ದಷ್ಟಪುಷ್ಟ ದೇಹ, ಬೆಟ್ಟವನ್ನೆ ಕುಟ್ಟಿ ಪುಡಿ ಮಾಡಬಲ್ಲಂತಹ ರಟ್ಟೆಗಳು. ನಿತ್ಯ ಜಿಮ್​ನಲ್ಲಿ ಬೆವರನ್ನು ನೀರಿನಂತೆ ಹರಿಸಿ, ದೇಹವನ್ನು ಕಡೆದಿಟ್ಟ ಶಿಲೆಯಂತೆ ಹುರಿಗೊಳಿಸಿ ಸದೃಢ ದೇಹದಲ್ಲಿಯೇ ಸದೃಢ ಮನಸ್ಸು ಇರುತ್ತದೆ ಎಂದು ಸಾಬೀತುಮಾಡುತ್ತಾರೆ ಬಾಡಿ ಬಿಲ್ಡರ್​ಗಳು. ಹೀಗೆಯೇ ನಿತ್ಯ ಜಿಮ್​ನಲ್ಲಿ ಕಸರತ್ತಿಗೆ ದೇಹವನ್ನೊಡ್ಡಿ,  ಹಲವು ವ್ಯಾಯಾಮಗಳಲ್ಲಿ ತೊಡಗಿಸಿಕೊಂಡು ದೇಹವನ್ನು ಅಕ್ಷರಶಃ ವಜ್ರಕಾಯದಂತೆ ಹುರಿಗೊಳಿಸಿದ್ದ, ವಿಶ್ವದ ದೈತ್ಯ ಬಾಡಿಬಿಲ್ಡರ್ ಎಂದೇ ಖ್ಯಾತಿ ಪಡೆದಿದ್ದ ಗೋಲೆಮ್ ಯೆಫಿಮ್​ಚ್ಕಿ ತಮ್ಮ 36ನೇ ವಯಸ್ಸಿನಲ್ಲಿ ಹೃದಯಾಘಾತದಿಂದ ಮೃತಪಟ್ಟಿದ್ದಾರೆ.

ಸೆಪ್ಟಂಬರ್ 6 ರಂದು ಈ ದೈತ್ಯಕಾಯನನ್ನು ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಅಂದು ಕೋಮಾಗೆ ಜಾರಿದ್ದ ಗೋಲೆಮ್​ ಕೆಲವು ದಿನಗಳ ನಂತರ ಇಹಲೋಕವನ್ನು ತ್ಯಜಿಸಿದ್ದಾರೆ. ಸದಾ ಜಿಮ್​ನಲ್ಲಿ ದೇಹವನ್ನು ಹುರಿಗೊಳಸುತ್ತಿದ್ದ ಗೋಲೆಮ್​ ಯಾವುದೇ ದೇಹದಾರ್ಢ್ಯ ಸ್ಪರ್ಧೆಗಳಲ್ಲಿ ಎಂದಿಗೂ ಭಾಗವಹಿಸಿದ್ದಿಲ್ಲ. ಆದರೂ ಪ್ರೊಫೆಷನಲ್ ಬಾಡಿ ಬಿಲ್ಡರ್​ಗಳೇ ನಾಚುವಂತಹ ದೇಹವನ್ನಿಟ್ಟುಕೊಂಡಿದ್ದರು ಗೋಲೆಮ್. ಆದರೆ ತಮ್ಮ ದೇಹದಾರ್ಢ್ಯದ ವಿಡಿಯೋಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಪೋಸ್ಟ್ ಮಾಡುವ ಮೂಲಕ ಅವರಿಗೆ ಅಲ್ಪಸ್ವಲ್ಪ ಆದಾಯ ಹುಟ್ಟಿಕೊಳ್ಳುತ್ತಿತ್ತು.

ಇದನ್ನೂ ಓದಿ: ಮದುವೆಗೂ ಮುನ್ನ ಜೆನೆಟಿಕ್​ ಪರೀಕ್ಷೆ ಕಡ್ಡಾಯ.. ಆರೋಗ್ಯ ಇಲಾಖೆ ನಿರ್ಧಾರ

ಬೆಲುರಸ್​ನ ಈ ಬಾಡಿಬಿಲ್ಡರ್​ನ ರಟ್ಟೆಯ ಗಾತ್ರ ಅಂದ್ರೆ ಬೈಸಿಪ್ಸ್​​ 25 ಇಂಚಿನಷ್ಟು ಇತ್ತು ಅಂದ್ರೆ ಊಹಿಸಿಕೊಳ್ಳಿ ಅವರ ಡಯಟ್ ಹಾಗೂ ವರ್ಕೌಟ್​​ ಯಾವ ಮಟ್ಟದ್ದಿರಬೇಕು ಅಂತ. ಅವರು ನಿತ್ಯ 16,500 ಕ್ಯಾಲರೀಸ್​ ಸೇವಿಸುತ್ತಿದ್ದರು ಎಂದು ಹೇಳಲಾಗುತ್ತದೆ. ಇತ್ತೀಚೆಗೆ ಅವರು 273 ಕೆಜಿ ಬೆಂಚ್​ಪ್ರೆಸ್, 318 ಕೆಜಿಯ ಡೆಡ್​ಲಿಫ್ಟ್​ ಹಾಗೂ 318 ಕೆಜಿ ಸ್ಕ್ವಾಟ್​ ವರ್ಕೌಟ್ ಮಾಡಿದ್ದರು ಎನ್ನಲಾಗುತ್ತಿದೆ

ನಮಗೆ ಕರ್ನಾಟಕ ರತ್ನ ಪುನಿತ್ ರಾಜಕುಮಾರ್ ಅವರ ಸಾವನ್ನು ಇಂದಿಗೂ ಕೂಡ ಅರಗಿಸಿಕೊಳ್ಳಲು ಆಗುತ್ತಿಲ್ಲ. ಅಪ್ಪು ಕೂಡ ಹೀಗೆ ವ್ಯಾಯಾಮ ಮಾಡುವಾಗಲೇ ಎದೆನೋವು ಬಂದು ಹೃದಯಸ್ತಂಭನಗೊಂಡು ನಮ್ಮನ್ನು ಅಗಲಿ ಹೋದರು. ಅಂದಿನಿಂದಲೂ ಈ ಜಿಮ್ ವಿಚಾರದಲ್ಲಿ ಒಂದು ಅನುಮಾನ ಸದಾ ಸುದ್ದಿಯಲ್ಲಿಯೇ ಇರುತ್ತದೆ. ಆದ್ರೆ ಇದು ಅಪ್ಪುವಿಗೆ ಮಾತ್ರವಲ್ಲ ಅನೇಕ ಬಾಡಿಬಿಲ್ಡರ್​ಗಳು ಕೂಡ ಹಾರ್ಟ್ ಅಟ್ಯಾಕ್​ನಿಂದ ತೊಂದರೆಗೆ ಒಳಗಾಗಿದ್ದಾರೆ. ಸಾವನ್ನೂ ಅಪ್ಪಿದ್ದಾರೆ. ಆದ್ರೆ  ಬಾಡಿಬಿಲ್ಡರ್​ಗಳಲ್ಲಿ  ಈ ರೀತಿಯಾದ ಅಪಾಯಗಳು ಹೆಚ್ಚು ಕಾಣುತ್ತಿರುವುದು ಕೋವಿಡ್​ 19 ಮಹಾಮಾರಿ ಬಂದು ಹೋದ ನಂತರ ಎಂದು ಒಂದಿಷ್ಟು ಸ್ಪಷ್ಟನೆಗಳು ದೊರೆಯತ್ತಿವೆ

ಆದ್ರೆ ಒಬ್ಬ ವ್ಯಕ್ತಿ ನಿತ್ಯ ಸರಿಯಾಗಿ ವ್ಯಾಯಾಮ ಮಾಡಿ, ಸರಿಯಾದ ಆಹಾರ ಸೇವಿಸಿ ಸರಿಯಾದ ಜೀವನಶೈಲಿಯನ್ನು ತಮ್ಮದಾಗಿಸಿಕೊಂಡರೂ ಕೂಡ 30ಸೆಕೆಂಡ್​ನ ಆ ಒಂದು ಹಾರ್ಟ್​ ಅಟ್ಯಾಕ್ ಅವರ ಬದುಕನ್ನು ಕಸಿದುಕೊಳ್ಳುತ್ತಿದೆ. ಇದು ಯಾಕೆ ಅನ್ನೋದು ಇನ್ನೂ ಕೂಡ ಪ್ರಶ್ನೆಯಾಗಿಯೇ ಉಳಿದುಕೊಂಡಿದೆ. ಅದರಲ್ಲೂ ವೇಟ್​ ಲಿಫ್ಟಿಂಗ್​ನಂತ ಕಸರತ್ತು ಮಾಡುವ ಬಾಡಿಬಿಲ್ಡರ್​ಗಳು ಈ ರೀತಿಯ ಅಪಾಯಕ್ಕೆ ಹೆಚ್ಚು ಸಿಲಕುತ್ತಿದ್ದಾರೆ ಅತಿಯಾಗಿ ದೇಹವನ್ನು ದುಡಿಸುವುದರಿಂದ ನಾವು ಎಷ್ಟೇ ಆಹಾರ ಶೈಲಿ ಜೀವನ ಶೈಲಿ ಪಾಲಿಸಿದರೂ ಕೂಡ ಇಂತಹ ಸಮಸ್ಯೆಗಳು ಸೃಷ್ಟಿಯಾಗುವ ಸಂಭವ ಇರುತ್ತವೆ ಎನ್ನುತ್ತಾರೆ ಕಾರ್ಡಿಯಾಲಜಿ ಫೋರ್ಟಿಸ್ ಆಸ್ಪತ್ರೆಯ ಪ್ರಧಾನ ನಿರ್ದೇಶಕರಾದ ಡಾ ಮುಂಜಿಧರ್ ಸಿಂಗ್ ಸಂಧು.