ್ರಶ್ನೆ ಇರೋದು ಪರ್ಫಾಮೆನ್ಸ್​ ಮೇಲೆ.!

ನಾಯಕನ ಪಟ್ಟವೇರಿದ ಬಳಿಕ ಸೂರ್ಯ ಸೈಲೆಂಟ್​.!

ಸೂರ್ಯಕುಮಾರ್​ ಯಾದವ್​ ಸ್ಥಾನಕ್ಕೆ ಕುತ್ತು ತಂದಿರೋದು ಪರ್ಫಾಮೆನ್ಸ್​ & ಪೈಪೋಟಿ.! 2024ರಲ್ಲಿ ಟೀಮ್​ ಇಂಡಿಯಾ ಟಿ20 ಚಾಂಪಿಯನ್​ ಆದ ಬಳಿಕ ನಾಯಕನ ಪಟ್ಟ ಅಲಂಕರಿಸಿದ್ದ ಸೂರ್ಯಕುಮಾರ್​​ ಯಾದವ್​ ಮೇಲೆ ಅಪಾರವಾದ ನಿರೀಕ್ಷೆಯಿತ್ತು. ಆದ್ರೆ, ನಾಯಕನ ಪಟ್ಟವೇರಿದ್ದೇ ಏರಿದ್ದು, ಸೂರ್ಯಕುಮಾರ್​​ ಬ್ಯಾಟಿಂಗ್​ ಚಾರ್ಮ್​ ಕಳೆದು ಹೋಗಿದೆ. ಮೈದಾನದ ಉದ್ದಗಲಕ್ಕೆ ಚೆಂಡಿನ ದರ್ಶನ ಮಾಡಿಸಿ ಎದುರಾಳಿಗಳನ್ನ ಕಂಗೆಡಿಸ್ತಾ ಇದ್ದ ಸೂರ್ಯಕುಮಾರ್​ ರನ್​ಗಳಿಕೆಗೆ ತಿಣುಕಾಟ ನಡೆಸಿದ್ದಾರೆ. 

ನಾಯಕನಾದ ಬಳಿಕ ಸೂರ್ಯ

ಟೀಮ್​ ಇಂಡಿಯಾದ ನಾಯಕನ ಪಟ್ಟವೇರಿದ ಬಳಿಕ ಸೂರ್ಯಕುಮಾರ್​​ 15 ಪಂದ್ಯಗಳನ್ನ ಆಡಿದ್ದಾರೆ. ಈ ಪಂದ್ಯಗಳಲ್ಲಿ ಕೇವಲ 18.42ರ ಸರಾಸರಿಯಲ್ಲಿ ರನ್​ಗಳಿಸಿರೋ ಸೂರ್ಯ 2 ಬಾರಿ ಅರ್ಧಶತಕದ ಗಡಿದಾಟಿದ್ದಾರಷ್ಟೇ.

2025ರಲ್ಲಿ ಸೂರ್ಯ ಫ್ಲಾಪ್​.. ಫ್ಲಾಪ್​.. ಫ್ಲಾಪ್​.!

2025ರ ಕಥೆಯಂತೂ ಇನ್ನೂ ಡಿಫರೆಂಟ್​. ಆಡಿದ 5 ಪಂದ್ಯಗಳಿಂದ ಸೂರ್ಯಕುಮಾರ್​​ ಗಳಿಸಿರೋದು ಜಸ್ಟ್​​ 28 ರನ್​ ಮಾತ್ರ. ಸರಾಸರಿ ಎಷ್ಟು ಗೊತ್ತಾ.? ಕೇವಲ 5.60. ಇದ್ರಲ್ಲಿ ಎರಡು ಪಂದ್ಯಗಳಲ್ಲಿ ಡಕೌಟ್​​ ಕೂಡ ಆಗಿದ್ದಾರೆ. ಈ ಹೀನಾಯ ಪ್ರದರ್ಶನವೇ ಸದ್ಯ ಸೂರ್ಯನನ್ನ ಅಗ್ನಿಪರೀಕ್ಷೆಯ ಕಣದಲ್ಲಿರಿಸಿದೆ. 

ಸೂರ್ಯಕುಮಾರ್​​​​ಗೆ ಏಷ್ಯಾಕಪ್​ ಲಾಸ್ಟ್​ ಚಾನ್ಸ್​​.!

ಟೀಮ್​ ಇಂಡಿಯಾ ಶುಭ್​ಮನ್​ ಗಿಲ್​ ಯುಗಾರಂಭವಾಗಿದೆ. ಟಿ20 ಫಾರ್ಮೆಟ್​​ನಿಂದಲೇ ಹೊರಬಿದ್ದಿದ್ದ ಗಿಲ್​ ಮತ್ತೆ ಕಮ್​ಬ್ಯಾಕ್​ ಮಾಡಿದ್ದಾರೆ. ಉಪನಾಯಕನ ಪಟ್ಟವನ್ನೂ ಕಟ್ಟಲಾಗಿದೆ. ಬಿಸಿಸಿಐ, ಸೆಲೆಕ್ಟರ್ಸ್, ಟೀಮ್​ ಮ್ಯಾನೇಜ್​ಮೆಂಟ್​ ಎಲ್ಲರೂ ಗಿಲ್​ನ ಆಲ್​​ಫಾರ್ಮೆಟ್​ ಕ್ಯಾಪ್ಟನ್​ ಮಾಡಲು ಹೊರಟಿದ್ದಾರೆ. ನಾಯಕನ ಪಟ್ಟವೇರಿದ ಬಳಿಕ ಬ್ಯಾಟಿಂಗ್​ ಚಾರ್ಮ್​ ಕಳೆದುಕೊಂಡಿರೋ ಸೂರ್ಯಕುಮಾರ್,​​ ಏಷ್ಯಾಕಪ್​ನಲ್ಲೂ ಫೇಲ್​ ಆಗಿದ್ದೇ ಆದ್ರೆ ಸಂಕಷ್ಟ ಫಿಕ್ಸ್​. ಸೂರ್ಯನನ್ನ ಕೆಳಗಿಳಿಸಿ ಗಿಲ್​ಗೆ ಪಟ್ಟಾಭಿಷೇಕ ಮಾಡೋ ಸಾಧ್ಯತೆ ಹೆಚ್ಚಿದೆ. 

ಇದನ್ನೂ ಓದಿ: ED ವಿಚಾರಣೆಗೆ ಹಾಜರಾದ ಟೀಮ್ ಇಂಡಿಯಾದ ಮಾಜಿ ಪ್ಲೇಯರ್.. ಕಾರಣ ಏನು?

ನಾಯಕತ್ವ ಸೂರ್ಯಕುಮಾರ್​​ ಮೇಲಿನ ಒತ್ತಡ ಹೆಚ್ಚಿಸ್ತಿದೆ ಅನ್ನೋ ಟಾಕ್​ ಕ್ರಿಕೆಟ್​ ವಲಯದಲ್ಲಿದೆ. ನಾಯಕನಾದ ಬಳಿಕ ಟೀಮ್​ ಇಂಡಿಯಾ ಪರ ಸೂರ್ಯ ಫೇಲ್​ ಆಗಿದ್ದಾರೆ. ಆದ್ರೆ, ಇದ್ರ ನಡುವೆ ಸಾಮಾನ್ಯ ಆಟಗಾರನಾಗಿ ಐಪಿಎಲ್​ ಆಡಿದ ಸೂರ್ಯಕುಮಾರ್​ ತನ್ನ ಹಳೆ ಖದರ್​​ನಲ್ಲೇ ಬ್ಯಾಟ್​ ಬೀಸಿದ್ದಾರೆ. 2025ರ ಐಪಿಎಲ್​ನಲ್ಲಿ 65.18ರ ಸರಾಸರಿಯಲ್ಲಿ 717 ರನ್​ ಕೊಳ್ಳೆ ಹೊಡೆದಿದ್ದಾರೆ. ನಾಯಕನಾಗಿ ಸೂರ್ಯ ಫೇಲ್​ ಆಗಿದ್ರೆ, ಶುಭ್​ಮನ್​ ಗಿಲ್​ ಟೆಸ್ಟ್​ ನಾಯಕನಾದ ಮೊದಲ ಸರಣಿಯಲ್ಲೇ ಶೈನ್​ ಆಗಿದ್ದಾರೆ. ಒತ್ತಡವನ್ನ ಸಮರ್ಥವಾಗಿ ನಿಭಾಯಿಸಿದ್ದಾರೆ. ಸೂರ್ಯನನ್ನ ಪಟ್ಟದಿಂದ ಕೆಳಗಿಳಿಸಲು ಇದೂ ಒಂದು ಕಾರಣವಾದ್ರೂ ಅಚ್ಚರಿ ಪಡಬೇಕಿಲ್ಲ. 

ಕ್ಯಾಪ್ಟನ್​ ಸೂರ್ಯಕುಮಾರ್​ ಪಾಲಿಗೆ ಏಷ್ಯಾಕಪ್​ ಸಮರ ಮಹತ್ವದ ಟೂರ್ನಿಯಾಗಿದೆ. ನಾಯಕನಾಗಿ ಟೀಮ್​ ಇಂಡಿಯಾಗೆ ವಿಶ್ವಕಪ್​ ಗೆಲ್ಲಿಸಿಕೊಡಬೇಕು ಅನ್ನೋ ಅತಿ ದೊಡ್ಡ ಕನಸು ಜೀವಂತವಾಗಿರಬೇಕು ಅಂದ್ರೆ ಅರಬ್ಬರ ನಾಡಲ್ಲಿ ಸೂರ್ಯ ಶೈನ್​ ಆಗಲೇಬೇಕಿದೆ. 

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.30ಕ್ಕೆ ನ್ಯೂಸ್‌ಫಸ್ಟ್‌ ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ