ಭಾರತ-ಪಾಕ್ ಯುದ್ಧ ನಿಲ್ಲಿಸಿದ್ದು ನಾನೇ, ಇಲ್ಲದಿದ್ರೆ 200% ಟ್ಯಾಕ್ಸ್ ಹಾಕ್ತಿದ್ದೆ- ಟ್ರಂಪ್ ಮತ್ತೆ ಹುಚ್ಚುಚ್ಚು ಹೇಳಿಕೆ

ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತೊಮ್ಮೆ ಭಾರತ ಮತ್ತು ಪಾಕಿಸ್ತಾನದ ವಿಚಾರ ಪ್ರಸ್ತಾಪಿಸಿ ಜಾಗತಿಕ ಮಟ್ಟದಲ್ಲಿ ಹೊಸ ಚರ್ಚೆ ಹುಟ್ಟುಹಾಕಿದ್ದಾರೆ. 2025ರಲ್ಲಿ ಉಭಯ ದೇಶಗಳ ನಡುವೆ ನಡೆದಿದ್ದ ಸೇನಾ ಸಂಘರ್ಷವನ್ನು (Military Standoff) ನಿಲ್ಲಿಸಿದ್ದು ನಾನೇ ಎಂದು ಬೀಗಿರುವ ಟ್ರಂಪ್, ಇದಕ್ಕಾಗಿ ತಾವು ಭಾರತ ಮತ್ತು ಪಾಕಿಸ್ತಾನಕ್ಕೆ ಆರ್ಥಿಕ ಬೆದರಿಕೆ ಹಾಕಿದ್ದೆ ಎಂಬ ಸ್ಫೋಟಕ ಹೇಳಿಕೆ ನೀಡಿದ್ದಾರೆ.
ವಾಷಿಂಗ್ಟನ್‌ನಲ್ಲಿ ನಡೆದ ‘ಬೋರ್ಡ್ ಆಫ್ ಪೀಸ್’ (Board of Peace) ಕಾರ್ಯಕ್ರಮದಲ್ಲಿ ಮಾತನಾಡಿದ ಟ್ರಂಪ್, ತಮ್ಮ ಮಧ್ಯಸ್ಥಿಕೆಯ ಬಗ್ಗೆ ಹೆಮ್ಮೆಯಿಂದ ಹೇಳಿಕೊಂಡಿದ್ದಾರೆ.

ಇದನ್ನೂ ಓದಿ: ಟ್ರಂಪ್ ಕನಸಿನ ‘ಶಾಂತಿ ಮಂಡಳಿ’ ಸಭೆಯಲ್ಲಿ ಭಾರತ ಭಾಗಿ.. ಆದರೆ ಸದಸ್ಯತ್ವ ಪಡೆಯಲಿಲ್ಲ.. ಮತ್ತೆ..?

ಟ್ರಂಪ್ ಹೇಳಿದ್ದೇನು?

‘ನನಗೆ ಪ್ರಧಾನಿ ಮೋದಿ ಮತ್ತು ಪಾಕಿಸ್ತಾನದ ನಾಯಕರು ಚೆನ್ನಾಗಿ ಪರಿಚಯ. ಯುದ್ಧ ನಡೆಯುತ್ತಿದ್ದಾಗ ಇಬ್ಬರಿಗೂ ಕರೆ ಮಾಡಿದೆ. ನೋಡಿ, ನೀವಿಬ್ಬರೂ ಜಗಳ ನಿಲ್ಲಿಸದಿದ್ದರೆ, ನಾನು ನಿಮ್ಮ ದೇಶಗಳ ಮೇಲೆ 200% ಸುಂಕ (Tariff) ವಿಧಿಸುತ್ತೇನೆ. ನಾನು ನಿಮ್ಮೊಂದಿಗೆ ವ್ಯಾಪಾರ ಒಪ್ಪಂದ ಮಾಡಿಕೊಳ್ಳುವುದಿಲ್ಲ’ ಎಂದು ಎಚ್ಚರಿಸಿದೆ. ಹಣ ಕಳೆದುಕೊಳ್ಳುವ ಭಯದಿಂದ ತಕ್ಷಣವೇ ಯುದ್ಧ ನಿಲ್ಲಿಸಿದರು ಎಂದು ಟ್ರಂಪ್ ಹೇಳಿಕೊಂಡಿದ್ದಾರೆ.

11 ಜೆಟ್ ವಿಮಾನಗಳು ಪತನವಂತೆ

ವಿಷಯವನ್ನು ಮತ್ತಷ್ಟು ಉತ್ಪ್ರೇಕ್ಷೆ ಮಾಡಿದ ಟ್ರಂಪ್, ಆ ಯುದ್ಧದಲ್ಲಿ ಬರೋಬ್ಬರಿ 11 ದುಬಾರಿ ಯುದ್ಧ ವಿಮಾನಗಳನ್ನು (Jets) ಹೊಡೆದುರುಳಿಸಲಾಗಿತ್ತು. ನನ್ನ ಮಧ್ಯಸ್ಥಿಕೆಯಿಂದಾಗಿ ಸುಮಾರು 2.5 ಕೋಟಿ ಜನರ ಪ್ರಾಣ ಉಳಿಯಿತು ಎಂದಿದ್ದಾರೆ. ವಿಶೇಷವೆಂದರೆ ಈ ಹಿಂದೆ 7 ವಿಮಾನಗಳು ಪತನವಾಗಿದ್ದವು ಮತ್ತು 1 ಕೋಟಿ ಜನರ ಪ್ರಾಣ ಉಳಿಸಿದ್ದೆ ಎಂದಿದ್ದರು. ಈಗ ಆ ಸಂಖ್ಯೆಯನ್ನು ಏರಿಸಿದ್ದಾರೆ!

ಇದನ್ನೂ ಓದಿ: ನಂಗೆ ಪುರಷರ ಮೇಲೆ ಆಸಕ್ತಿ ಇಲ್ಲ, ಮಹಿಳೆಯರ ಮೇಲೆ ಆಸಕ್ತಿ -ಟ್ರಂಪ್ ಯಾರನ್ನ ನೋಡಿ ಹೇಳಿದ್ರು..?

ಪಾಕ್ ಪ್ರಧಾನಿ ಶೆಹಬಾಜ್ ಷರೀಫ್‌ಗೆ ಮುಜುಗರ

ಕಾರ್ಯಕ್ರಮದಲ್ಲಿ ಪಾಕಿಸ್ತಾನದ ಪ್ರಧಾನಿ ಶೆಹಬಾಜ್ ಷರೀಫ್ ಕೂಡ ಉಪಸ್ಥಿತರಿದ್ದರು. ಭಾಷಣದ ಮಧ್ಯೆ ಟ್ರಂಪ್, ‘ಭಾರತ ಮತ್ತು ಪಾಕಿಸ್ತಾನದ ವಿಚಾರ ದೊಡ್ಡದು. ಷರೀಫ್ ಅವರೇ, ದಯವಿಟ್ಟು ಒಂದೇ ಒಂದು ಸೆಕೆಂಡ್ ಎದ್ದು ನಿಲ್ಲಿ’ ಎಂದು ಆದೇಶಿಸುವ ಧಾಟಿಯಲ್ಲಿ ಹೇಳಿದರು. ಷರೀಫ್ ಎದ್ದು ನಿಲ್ಲುತ್ತಿದ್ದಂತೆಯೇ, ‘ನಾನು 2.5 ಕೋಟಿ ಜನರ ಪ್ರಾಣ ಉಳಿಸಿದೆ ಎಂದು ನೀವೇ ಹೇಳಿಕೆ ನೀಡಿದ್ದಿರಿ, ಧನ್ಯವಾದಗಳು’ ಎಂದು ಟ್ರಂಪ್ ನೆನಪಿಸಿದರು. ಎಲ್ಲರ ಮುಂದೆ ಟ್ರಂಪ್ ಹೀಗೆ ಮಾಡಿದ್ದು ಷರೀಫ್‌ಗೆ ಮುಜುಗರ ತಂದಿಟ್ಟಿತು.

ಭಾರತದ ಸ್ಪಷ್ಟನೆ ಏನು?

ಟ್ರಂಪ್​ನ ಈ ಎಲ್ಲಾ ವಾದಗಳನ್ನು ಭಾರತ ಸತತವಾಗಿ ತಳ್ಳಿಹಾಕಿದೆ. 2025ರ ಮೇ ತಿಂಗಳಲ್ಲಿ ನಡೆದ ಸಂಘರ್ಷದ ವೇಳೆ ಯಾವುದೇ ಮೂರನೇ ವ್ಯಕ್ತಿಯ ಮಧ್ಯಸ್ಥಿಕೆ ಇರಲಿಲ್ಲ. ಭಾರತೀಯ ಸೇನೆ ನಡೆಸಿದ ‘ಆಪರೇಷನ್ ಸಿಂಧೂರ್’ (Operation Sindoor) ಬಳಿಕ ಎರಡೂ ದೇಶಗಳ ಮಿಲಿಟರಿ ಆಪರೇಷನ್ ಡೈರೆಕ್ಟರ್ ಜನರಲ್ (DGMOs) ಮಟ್ಟದ ನೇರ ಮಾತುಕತೆಯಿಂದ ಕದನ ವಿರಾಮ ಏರ್ಪಟ್ಟಿತ್ತು ಎಂದು ಭಾರತ ಸ್ಪಷ್ಟಪಡಿಸಿದೆ. ಟ್ರಂಪ್ ಹೇಳುತ್ತಿರುವಂತೆ 11 ವಿಮಾನಗಳು ಪತನವಾಗಿಲ್ಲ ಎಂಬುದನ್ನು ಭಾರತೀಯ ಮೂಲಗಳು ದೃಢಪಡಿಸಿವೆ.

ಇದನ್ನೂ ಓದಿ: ‘ಕಾಪಾಡಿ’ ಎಂದು ಅಜ್ಜಿ ಕಣ್ಣೀರು ಇಟ್ಟರೂ ತಿರುಗಿ ನೋಡಲಿಲ್ಲ.. ಹಿಟ್ ಅಂಡ್ ರನ್​ಗೆ 6 ವರ್ಷದ ಬಾಲಕಿ ಬಲಿ

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ