ಕೆಟ್ಟ ಬ್ಯಾಟಿಂಗ್​​, ಕಳಪೆ ಫೀಲ್ಡಿಂಗ್.. ಟೀಮ್ ಇಂಡಿಯಾಗೆ 2ನೇ ಸೋಲಿನ ಜೊತೆ ಕೈ ತಪ್ಪಿದ ಸರಣಿ

ಪರ್ತ್​​ ನಂತರ ಅಡಿಲೇಡ್​​ ಏಕದಿನ ಪಂದ್ಯದಲ್ಲೂ, ಟೀಮ್ ಇಂಡಿಯಾ ಸೋಲು ಅನುಭವಿಸಿತು. ಒಂದೆಡೆ ಬಿಗ್ ಪ್ಲೇಯರ್​ಗಳ ಬ್ಯಾಟಿಂಗ್ ವೈಫಲ್ಯ ಮತ್ತೊಂದೆಡೆ ಕಳಪೆ ಫೀಲ್ಡಿಂಗ್, ಶುಭ್ಮನ್ ಗಿಲ್ ಪಡೆಯ ಸೋಲಿಗೆ ಕಾರಣವಾಯಿತು. ಸತತ 2 ಪಂದ್ಯಗಳನ್ನು ಟೀಮ್ ಇಂಡಿಯಾ ಸೋತಿದೆ. 

ಅಡಿಲೇಡ್​ನಲ್ಲಿ ಸರಣಿ ಉಳಿಸಿಕೊಳ್ಳಲು ಹೋರಾಟ ನಡೆಸಿದ ಟೀಮ್ ಇಂಡಿಯಾ, ಕೊನೆಗೂ ಆಸ್ಟ್ರೇಲಿಯಾ ತಂಡಕ್ಕೆ ಶರಣಾಗಿದೆ. ಡು ಆರ್ ಡೈ ಪಂದ್ಯದಲ್ಲಿ ಸರಣಿ ಉಳಿಸಿಕೊಳ್ಳಲು ಗಿಲ್ ಪಡೆ, ಭಾರೀ ಪ್ರಯತ್ನ ಪಟ್ಟಿತ್ತು. ಆದ್ರೆ ಓವಲ್ ಮೈದಾನದಲ್ಲಿ ಅಂದುಕೊಂಡಿದ್ದೇ ಒಂದು, ಆಗಿದ್ದೇ ಮತ್ತೊಂದು.  

ಕೈಕೊಟ್ಟ ಗಿಲ್, ಕೊಹ್ಲಿ ಮತ್ತೆ ಡಕೌಟ್..!

ಟಾಸ್ ಸೋತು ಮೊದಲು ಬ್ಯಾಟಿಂಗ್ ನಡೆಸಿದ ಟೀಮ್ ಇಂಡಿಯಾ, ಪವರ್​ ಪ್ಲೇನಲ್ಲಿ ನಾಯಕ ಶುಭ್ಮನ್ ಗಿಲ್ ಮತ್ತು ವಿರಾಟ್ ಕೊಹ್ಲಿಯ, ಬ್ಯಾಕ್ ಟು ಬ್ಯಾಕ್ ವಿಕೆಟ್ ಕಳೆದುಕೊಂಡಿತ್ತು. ಗಿಲ್ 9 ರನ್​ಗಳಿಸಿ ಬಾರ್ಟ್ಲೆಟ್​​ಗೆ ವಿಕೆಟ್​ ಒಪ್ಪಿಸಿದ್ರೆ, ಕೊಹ್ಲಿ ಸತತ 2ನೇ ಬಾರಿ ಡಕೌಟ್ ಆದರು.

ರೋಹಿತ್- ಶ್ರೇಯಸ್ ಭರ್ಜರಿ ಜೊತೆಯಾಟ..!

3ನೇ ವಿಕೆಟ್​​ಗೆ ರೋಹಿತ್ ಶರ್ಮಾ ಮತ್ತು ಶ್ರೇಯಸ್ ಅಯ್ಯರ್, ಬೊಂಬಾಟ್ ಜೊತೆಯಾಟವಾಡಿದ್ರು. 136 ಎಸೆತಗಳಲ್ಲಿ ಈ ಜೋಡಿ 118 ರನ್​ಗಳಿಸಿ, ತಂಡಕ್ಕೆ ಚೇತರಿಕೆ ನೀಡಿತ್ತು. 

ಅಡಿಲೇಡ್​ನಲ್ಲಿ ಮುಂಬೈಕರ್ಸ್​ ದರ್ಬಾರ್..!

ಅಡಿಲೇಡ್​​ನ ಓವಲ್​ ಮೈದಾನದಲ್ಲಿ ರೋಹಿತ್ ಮತ್ತು ಶ್ರೇಯಸ್, ದರ್ಬಾರ್ ನಡೆಸಿದರು. ಇಬ್ಬರೂ ತಲಾ ಅರ್ಧಶತಕಗಳನ್ನ ಸಿಡಿಸಿ ಸಂಭ್ರಮಿಸಿದರು. ಈ ನಡುವೆ ರೋಹಿತ್, 73 ರನ್​ಗಳಿಸಿ ಫೈನ್​​ ಲೆಗ್​ನಲ್ಲಿ ಹೇಝಲ್​ವುಡ್​​ಗೆ ಕ್ಯಾಚ್ ನೀಡಿದ್ರೆ, 61 ರನ್​ಗಳಿಸಿದ್ದ ಶ್ರೇಯಸ್​​​ ಇನ್ನಿಂಗ್ಸ್​ಗೆ, ಌಡಂ ಝಾಂಪ ಫುಲ್​​ಸ್ಟಾಪ್ ಇಟ್ಟರು.

ರಾಹುಲ್, ಸುಂದರ್, ನಿತೀಶ್​​ ಫುಲ್ ಸೈಲೆಂಟ್..!

ಅಕ್ಷರ್ ಪಟೇಲ್ ಕೆಲ ಕಾಲ ಆಸಿಸ್ ಬೌಲರ್​ಗಳನ್ನ ಕಾಡಿದರು. ಕೆ.ಎಲ್.ರಾಹುಲ್, ವಾಶಿಂಗ್ಟನ್ ಸುಂದರ್ ಒಬ್ಬರ ಹಿಂದೊಬ್ಬರು ಪೆವಿಲಿಯನ್ ಸೇರಿಕೊಂಡ್ರೆ, 44 ರನ್​ಗಳಿಸಿದ್ದ ಅಕ್ಷರ್ ಪಟೇಲ್ ಮತ್ತು ನಿತೀಶ್ ರೆಡ್ಡಿ ಬ್ಯಾಕ್ ಟು ಬ್ಯಾಕ್ ವಿಕೆಟ್ ಒಪ್ಪಿಸಿದರು. ಅಂತಿಮವಾಗಿ ಟೀಮ್ ಇಂಡಿಯಾ 50 ಓವರ್​ಗಳಲ್ಲಿ 9 ವಿಕೆಟ್ ನಷ್ಟಕ್ಕೆ 264 ರನ್​ಗಳಿಸಿತು. ಆಸಿಸ್ ಪರ ಝಾಂಪ 4 ಮತ್ತು ಬಾಟ್ಲೆಟ್​​​​​​ 3 ವಿಕೆಟ್ ಪಡೆದರು.

ಇದನ್ನೂ ಓದಿ: 1Kg ಟೊಮೆಟೊ 700 ರೂಪಾಯಿ.. ಅಫ್ಘಾನ್​ ಜೊತೆ ಗಲಾಟೆ, ತರಕಾರಿ, ದಿನಸಿಗಳ ಬೆಲೆ ಭಾರೀ ಏರಿಕೆ

ಕಾಂಗರೂಗಳನ್ನ ಬಚಾವ್ ಮಾಡಿದ ಶಾರ್ಟ್, ಕಾನೊಲಿ..! 

265 ರನ್​ಗಳ ಗುರಿ ಬೆನ್ನಟ್ಟಿದ್ದ ಆಸ್ಟ್ರೇಲಿಯಾ ತಂಡಕ್ಕೂ, ಹೇಳಿಕೊಳ್ಳುವಂತಹ ಸ್ಟಾರ್ಟ್ ಸಿಗಲಿಲ್ಲ. ನಾಯಕ ಮಿಚ್ಚೆಲ್ ಮಾರ್ಚ್ 11 ರನ್ ಮತ್ತು ಟ್ರಾವಿಸ್ ಹೆಡ್ 28 ರನ್​ಗಳಿಸಿ ಔಟಾದ್ರು. ಮ್ಯಾಥ್ಯೂ ರನ್​ಶಾ 30 ರನ್​ಗಳಿಸಿದ್ರೆ, ಌಲೆಕ್ಸ್ ಕೇರಿ 6 ರನ್​ಗಳಿಗೆ ಸುಸ್ತಾದ್ರು. ಕೊನೆಗೆ ಮ್ಯಾಥ್ಯೂ ಶಾರ್ಟ್, ಕೂಪರ್ ಕಾನೊಲಿರ ಆಕರ್ಷಕ ಅರ್ಧಶತಕಗಳು, ಮತ್ತು ಮಿಚ್ಚೆಲ್ ಒವನ್​ರ ಬಿರುಸಿನ ಬ್ಯಾಟಿಂಗ್, ಆಸ್ಟ್ರೇಲಿಯಾ ತಂಡಕ್ಕೆ 2 ವಿಕೆಟ್​ಗಳ ರೋಚಕ ಗೆಲುವು ತಂದುಕೊಡ್ತು. 

ಟೀಮ್ ಇಂಡಿಯಾಕ್ಕೆ ಏಕದಿನ ಸರಣಿ ಸೋಲು

ಮೈದಾನದಲ್ಲಿ ಕಳಪೆ ಫೀಲ್ಡಿಂಗ್​ ಮಾಡಿದ ಟೀಮ್ ಇಂಡಿಯಾ, ಭಾರೀ ಬೆಲೆ ಕಟ್ಟಬೇಕಾಯ್ತು. 3 ಕ್ಯಾಚ್ ಮತ್ತು ಒಂದು ರನೌಟ್ ಮಿಸ್ ಮಾಡಿದ ಭಾರತದ ಫೀಲ್ಡರ್ಸ್​, ತಂಡದ ಹಿನ್ನಡೆ ಕಾರಣರಾದರು. ಆ ಮೂಲಕ ಟೀಮ್ ಇಂಡಿಯಾ ಸತತ 2 ಪಂದ್ಯಗಳನ್ನ ಸೋತು, ಸರಣಿ ಕೈಚೆಲ್ಲಿತು. 

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.30ಕ್ಕೆ ನ್ಯೂಸ್‌ಫಸ್ಟ್‌ ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ