ಟೀಮ್ ಇಂಡಿಯಾದಲ್ಲಿ ಹೊಸ ಯುಗಾರಂಭ

3.5 ವರ್ಷ.. 4 ICC ಟ್ರೋಫಿ.. ಗೌತಿಗೆ ಗೆಲ್ಲುವ ಟಾಸ್ಕ್

ಗಂಭೀರ್ ಮುಂದಿರುವ ದೊಡ್ಡ, ದೊಡ್ಡ ಸವಾಲೇನು..?

ನಿರೀಕ್ಷೆಯಂತೆ ಗೌತಮ್ ಗಂಭೀರ್,​ ಟೀಮ್​ ಇಂಡಿಯಾದ ಕೋಚ್ ಹುದ್ದೆಗೇರಿದ್ದಾರೆ. ಕೋಚ್​ ಗಾದಿಗೇರಿರುವ ಗುರು ಗಂಭೀರ್​ ಆಯ್ಕೆಯ ಹಿಂದೆ ಸಿಕ್ಕಾಪಟ್ಟೆ ಲೆಕ್ಕಚಾರಗಳು ಅಡಗಿವೆ. ಗೌತಮ್ ಗಂಭೀರ್​ ಮುಂದೆ ಸವಾಲುಗಳ ಬೆಟ್ಟವೂ ಇದೆ. ಗುರಿಯೂ ದೊಡ್ಡದಿದೆ.

ಟೀಮ್ ಇಂಡಿಯಾದಲ್ಲಿ ಹೊಸ ಯುಗಾಂರಂಭವಾಗಿದೆ. ಒಂದೆಡೆ ಅಭಿಮಾನಿಗಳ ವಲಯದಲ್ಲಿ ನಿರೀಕ್ಷೆಗಳು ಗರಿಗೆದರಿವೆ. ಹೆಡ್​ ಕೋಚ್​ ಆಗಿ ಆಯ್ಕೆಯಾಗಿರೋ ಗೌತಮ್​​ ಗಂಭೀರ್, ನಿರ್ಗಮಿತ ಕೋಚ್​ ದ್ರಾವಿಡ್​ಗಿಂತ ಅಧಿಕ ಸಂಭಾವನೆ ಪಡೆದುಕೊಳ್ಳಲಿದ್ದಾರೆ ಎನ್ನಲಾಗ್ತಿದೆ. ಒಟ್ಟಾರೆ 3.5 ವರ್ಷ ಅಂದ್ರೆ 2027ರ ಡಿಸೆಂಬರ್​​​ವರೆಗೆ ಗಂಭೀರ್​ ಹೆಡ್​ ಕೋಚ್​ ಆಗಿರಲಿದ್ದಾರೆ. ಹಿಂದಿನ ಕೋಚ್​ ದ್ರಾವಿಡ್​ ವಾರ್ಷಿಕವಾಗಿ 12 ಕೋಟಿ ಸಂಭಾವನೆ ಪಡೀತಿದ್ದರು. ಈಗ ಗಂಭೀರ್​ ಸಂಭಾವನೆ 15 ಕೋಟಿಗೂ ಅಧಿಕ ಎನ್ನಲಾಗ್ತಿದೆ.

ಇದನ್ನೂ ಓದಿ:ಮಿಸ್ಟ್ರಿ ಗರ್ಲ್​ ಜೊತೆ ಹಾರ್ದಿಕ್​ ಪಾಂಡ್ಯ ಡೇಟಿಂಗ್​​​? ಮಾರ್ಮಿಕವಾಗಿ ಟಾಂಗ್ ಕೊಟ್ಟ ನಟಾಶಾ..!

3.5 ವರ್ಷದಲ್ಲಿ 4 ಐಸಿಸಿ ಟ್ರೋಫಿ
ರಾಹುಲ್ ದ್ರಾವಿಡ್ ಉತ್ತರಾಧಿಕಾರಿಯಾಗಿರೋ ಗಂಭೀರ್​ ಮುಂದೆ ಬೆಟ್ಟದಷ್ಟು ಸವಾಲಿದೆ. ಜಸ್ಟ್​ 3.5 ವರ್ಷದ ಅವಧಿಯಲ್ಲಿ ಟೀಮ್ ಇಂಡಿಯಾ, ಬರೋಬ್ಬರಿ 4 ಐಸಿಸಿ ಟೂರ್ನಿಗಳನ್ನಾಡಲಿದೆ. ಈ ಮಹತ್ವದ ಟೂರ್ನಿಗಳು ಗೌತಮ್​ ಗಂಭೀರ್​ ಪಾಲಿಗೆ ಅಗ್ನಿಪರೀಕ್ಷೆಯ ಕಣವಾಗಿವೆ.

3.5 ವರ್ಷ.. 4 ಟಾಸ್ಕ್..!
2025ರ ಫೆಬ್ರವರಿ-ಮಾರ್ಚ್​ನಲ್ಲಿ ಐಸಿಸಿ ಚಾಂಪಿಯನ್ಸ್ ಟ್ರೋಫಿ ನಡೆಯಲಿದೆ. ಏಕದಿನ ಮಾದರಿಯ ಈ ಟೂರ್ನಿ ಗೆಲ್ಲೋ ಸವಾಲು ಗಂಭೀರ್ ಮುಂದಿದೆ. 2025ರ ಜೂನ್​ನಲ್ಲಿ ವಿಶ್ವ ಟೆಸ್ಟ್​ ಚಾಂಪಿಯನ್​ ಶಿಫ್​ ಫೈನಲ್​ ನಡೆಯಲಿದೆ. ಆ ಬಳಿಕ 2026ರಲ್ಲಿ ಭಾರತ ಹಾಗೂ ಶ್ರೀಲಂಕಾ ಜಂಟಿಯಾಗಿ ಟಿ20 ವಿಶ್ವಕಪ್ ಆಯೋಜಿಸಲಿದೆ. 2027ರಲ್ಲಿ ಸೌತ್ ಆಫ್ರಿಕಾದಲ್ಲಿ ಏಕದಿನ ವಿಶ್ವಕಪ್ ನಡೆಯಲಿದೆ. ಈ ನಾಲ್ಕು ಐಸಿಸಿ ಟೂರ್ನಿಗಳನ್ನ ಗೆಲ್ಲೋದು ಗೌತಮ್ ಪಾಲಿಗೆ ಬಿಗ್ ಟಾಸ್ಕ್ ಆಗಿರಲಿದೆ.

ವಿಭಿನ್ನ ಮನಸ್ಥಿತಿ.. ಏಕತೆಯೇ ಬಿಗ್ ಚಾಲೆಂಜ್
ದ್ರಾವಿಡ್​ ಅಂಡ್ ರೋಹಿತ್ ಕೂಲ್ ಆ್ಯಂಡ್ ಕಾಮ್ ವ್ಯಕ್ತಿತ್ವದವರು​. ಇಬ್ಬರೂ ಹೊಂದಿಕೊಳ್ಳುವ ಗುಣದವರು. ಗಂಭೀರ್ ಆಟದಲ್ಲೂ ಅಗ್ರೆಸ್ಸಿವ್​, ಮಾತಿನಲ್ಲೂ ಅಗ್ರೆಸ್ಸೀವ್​​. ನೇರಾ ನೇರ ಮಾತನಾಡುವ ವ್ಯಕ್ತಿ. ವಿರಾಟ್ ಕೊಹ್ಲಿ ಸೇರಿದಂತೆ ಹಲವರ ಜೊತೆಗೆ ಗೌತಿ ಒಡನಾಟ ಅಷ್ಟೊಂದು ಚೆನ್ನಾಗಿಲ್ಲ. ಇದೀಗ EGO ಬಿಟ್ಟು, ತಂಡದಲ್ಲಿ ಏಕತೆ ಮೂಡಿಸುವ ಬಿಗ್ ಚಾಲೆಂಜ್ ಇದೆ. ಇದೆಲ್ಲಕ್ಕಿಂತ ಮಿಗಿಲಾಗಿ ಹೊಸ ತಂಡವನ್ನೇ ಕಟ್ಟಬೇಕಿದೆ.

ಡ್ರೆಸ್ಸಿಂಗ್ ರೂಮ್​ ಚಾಲೆಂಜ್

• ಬದಲಾವಣೆಯ ಹಾದಿಯಲ್ಲಿದೆ ಟೀಮ್ ಇಂಡಿಯಾ
• ವಿರಾಟ್​, ರೋಹಿತ್, ಜಡೇಜಾ ಟಿ20ಯಿಂದ ನಿರ್ಗಮನ
• ಚಾಂಪಿಯನ್ಸ್ ಟ್ರೋಫಿ ಬಳಿಕ ತೆರೆಮರೆಗೆ ಮತ್ತಷ್ಟು ಪ್ಲೇಯರ್ಸ್
• ದಿಗ್ಗಜರ ಸ್ಥಾನಕ್ಕೆ ಪರ್ಫೆಕ್ಟ್​ ರಿಪ್ಲೇಸ್ಮೆಂಟ್​ ಹುಡುಕಾಟ
• 2026 T20, 2027 ODI ವಿಶ್ವಕಪ್​ಗೆ ಹೊಸ ತಂಡ
• ಹೊಸ ಆಟಗಾರರೊಂದಿಗೆ 2026 T20 ವಿಶ್ವಕಪ್​

ಇಷ್ಟೆಲ್ಲಾ ಸವಾಲುಗಳನ್ನ ಎದುರಿಸಿ ಗಂಭೀರ್​ ಗೆಲ್ತಾರಾ ಎಂಬ ಪ್ರಶ್ನೆ ನಿಮ್ಮಲ್ಲಿ ಇರಬಹುದು. ಸದ್ಯಕ್ಕಂತೂ ಈ ಕಠಿಣ ಸವಾಲುಗಳನ್ನ ಎದುರಿಸೋ ಸಾಮರ್ಥ್ಯ ಗಂಭೀರ್​ ಬಿಟ್ರೆ, ಬೇರೆಯಾರಿಗೂ ಇಲ್ಲ. ಹೀಗಾಗಿಯೇ ಬಿಸಿಸಿಐ ಮಣೆ ಹಾಕಿದೆ.

ಗಂಭೀರ್​ ಆಯ್ಕೆ ಮಾಡಿದ್ದು ಯಾಕೆ..?
ಗೌತಮ್ ಗಂಭೀರ್​ಗೆ ದೇಶಕ್ಕೆ ಸೇವೆ ಸಲ್ಲಿಸೋ ಆಸಕ್ತಿ ಮೊದಲಿಂದ ಇತ್ತು. ಟೀಮ್ ಇಂಡಿಯಾದ ಕೋಚ್ ಹುದ್ದೆಯ ಬಗ್ಗೆ ಆಸಕ್ತಿ ಹೊಂದಿದ್ರು. 2007ರ ಟಿ20, 2011ರ ಏಕದಿನ ವಿಶ್ವಕಪ್ ಗೆಲುವಿನಲ್ಲಿ ಆಟಗಾರನಾಗಿ ಗಂಭೀರ್ ಪಾತ್ರ ಮಹತ್ವದ್ದಾಗಿತ್ತು. ನಾಯಕನಾಗಿ ಐಪಿಎಲ್‌ನಲ್ಲಿ 2 ಬಾರಿ ಕೆಕೆಆರ್ ತಂಡವನ್ನ ಚಾಂಪಿಯನ್ ಮಾಡಿದ್ದ ಗಂಭೀರ್, 2024ರ ಐಪಿಎಲ್‌ನಲ್ಲಿ ಮೆಂಟರ್‌ ಆಗಿಯೂ ಯಶಸ್ಸು ಕಂಡಿದ್ದಾರೆ. ಗಂಭೀರ್​ ಮೆಂಟರ್ ಆಗಿದ್ದಾಗ ಸತತ 2 ಸೀಸನ್ ಪ್ಲೇ ಆಫ್​ ಗೆ ಲಕ್ನೋ ತಂಡವೂ ಪ್ರವೇಶಿಸಿದೆ. ಯುವ ಆಟಗಾರರ ಪ್ರತಿಭೆಯನ್ನ ಹೊರತೆಗೆಯುವ ಕಲೆ ಇದೆ. ಗೆಲುವಿಗಾಗಿ ಯಾವುದೇ ಕಠಿಣ ನಿರ್ಧಾರಕ್ಕೂ ಹಿಂಜರಿಯಲ್ಲ. ಈ ಕಾರಣಗಳೇ ಗಂಭೀರ್​ಗೆ ಆಯ್ಕೆ ಹಿಂದಿರೋ ಲೆಕ್ಕಾಚಾರವಾಗಿದೆ.

ಇದನ್ನೂ ಓದಿ:KL ರಾಹುಲ್ ಟಿ-20 ಕರಿಯರ್​ ಖತಂ..? ಕೋಚ್ ಗಂಭೀರ್ ಕೂಡ ರಾಹುಲ್​ ಎಂಟ್ರಿಗೆ ಅಡ್ಡಿ..!

ಟೀಮ್ ಇಂಡಿಯಾ ಗುರುವಿನ ಪಟ್ಟಕ್ಕೆ ಗೌತಮ್​​ ಗಂಭೀರ್​ ಸೂಕ್ತ ವ್ಯಕ್ತಿ ಎಂಬ ಅಭಿಪ್ರಾಯ ಎಲ್ಲೆಡೆ ಕೇಳಿ ಬರ್ತಿದೆ. ಈ ಹಿಂದೆ ಟೀಮ್ ಇಂಡಿಯಾದ ಯಶಸ್ಸಿನಲ್ಲಿ ಆಟಗಾರನಾಗಿ ಪ್ರಮುಖ ಪಾತ್ರ ವಹಿಸಿದ್ದ ಗೌತಮ್ ಗಂಭೀರ್​​, ಇದೀಗ ದ್ರೋಣಾಚಾರ್ಯರಾಗಿ ಟೀಮ್ ಇಂಡಿಯಾವನ್ನ ವಿಶ್ವ ಕ್ರಿಕೆಟ್​ನಲ್ಲಿ ಮತ್ತಷ್ಟು ರಾರಾಜಿಸುವಂತೆ ಮಾಡಲಿ ಅನ್ನೋದು ಎಲ್ಲರ ಆಶಯ.

ವಿಶೇಷ ವರದಿ: ಸಂತೋಷ್

ಇದನ್ನೂ ಓದಿ:ಎಷ್ಟೇ ದೊಡ್ಡವರಾದರೂ ಹಿಂದಿನ ಉಪಕಾರ ಮರೆಯಲಿಲ್ಲ.. ರೋಹಿತ್ ಜೀವನ ಬದಲಿಸಿದ ಈ ವ್ಯಕ್ತಿ ಯಾರು?

ವಿಶೇಷ ಸೂಚನೆ: ಕ್ರಿಕೆಟ್​​ನ ವಿಶೇಷ ಸುದ್ದಿಗಳಿಗಾಗಿ ವೀಕ್ಷಿಸಿ ‘ರನ್ ಭೂಮಿ’ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್ ಫಸ್ಟ್ ಚಾನೆಲ್