1.35 ಲಕ್ಷ ಟಿಕೆಟ್ ಸೋಲ್ಡ್, 80 ಪ್ರೈವೇಟ್ ಜೆಟ್‌ಗಳು ಎಂಟ್ರಿ! ಹೇಗಿದೆ ಫೈನಲ್ ಮ್ಯಾಚ್ ಕ್ರೇಜ್..?

ಕ್ರಿಕೆಟ್ ಜಗತ್ತಿನ ಬಹುನಿರೀಕ್ಷಿತ ಟಿ20 ವಿಶ್ವಕಪ್ 2026ರ ಫೈನಲ್ ಪಂದ್ಯಕ್ಕೆ ಕ್ಷಣಗಣನೆ ಶುರುವಾಗಿದೆ. ಸಂಜೆ 7 ಗಂಟೆಗೆ ಗುಜರಾತ್‌ನ ಅಹಮದಾಬಾದ್‌ನಲ್ಲಿರುವ ವಿಶ್ವದ ಅತಿದೊಡ್ಡ 'ನರೇಂದ್ರ ಮೋದಿ ಸ್ಟೇಡಿಯಂ'ನಲ್ಲಿ ಟ್ರೋಫಿಗಾಗಿ ಟೀಮ್ ಇಂಡಿಯಾ ಮತ್ತು ನ್ಯೂಜಿಲೆಂಡ್ ತಂಡಗಳ ನಡುವೆ ಹೈ-ವೋಲ್ಟೇಜ್ ಸೆಣಸಾಟ ನಡೆಯಲಿದೆ.

ತಮ್ಮ ನೆಚ್ಚಿನ ತಂಡಗಳ ಕದನ ಕಣ್ತುಂಬಿಕೊಳ್ಳಲು ಅಭಿಮಾನಿಗಳು ದೇಶ-ವಿದೇಶಗಳಿಂದ ಅಹಮದಾಬಾದ್‌ಗೆ ಹರಿದುಬರುತ್ತಿದ್ದು, ನಗರದಲ್ಲಿ ಕ್ರಿಕೆಟ್ ಫೀವರ್ ತಾರಕಕ್ಕೇರಿದೆ. ಫೈನಲ್ ಪಂದ್ಯದ ಕ್ರೇಜ್ ಯಾವ ಮಟ್ಟಿಗಿದೆ ಎಂದರೆ, ವಿಮಾನಗಳಿಂದ ಹಿಡಿದು ಐಷಾರಾಮಿ ಹೋಟೆಲ್‌ಗಳವರೆಗೆ ಎಲ್ಲವೂ ಬುಕ್ ಆಗಿವೆ!

ಅಹಮದಾಬಾದ್‌ನಲ್ಲಿ ಕ್ರಿಕೆಟ್ ಕ್ರೇಜ್

1.35 ಲಕ್ಷ ಟಿಕೆಟ್ ಸೋಲ್ಡ್: ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ನಡೆಯಲಿರುವ ಈ ಬೃಹತ್ ಪಂದ್ಯಕ್ಕಾಗಿ ಬರೋಬ್ಬರಿ 1.35 ಲಕ್ಷಕ್ಕೂ ಅಧಿಕ ಟಿಕೆಟ್‌ಗಳು ಬಿಕರಿಯಾಗಿವೆ. ಮೈದಾನ ಕಿಕ್ಕಿರಿದು ತುಂಬುವುದು ಖಚಿತವಾಗಿದೆ.

6000 ಐಷಾರಾಮಿ ರೂಮ್‌ಗಳು ಬುಕ್: ನಗರದ ಪ್ರತಿಷ್ಠಿತ ಹಾಗೂ ಐಷಾರಾಮಿ ಹೋಟೆಲ್‌ಗಳಲ್ಲಿ ಈಗಾಗಲೇ 6000 ಕ್ಕೂ ಹೆಚ್ಚು ಕೊಠಡಿಗಳು ಕಾಯ್ದಿರಿಸಲ್ಪಟ್ಟಿವೆ.

80 ಪ್ರೈವೇಟ್ ಜೆಟ್‌ಗಳ ಆಗಮನ: ವಿವಿಐಪಿಗಳು ಹಾಗೂ ಗಣ್ಯರನ್ನು ಹೊತ್ತ ಸುಮಾರು 80 ಖಾಸಗಿ ಜೆಟ್‌ಗಳು (Private Jets) ಅಹಮದಾಬಾದ್ ವಿಮಾನ ನಿಲ್ದಾಣಕ್ಕೆ ಬಂದಿಳಿಯಲಿವೆ.

23 ವಿಮಾನಗಳು ಫುಲ್: ಫೈನಲ್ ಪಂದ್ಯಕ್ಕಾಗಿ ವಿವಿಧ ನಗರಗಳಿಂದ ಆಗಮಿಸುವ ಅಭಿಮಾನಿಗಳಿಗಾಗಿ 23 ಕಮರ್ಷಿಯಲ್ ವಿಮಾನಗಳು ಈಗಾಗಲೇ ಬುಕ್ ಆಗಿವೆ.

ಇದನ್ನೂ ಓದಿ: ಟಿ20 ವಿಶ್ವಕಪ್ 2026: ಮಳೆ ಬರುತ್ತಾ? ಪಿಚ್ ರಿಪೋರ್ಟ್ ಹೇಗಿದೆ?

ವಿಶೇಷ ರೈಲುಗಳ ವ್ಯವಸ್ಥೆ: ಅಭಿಮಾನಿಗಳ ಅನುಕೂಲಕ್ಕಾಗಿ ರೈಲ್ವೆ ಇಲಾಖೆಯು ವಿಶೇಷ ರೈಲುಗಳ ವ್ಯವಸ್ಥೆಯನ್ನು ಮಾಡಿದೆ.
ವಿವಿಐಪಿಗಳ ದಂಡು: ರಿಲಯನ್ಸ್ ಒಡೆಯ ಮುಕೇಶ್ ಅಂಬಾನಿ ಹಾಗೂ ಟೆಲಿಕಾಂ ದಿಗ್ಗಜ ಸುನಿಲ್ ಭಾರ್ತಿ ಮಿತ್ತಲ್ ಸೇರಿದಂತೆ ದೇಶದ ಹಲವು ಉದ್ಯಮಿಗಳು, ಗಣ್ಯರು ಹಾಗೂ ಸಿನಿಮಾ ತಾರೆಯರು ಫೈನಲ್ ಪಂದ್ಯ ವೀಕ್ಷಿಸಲು ಸಾಕ್ಷಿಯಾಗಲಿದ್ದಾರೆ.

ಬ್ಯಾಟರ್‌ಗಳಿಗೆ ಹಬ್ಬ!

ಅಹಮದಾಬಾದ್ ಪಿಚ್ ಅನ್ನು ಕೆಂಪು ಮತ್ತು ಕಪ್ಪು ಮಣ್ಣಿನ ಮಿಶ್ರಣದಿಂದ (Mixed Soil) ಸಿದ್ಧಪಡಿಸಲಾಗಿದೆ. ಆದರೆ, ಇದರಲ್ಲಿ ಕಪ್ಪು ಮಣ್ಣಿಗಿಂತ ಕೆಂಪು ಮಣ್ಣಿನ ಪ್ರಮಾಣವೇ ಹೆಚ್ಚಾಗಿದೆ. ಈ ಪಿಚ್‌ನಲ್ಲಿ ಅತ್ಯುತ್ತಮ ಬೌನ್ಸ್ ಇರಲಿದ್ದು, ಎರಡೂ ಇನ್ನಿಂಗ್ಸ್‌ಗಳಲ್ಲೂ ಚೆಂಡು ಅತ್ಯಂತ ಸುಲಭವಾಗಿ ಬ್ಯಾಟ್‌ಗೆ ಬರಲಿದೆ. ಹೀಗಾಗಿ ಇದೊಂದು ಹೈ-ಸ್ಕೋರಿಂಗ್ (ರನ್ ಮಳೆ) ಪಂದ್ಯವಾಗುವುದರಲ್ಲಿ ಅನುಮಾನವಿಲ್ಲ.

ಬಹುಮಾನದ ಮೊತ್ತವೆಷ್ಟು?

• ಒಟ್ಟು ಬಹುಮಾನದ ಮೊತ್ತ: ₹120 ಕೋಟಿ
• ಚಾಂಪಿಯನ್ ಪಟ್ಟಕ್ಕೇರುವ ತಂಡಕ್ಕೆ: ₹27.48 ಕೋಟಿ
• ರನ್ನರ್ ಅಪ್ (ಫೈನಲ್‌ನಲ್ಲಿ ಸೋತ ತಂಡಕ್ಕೆ): ₹14.65 ಕೋಟಿ
• ಸೆಮಿಫೈನಲ್ ತಲುಪಿದ ತಂಡಗಳಿಗೆ: ತಲಾ ₹7.24 ಕೋಟಿ.

ಒಟ್ಟಾರೆಯಾಗಿ, ಅಹಮದಾಬಾದ್‌ನಲ್ಲಿ ಅಕ್ಷರಶಃ ಹಬ್ಬದ ವಾತಾವರಣ ನಿರ್ಮಾಣವಾಗಿದ್ದು, ಟೀಮ್ ಇಂಡಿಯಾ ತವರಿನಲ್ಲಿ ಮತ್ತೊಮ್ಮೆ ವಿಶ್ವಕಪ್ ಎತ್ತಿಹಿಡಿಯುತ್ತದಾ ಎಂಬುದನ್ನು ಕಾದು ನೋಡಬೇಕಿದೆ. ಪಂದ್ಯವು ಸಂಜೆ 7 ಗಂಟೆಗೆ ಸರಿಯಾಗಿ ಆರಂಭವಾಗಲಿದೆ.

ಇದನ್ನೂ ಓದಿ: ‘ನನ್ನ ಯಾಕೆ ಮದುವೆಗೆ ಕರಿಲಿಲ್ಲ?’ ಕೋಪಿಸಿಕೊಂಡ ಬಾಲಕಿ -ದೇವರಕೊಂಡ ರಿಪ್ಲೈ ಏನು ಗೊತ್ತಾ?

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ