ಮತ್ತೆ ಟೀಂ ಇಂಡಿಯಾದಲ್ಲಿ ರೋಹಿತ್ ಕೊಹ್ಲಿ ಬಗ್ಗೆ ಮಾತುಕತೆ.. ಶೀಘ್ರದಲ್ಲೇ ಶಾಕಿಂಗ್ ನ್ಯೂಸ್​..?

ಇಂಡೋ-ಇಂಗ್ಲೆಂಡ್​​ ಟೆಸ್ಟ್​ ಸರಣಿ ಅಂತ್ಯ ಕಂಡಿದೆ. ಕೊನೆಯ ಟೆಸ್ಟ್​​ನಲ್ಲಿ ರೋಚಕ ಗೆಲುವು ಸಾಧಿಸಿದ ಟೀಮ್​ ಇಂಡಿಯಾ ಸರಣಿ ಸಮಬಲ ಸಾಧಿಸಿ ಇಂಗ್ಲೆಂಡ್​ ಟಾಟಾ ಹೇಳಿದೆ. ಐತಿಹಾಸಿಕ ಸಾಧನೆ ಮಾಡಿದ ಯಂಗ್​ ಇಂಡಿಯಾ ಭಾರತದ ನೆಲದಲ್ಲಿ ಲ್ಯಾಂಡ್​ ಆಗೋಕೆ ಮುನ್ನವೇ ಬಿಸಿಸಿಐ ವಲಯದಲ್ಲಿ ಬೆಳವಣಿಗೆಗಳು ಗರಿಗೆದರಿವೆ. ಸೀನಿಯರ್ಸ್​ ಭವಿಷ್ಯ ಈಗ ಅಡಕತ್ತರಿಗೆ ಸಿಲುಕಿದೆ.

2027ರ ಏಕದಿನ ವಿಶ್ವಕಪ್​ಗೆ ಸಿದ್ಧತೆ ಶುರು

ಇಂಗ್ಲೆಂಡ್​ ಪ್ರವಾಸದಲ್ಲಿ ಯಂಗ್​ ಇಂಡಿಯಾಗೆ ಸಕ್ಸಸ್​ ಸಿಕ್ಕ ಬೆನ್ನಲ್ಲೇ ಟೀಮ್​ ಇಂಡಿಯಾದಲ್ಲಿ ಸೀನಿಯರ್​ಗಳ ಭವಿಷ್ಯ ಅತಂತ್ರಕ್ಕೆ ಸಿಲುಕಿದೆ. ಟೆಸ್ಟ್​ನಂತೆ ಏಕದಿನ ಫಾರ್ಮೆಟ್​ಗೂ ಯುವ ತಂಡ ಕಟ್ಟುವ ಬಗ್ಗೆ ಚರ್ಚೆಗಳು ಶುರುವಾಗಿವೆ. ಇನ್ನೆರಡು ವರ್ಷಗಳಲ್ಲಿ ಮಹತ್ವದ ಏಕದಿನ ವಿಶ್ವಕಪ್​ ಟೂರ್ನಿಯಿದೆ. 2027ರ ಟೂರ್ನಿಗೆ ಸಿದ್ಧತೆಯ ದೃಷ್ಟಿಯಿಂದ ಈಗಿನಿಂದಲೇ ಈಗಿನಿಂದಲೇ ಕೋರ್​​ ಟೀಮ್​ ಕಟ್ಟುವ ಪ್ರಯತ್ನಗಳು ಆರಂಭವಾಗಿವೆ. ಹೀಗಾಗಿ ರೋಹಿತ್​​ ಶರ್ಮಾ, ವಿರಾಟ್​​ ಕೊಹ್ಲಿ ಭವಿಷ್ಯದ ಚರ್ಚೆ ಎದ್ದಿದೆ. 

ಬಿಸಿಸಿಐ ಕಚೇರಿಯಲ್ಲಿ ಶೀಘ್ರದಲ್ಲೇ ಮೀಟಿಂಗ್​

ಇಂಗ್ಲೆಂಡ್​ನಿಂದ ಟೀಮ್​ ಮ್ಯಾನೇಜ್​​ಮೆಂಟ್​ ವಾಪಾಸ್ಸಾದ ಬಳಿಕ ಬಿಸಿಸಿಐ ಕಚೇರಿಯಲ್ಲಿ ಸಭೆಯೊಂದು ನಡೆಯಲಿದೆ ಅನ್ನೋದು ಸದ್ಯದ ಮಾಹಿತಿ. ಸೆಲೆಕ್ಷನ್ ಕಮಿಟಿ ಚೇರ್ಮನ್​ ಅಜಿತ್​ ಅಗರ್ಕರ್​, ಹೆಡ್​ ಕೋಚ್​ ಗೌತಮ್​ ಗಂಭೀರ್​ ಬಾಸ್​ಗಳ ಸಭೆಯಲ್ಲಿ ಭಾಗಿಯಾಗಲಿದ್ದಾರೆ. ಇಂಗ್ಲೆಂಡ್​ ಪ್ರವಾಸದ ಬಗ್ಗೆ ರಿವ್ಯೂ ಜೊತೆಗೆ ಮುಂದಿನ ಏಕದಿನ ವಿಶ್ವಕಪ್​ಗೆ ಸಿದ್ಧತೆಯೂ ಕೂಡ ಸಭೆಯ ಅಜೆಂಡಾ ಆಗಿದೆ. ಇದ್ರಲ್ಲೇ ರೋಹಿತ್​, ಕೊಹ್ಲಿ ಭವಿಷ್ಯವೂ ಚರ್ಚೆಯಾಗಲಿದೆ.  

ಇದನ್ನೂ ಓದಿ: ಇನ್ಮುಂದೆ IPL ಆಡುತ್ತೇನೆ ಎಂದು ಭಾವಿಸಬೇಡಿ.. ಫ್ಯಾನ್ಸ್​ಗೆ ಶಾಕಿಂಗ್ ಹೇಳಿಕೆ ಕೊಟ್ಟ ಎಂ.ಎಸ್ ಧೋನಿ!

‘ಈ ಬಗ್ಗೆ ಶೀಘ್ರದಲ್ಲೇ ಚರ್ಚೆಯಾಗಲಿದೆ’

ಹೌದು.! ಈ ಬಗ್ಗೆ ಶೀಘ್ರದಲ್ಲೇ ಚರ್ಚೆಯಾಗಲಿದೆ. ಮುಂದಿನ ವಿಶ್ವಕಪ್​ಗೆ ಇನ್ನೂ 2 ವರ್ಷಗಳಿವೆ. ಕೊಹ್ಲಿ ಮತ್ತು ರೋಹಿತ್​ ವಯಸ್ಸು ಆಗ 40ರ ಹತ್ತಿರ ಇರಲಿದೆ. ಹೀಗಾಗಿ ಪ್ರಮುಖ ಟೂರ್ನಿಗೂ ಮುನ್ನ ಸ್ಪಷ್ಟವಾದ ಯೋಜನೆ ಬೇಕಿದೆ. 2011ರಲ್ಲಿ ನಾವು ಕೊನೆಯದಾಗಿ ಗೆದ್ದಿದ್ದು. ಕೆಲವು ಯುವ ಆಟಗಾರರನ್ನ ಆಡಿಸಬೇಕಿದೆ-BCCI ಅಧಿಕಾರಿ

ರೋಹಿತ್​ಗೆ ಕೊಕ್​.. ಏಕದಿನಕ್ಕೂ ಗಿಲ್​ ನಾಯಕ..?

ಮೊದಲನೇಯದಾಗಿ ಬಿಸಿಸಿಐ ವಲಯದಲ್ಲಿ ನಡೀತಾ ಇರೋ ಮೊದಲ ಚರ್ಚೆಯೇ ನಾಯಕತ್ವದ ಬದಲಾವಣೆ. 2027ರ ಏಕದಿನ ವಿಶ್ವಕಪ್ ಗುರಿಯಾಗಿಸಿಕೊಂಡಿರೋ ಬಿಸಿಸಿಐ ಬಾಸ್​ಗಳು ಯುವ ನಾಯಕನನ್ನ ನೇಮಿಸೋ ಲೆಕ್ಕಾಚಾರದಲ್ಲಿದ್ದಾರೆ. ಟೆಸ್ಟ್​ ಕ್ಯಾಪ್ಟನ್​ ಆಗಿ ಸಕ್ಸಸ್​ ಕಂಡಿರೋ ಶುಭ್​ಮನ್​ ಗಿಲ್​​ಗೆ ಪಟ್ಟ ಕಟ್ಟೋ ಬಗ್ಗೆ ಚರ್ಚೆ ನಡೆದಿದೆ. ಈಗಲೇ ಗಿಲ್​​ ಏಕದಿನ ನಾಯಕತ್ವ ನೀಡಿದ್ರೆ, 2027ರ ಏಕದಿನ ವಿಶ್ವಕಪ್​ಗೂ ಮುನ್ನ​ ಪಳಗಲು ಸಹಾಯವಾಗಲಿದೆ. ಅನುಭವದ ಜೊತೆಗೆ ಟೀಮ್ ಬಿಲ್ಡ್ ಮಾಡಲು ಟೈಮ್ ಸಿಗುತ್ತೆ. ಹೀಗಾಗಿ ಬಿಸಿಸಿಐ ರೋಹಿತ್​ನ ಕೆಳಗಿಳಿಸಿ ಗಿಲ್​ಗೆ ನಾಯಕತ್ವ ನೀಡೋ ನಿರ್ಧಾರ ಮಾಡಿದೆ. 

ಇದನ್ನೂ ಓದಿ: ಹೈದರಾಬಾದ್​ ಸಂಸದನಿಗೆ ಬೌಲರ್ ಮೊಹಮ್ಮದ್ ಸಿರಾಜ್ ಕ್ಲಾಸಿ ಆನ್ಸರ್..?

ಏಕದಿನ ಫಾರ್ಮೆಟ್​ನಿಂದಲೇ ರೋಹಿತ್​ ಶರ್ಮಾ ಔಟ್?

ರೋಹಿತ್ ಶರ್ಮಾ ಟೀಮ್ ಇಂಡಿಯಾದ ಸಕ್ಸಸ್​ ಫುಲ್ ಕ್ಯಾಪ್ಟನ್ ಅಂಡ್ ಓಪನರ್ ಅನ್ನೋದ್ರಲ್ಲಿ ಎರಡನೇ ಮಾತೇ ಇಲ್ಲ. ಮುಂದಿನ ಏಕದಿನ ವಿಶ್ವಕಪ್ ವೇಳೆಗೆ ರೋಹಿತ್ ಶರ್ಮಾ ವಯಸ್ಸು 40  ಆಗಿರುತ್ತೆ. ಫಿಟ್ನೆಸ್ ಕಾಯ್ದುಕೊಂಡು ಇಂಜುರಿ ಫ್ರೀ ಆಗಿರೋದು, ಅದರ ಜೊತೆಗೆ ಫಾರ್ಮ್​ ಉಳಿಸಿಕೊಳ್ಳುವುದು ದೊಡ್ಡ ಚಾಲೆಂಜ್ ಆಗಲಿದೆ. ಯುವ ಪಡೆಯನ್ನ ಕಟ್ಟೋ ಲೆಕ್ಕಾಚಾರ ಹಾಕಿರೋ ಬಿಸಿಸಿಐ, ರೋಹಿತ್​ನ ಉಳಿಸಿಕೊಳ್ಳೋದು ಅನುಮಾನವೇ.

ಇದನ್ನೂ ಓದಿ: RCB ಯಶ್​ ದಯಾಳ್​ ಪ್ರಕರಣದಲ್ಲಿ ಹೈಕೋರ್ಟ್​ ಮಹತ್ವದ ನಿರ್ಧಾರ.

ಕಿಂಗ್​ ವಿರಾಟ್ ಕೊಹ್ಲಿ ಸ್ಥಾನಕ್ಕೂ ಬಂದಿದೆ ಕಂಟಕ..!

ರೋಹಿತ್​ ಶರ್ಮಾ ಜೊತೆಗೆ ವಿರಾಟ್​ ಕೊಹ್ಲಿ ಸ್ಥಾನಕ್ಕೂ ಸಮಸ್ಯೆ ಎದುರಾಗಿದೆ. ರೋಹಿತ್​ಗಿಂತ ಕೊಹ್ಲಿ ಫಿಟ್​ & ಫೈನ್​ ಆಗಿದ್ರೂ ಕೊಹ್ಲಿಯ ಫಾರ್ಮ್​ ಬಗ್ಗೆ ಪ್ರಶ್ನೆಯಿದೆ. ಕೊಹ್ಲಿಗೀಗ 36 ವರ್ಷ. 2027 ವಿಶ್ವಕಪ್ ವೇಳೆಗೆ ವಯಸ್ಸು 36 ಆಗಲಿದೆ. ಇನ್ನು, ಟೆಸ್ಟ್​, ಟಿ20ಯಿಂದ ದೂರವಾಗಿರೋ ಕೊಹ್ಲಿ, ಏಕದಿನಕ್ಕೆ ಮಾತ್ರ ಸೀಮಿತವಾಗಿದ್ದು ವರ್ಷದಲ್ಲಿ ಕೆಲವೇ ಕೆಲವು ಪಂದ್ಯವನ್ನಾಡ್ತಾರೆ. ಮೈದಾನಕ್ಕಿಂತ ಆಫ್​​ ಫೀಲ್ಡ್​ನಲ್ಲಿ ಹೆಚ್ಚು ಉಳಿಯೋ ಕೊಹ್ಲಿ ಬ್ಯಾಟಿಂಗ್​ ಫಾರ್ಮ್​ ಹೇಗೆ ಕಾಯ್ದುಕೊಳ್ತಾರೆ ಅನ್ನೋದು ದೊಡ್ಡ ಪ್ರಶ್ನೆಯಾಗಿದೆ. 

ಒಟ್ಟಿನಲ್ಲಿ, ಇಂಗ್ಲೆಂಡ್​ ಪ್ರವಾಸ ಅಂತ್ಯದ ಬೆನ್ನಲ್ಲೇ ಬಿಸಿಸಿಐ ಬಾಸ್​​ಗಳು ಮಹತ್ವದ ನಿರ್ಧಾರ ತೆಗೆದುಕೊಳ್ಳಲು ಮುಂದಾಗಿದ್ದಾರೆ. ಕೊಹ್ಲಿ, ರೋಹಿತ್​ ಭವಿಷ್ಯ ಏನಾಗಲಿದೆ ಅನ್ನೋದು ಕೆಲವೇ ದಿನಗಳಲ್ಲಿ ಗೊತ್ತಾಗಲಿದೆ. ಮೀಟಿಂಗ್​ ಮುಗಿಯೋವರೆಗೂ ಕಾಯಬೇಕಷ್ಟೇ.!

ಇದನ್ನೂ ಓದಿ: ಅದೊಂದು ಕ್ಯಾಚ್ ಕಂಗೆಡಿಸಿಬಿಟ್ಟಿತ್ತು.. ಕೊನೆಯಲ್ಲಿ ರಿಯಲ್ ವಾರಿಯರ್ ಎಂದು ಸಿರಾಜ್​​ ನಿರೂಪಿಸಿದ್ದೇಗೆ?

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.30ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ